Foilsíonn an tAire Séamus Ó Ceallacháin Ráiteas Straitéise nua 2025–2028 dá Roinn
- Foilsithe: 21 Samhain 2025
- An t-eolas is déanaí: 21 Samhain 2025
- Leagtar amach sa straitéis nua treo straitéiseach a Roinne go dtí an bhliain 2028.
- Díriú ar leith ar shlándáil, ar shábháilteacht i bpobail agus ar athchóiriú inimirce.
D’fhoilsigh Séamus Ó Ceallacháin, an tAire Dlí agus Cirt, Gnóthaí Baile agus Imirce, an Ráiteas Straitéise nua dá Roinn don tréimhse 2025–2028 inniu.
Tá an Straitéis ag teacht le Clár an Rialtais – Todhchaí na hÉireann a Dhaingniú, agus leagtar amach inti treo straitéiseach na Roinne go dtí an bhliain 2028.
Leis an Ráiteas Straitéise, cuirtear de cheangal ar an Roinn obair i dtreo Éire atá sábháilte, cóir agus cuimsitheach a bhaint amach.
Leagtar sé sprioc ardleibhéil amach sa Straitéis. Is iad sin:
- Ár slándáil a chosaint
- Pobail shábháilte
- Córas éifeachtach inrochtana ceartais
- Córas cóir daingean inimirce
- Ár dtionchar san Eoraip a mhéadú
- Daoine, córais agus teicneolaíocht chun sármhaitheas a bhaint amach
Ar an straitéis a fhoilsiú dó, dúirt an tAire Séamus Ó Ceallacháin:
“Tá áthas orm an Ráiteas Straitéise nua don tréimhse 2025-2028 a fhoilsiú. Leagtar amach sa Straitéis na príomhspriocanna straitéiseacha don tréimhse agus an dóigh a ndéanfaidh an Roinn mo thosaíochtaí agus na gealltanais atá i gClár an Rialtais a chur chun feidhme.
“Is tosaíochtaí agamsa iad an pobal agus an tír a choinneáil slán sábháilte, córas ceartais atá éifeachtach agus inrochtana a fhorbairt, agus sláine agus éifeachtúlacht ár gcórais rialachabhunaithe inimirce, agus muinín an phobail as, a chinntiú.”
Aithnítear sa Straitéis freisin na córais tacaíochta is gá chun na spriocanna sin a bhaint amach, chomh maith leis an díriú suntasach ar Uachtaránacht an Aontais Eorpaigh a dtabharfaimid an-aird air sa bhliain 2026.”
Dúirt Colm Brophy, an tAire Stáit le freagracht as Imirce:
“Tá an Straitéis ag teacht le raon leathan leathnaithe fhreagrachtaí na Roinne. Beidh díriú láidir agam ar a chinntiú go mbeidh córas cóir, daingean agus éifeachtach imirce againn, ar córas é a bheidh níos straitéisí agus níos nua-aimseartha agus a mbeidh an pobal in ann muinín a bheith aige as.”
Chuir Niall Collins, an tAire Stáit le freagracht as an Dlí Idirnáisiúnta, Athchóiriú an Dlí agus Ceartas Óige, fáilte roimh an bhfoilseachán freisin. Dúirt sé:
“Mar Aire, chonaic mé conas is féidir idirghabhálacha ceartais óige a úsáid chun daoine óga a athstiúradh amach ón gcoireacht agus ó ghníomhaíochtaí frithshóisialta. Cuirim fáilte roimh thiomantas na Straitéise seo don cheartas óige mar ghné thábhachtach dár bpobail a choinneáil sábháilte.”