Cruinniú Aontais Eorpaigh inar pléadh an Imirce, an tSlándáil Inmheánach agus an Choireacht Eagraithe

Rinne Niall Collins TD, an tAire Stáit ar a bhfuil freagracht speisialta as an Dlí Idirnáisiúnta, Athchóiriú an Dlí agus Ceartas i leith an Aosa Óig, ionadaíocht d’Éirinn ag cruinniú d’Airí Dlí agus Cirt agus Gnóthaí Baile na hEorpa, a tionóladh sa Chipir.

Phléigh na hairí cur chuige níos comhordaithe, níos inbhuanaithe agus níos éifeachtúla a thabhairt isteach i leith filleadh agus athimeascadh a sheoladh. Leagadh díriú ar leith ar thosaíocht a thabhairt do dhaoine aonair ar bagairt slándála iad nó a ciontaíodh i gcionta tromchúiseacha a thabhairt ar ais.

Pléadh freisin an gá atá leis an tslándáil inmheánach a neartú chun saorghluaiseacht shaoránaigh na hEorpa a chosaint agus chun cosc a chur ar ghluaiseachtaí tánaisteacha imirceach in Aontas atá saor ó theorainneacha.

Sainaithníodh gur cuid lárnach de dhul i ngleic le gníomhaíocht choiriúil é spriocdhíriú ar shócmhainní na ndaoine atá páirteach i gcoireacht eagraithe. Mhalartaigh na hairí tuairimí agus cleachtais náisiúnta maidir le conas aisghabháil sócmhainní a neartú i dtírdhreach airgeadais a bhíonn ag athrú i gcónaí, lena n-áirítear trí thuilleadh úsáide a bhaint as comhpháirtíochtaí príobháideacha poiblí.

Rinne airí agus oifigigh láithreoireachtaí ar na cineálacha cur chuige náisiúnta a ghlacann siad i leith daoine óga a úsáideann drugaí a atreorú amach ón gcóras ceartais choiriúil, lena n-áirítear trí roghanna malartacha ar choinneáil a úsáid, ar roghanna malartacha iad a cruthaíodh a bheith éifeachtach. Rinneadh plé ina dhiaidh sin ar conas a d’fhéadfadh an tAontas Eorpach tacú leis na Ballstáit tionscnaimh den sórt sin a fhorbairt tuilleadh.