Tionscadail Nua Athstiúrtha Óige don Chlár Thoir agus do Thiobraid Árann Thuaidh

Sheol an tAire Stáit Niall Collins Tionscadal Athstiúrtha Óige DERG go hoifigiúil inniu, rud a sholáthróidh tacaíochtaí feabhsaithe do dhaoine óga agus do theaghlaigh sa Chlár Thoir agus i dTiobraid Árann Thuaidh.

Is é atá i dTionscadal Athstiúrtha Óige DERG ná leathnú suntasach na seirbhísí ceartais óige sa réigiún, tar éis Tionscadal Athstiúrtha Óige DEN, ar thionscadal a bhí ann cheana é, agus Tionscadal Forbartha Óige an Chláir Thoir, ar thionscadal nuabhunaithe é, a chónascadh ag deireadh na bliana 2025.

Oibreoidh an tionscadal ó dhá bhunáit, mar atá an tAonach agus Cill Dalua, agus freastalóidh sé ar dhobharcheantar ina gcónaíonn thart ar 62,750 duine.

Oibríonn tionscadail athstiúrtha óige le daoine óga atá i mbaol a bheith páirteach in iompraíocht fhrithshóisialta nó choiriúil, agus tacaíonn siad leis na daoine óga sin roghanna dearfacha a dhéanamh agus fanacht amach ón gcóras ceartais choiriúil.

Is é Foróige a oibríonn Tionscadal Athstiúrtha Óige DERG agus is í an Roinn Dlí agus Cirt, Gnóthaí Baile agus Imirce a chistíonn é. Don bhliain 2026, fuair an tionscadal €570,037 chun tacú le foireann ina bhfuil ochtar oibrithe Ceartais Óige a sholáthraíonn idirghabhálacha spriocdhírithe éagsúla. I measc na gcionta ba choitianta bhí gadaíocht, damáiste coiriúil, ionsaí, agus cionta a bhaineann le trácht.

Cabhróidh an tionscadal seo le tacaíochtaí luath-idirghabhála a sholáthar do leanaí idir ocht mbliana d’aois agus 11 bhliain d’aois atá i mbaol a bheith páirteach in iompraíocht fhrithshóisialta amach anseo, in éineacht le seirbhísí tiomnaithe tacaíochta teaghlaigh, rud a léiríonn sainchúram leathnaithe na dtionscadal athstiúrtha óige faoin Straitéis um Cheartas i leith an Aosa Óig 2021-2027.

Oibreoidh Tionscadal Athstiúrtha Óige DERG i ndlúth-chomhpháirt leis an nGarda Síochána, le scoileanna áitiúla, le heagraíochtaí pobail agus le seirbhísí reachtúla eile chun freagairt chomhordaithe a sholáthar do chiontú óige sa réigiún.