Tá Doncha O’Sullivan ceaptha mar Ard-Rúnaí

D’fhógair an tAire Séamus Ó Ceallacháin inniu go bhfuil an tUas. Doncha O’Sullivan ceaptha mar Ard-Rúnaí na Roinne Dlí agus Cirt, Gnóthaí Baile agus Imirce. Tagann sé sin sna sála ar chomórtais a reáchtáil Poist Phoiblí thar ceann an Choimisiúin um Cheapacháin Ardleibhéil.

Dúirt an tAire Ó Ceallacháin:

“Tá an-áthas orm gur cheap an Rialtas Doncha O’Sullivan mar Ard-Rúnaí na Roinne Dlí agus Cirt inniu. Tá a ghairm caite ag Doncha ag obair don roinn seo agus don mhór-earnáil ceartais, agus tá sé in áit mhaith chun an roinn a threorú sna blianta atá le teacht.”

Chomh maith leis sin, rinne an tAire Ó Ceallacháin comhghairdeas le Oonagh McPhillips, an tArd-Rúnaí atá ag dul as oifig, as a scor agus ghabh sé buíochas léi as an tseirbhís a thug sí don tír le linn a gairme 41 bhliain.

“Ba mhaith liom an deis seo a thapú chun ceannaireacht láidir Oonagh agus a tiomantas eiseamláireach don Roinn a mholadh, rud a léirigh sí le linn na mblianta fada a chaith sí i mbun seirbhíse poiblí tiomanta.”

Ina ról mar Leas-Rúnaí um Cheartas Sibhialta sa Roinn, bhí Doncha i gceannas ar fhorbairt, cur chun feidhme agus athbhreithniú criticiúil a dhéanamh ar bheartais agus cláir i réimse na hinimirce, i réimse na cosanta idirnáisiúnta, i réimse athchóiriú an dlí shibhialta, agus i réimse na rochtana ar cheartas. Chomh maith leis sin, rinne sé formhaoirseacht ar an dóigh a mbainistítear caidreamh na Roinne le gníomhaireachtaí éagsúla ceartais shibhialta atá faoi choimirce na Roinne, lena n-áirítear an tSeirbhís Chúirteanna agus an Bord um Chúnamh Dlíthiúil.

Mar chuid dá ghairm sa Roinn, bhí róil ardbhainistíochta aige mar Cheann Gnóthaí Corparáideacha agus mar Cheann um Rialachas Ceartais Shibhialta. D’oibrigh sé freisin ar fud an Bheartais Choiriúil, na Póilíneachta, na bPríosún agus Gnóthaí Aontais Eorpaigh.