Ionadaíocht déanta ag an Aire Stáit McConalogue ar Éirinn ag cruinniú d'Airí Cultúir agus Meán an AE
- Foilsithe: 4 Samhain 2025
- An t-eolas is déanaí: 4 Samhain 2025
An 3 agus an 4 Samhain, rinne an tAire Stáit sa Roinn Cultúir, Cumarsáide agus Spóirt a bhfuil Freagracht Speisialta air as Beartas Spóirt agus Poist, Charlie McConalogue TD, ionadaíocht thar ceann na hÉireann ag cruinniú neamhfhoirmiúil Airí Cultúir agus Meán an AE i gCóbanhávan sa Danmhairg.
Inniu, ghlac an tAire Stáit páirt, thar ceann an Rialtais, i ngrianghraf den ghrúpa de shínitheoirí an ‘Dearbhaithe maidir le riachtanas an chultúir agus na meán mar chosaint dár ndaonlathais Eorpacha’. Foilsíodh an dearbhú, atá an tAire Patrick O’Donovan mar shínitheoir air, inniu freisin agus tá sé ar fáil anseo.
Ag labhairt dó faoin dearbhú, dúirt an tAire Stáit McConalogue:
“Tá dearbhuithe polaitiúla den sórt seo, a bhfuil sínitheoirí acu ar fud go leor Ballstát, ríthábhachtach chun ár gcomhluachanna Eorpacha a threisiú. Léirítear go háirithe sa dearbhú seo an ról ríthábhachtach atá ag an gcultúr agus ag na meáin neamhspleácha iolraíocha maidir lenár dtodhchaí dhaonlathach a chosaint.
Gabhaim buíochas le hUachtaránacht na Danmhairge agus le mo chomhghleacaithe Eorpacha as béim a leagan ar an méid sin tríd an dearbhú a foilsíodh inniu agus, as aitheantas a thabhairt don tábhacht a bhaineann leis an gcultúr, leis an oidhreacht chultúir agus le teacht a bheith ar fhaisnéis iontaofa ar féidir brath uirthi ina leith seo.”
Glacfaidh an tAire Stáit páirt tráthnóna inniu i seisiúin oibre chun iniúchadh a dhéanamh ar an gcaoi a gcosnaímid faisnéis iontaofa, chomh maith le todhchaí ábhar closamhairc na hEorpa a phlé. Ag labhairt dó roimh na seisiúin oibre, leag an tAire Stáit McConalogue béim ar an ngá atá le tacaíocht éifeachtach maoinithe i dtionscail meán closamhairc agus meán nuachta na hEorpa atá faoi rialú eagarthóireachta, agus leag sé béim ar an méid seo a leanas:
“Is léir go bhfuil dúshláin mhóra roimh na tionscail sin agus roimh na samhlacha gnó atá mar bhonn taca leo, go háirithe sa ré dhigiteach seo agus i bhfianaise na hiomaíochta idirnáisiúnta do lucht féachana. Tá sé ríthábhachtach mar sin, go leanfaimid de thacaíocht a thabhairt do léiriú agus do dháileadh ábhair Eorpaigh, lena n-áirítear ar an leibhéal áitiúil agus réigiúnach.”
Díríodh sa phlé a bhí ar siúl Dé Luain ar théarnamh agus ar chultúr na hÚcráine a chosaint. Chuir an tAire Stáit in iúl go bhfuil Éire fós i ndlúthpháirtíocht iomlán leis an Úcráin agus chuir sé fáilte roimh an bplé seo chomh maith lena chur in iúl go bhfuilimid tiomanta i gcónaí féachaint ar bhealaí chun oidhreacht chultúir agus déantáin na hÚcráine a chumhdach agus a chosaint.
Nótaí:
Shínigh Éire an ‘Dearbhú maidir le Seasmhacht na hEarnála Cultúir a Neartú’ i mí Feabhra 2025, atá tiomanta féachaint ar bhealaí chun Ciste Oidhreachta don Úcráin a bhunú a thacóidh le hoidhreacht na tíre a chosaint agus a athbhunú, agus mar chuid den phlean téarnaimh, a chuirfidh tacaíochtaí ar fáil d’institiúidí cultúir na hÚcráine.