Comórann an tAire Séamus Ó Ceallacháin garsprioc thábhachtach sa chur chuige nua i leith sábháilteacht pobail
- Foilsithe: 17 Feabhra 2026
- An t-eolas is déanaí: 17 Feabhra 2026
- Tá Comhpháirtíochtaí Sábháilteachta Pobail Áitiúla faoi shiúl anois i bhformhór na limistéar údaráis áitiúil, rud a chomhlíonann gealltanas lárnach i gClár an Rialtais.
- Is oscailte atá suirbhé náisiúnta ar líne ar shábháilteacht pobail.
D’fháiltigh Séamus Ó Ceallacháin, an tAire Dlí agus Cirt, Gnóthaí Baile agus Imirce, inniu roimh an dul chun cinn suntasach atá déanta ar chur i bhfeidhm náisiúnta Comhpháirtíochtaí Sábháilteachta Pobail Áitiúla.
Tá comhaltaí ceaptha anois chuig 34 Chomhpháirtíocht Sábháilteachta agus tá a gcruinnithe tionscnaimh tionólta ag 31 cheann díobh, ar lena linn a thogh siad a gCathaoirleach agus a Leas-Chathaoirleach. Táthar ag súil go mbunófar na Comhpháirtíochtaí Sábháilteachta Pobail Áitiúla eile faoi dheireadh mhí Feabhra.
Ag labhairt dó ag an gcéad chruinniú náisiúnta de Chathaoirligh, Comhordaitheoirí agus Riarthóirí na gComhpháirtíochtaí Sábháilteachta Pobail Áitiúla a tionóladh sa Roinn Dlí agus Cirt agus Gnóthaí Baile inniu, spreag an tAire Séamus Ó Ceallacháin na comhaltaí chun an deis seo a thapú chun difear dearfach a dhéanamh don tsábháilteacht ina bpobal.
Dúirt an tAire Séamus Ó Ceallacháin:
“Is é atá anseo inniu ná céim shuntasach i dtreo dul chun cinn a dhéanamh ar an tsamhail nua Comhpháirtíochtaí Sábháilteachta Pobail Áitiúla, agus na daoine a bheidh i gceannas ar an tsamhail a chur i gcrích agus a neartóidh ár gcur chuige i leith sábháilteacht pobail á dtabhairt le chéile.
“Is í an chéad chéim eile le haghaidh gach comhpháirtíochta ná a plean saincheaptha sábháilteachta pobail féin a fhorbairt agus a chur chun feidhme. Trí ionadaithe áitiúla, grúpaí pobail agus gníomhaireachtaí stáit a thabhairt le chéile, beidh gach Comhpháirtíocht Sábháilteachta in ann plean a fhorbairt lena sainaithnítear gníomhartha fiúntacha mar fhreagairt do riachtanais sábháilteachta pobail ina limistéar féin.
“Ba mhaith liom gach rath a ghuí ar Chathaoirligh agus comhaltaí na gComhpháirtíochtaí Sábháilteachta Pobail Áitiúla agus buíochas a ghabháil leo as a bheith mar chuid den chur chuige nuálach nua seo i leith sábháilteacht pobail. Cuid dhílis de rath a gcomhpháirtíochtaí faoi seach a bheidh ina dtoilteanas agus ina dtiomantas d’obair i gcomhar mar chomhaltaí.”
Ar an leibhéal áitiúil, imreoidh Comhpháirtíochtaí Sábháilteachta Pobail ról lárnach maidir le sábháilteacht pobail a fheabhsú ar fud na tíre i gcomhar leis an nGarda Síochána, le cónaitheoirí áitiúla, le hionadaithe tofa, le gnólachtaí, leis an earnáil pobail agus dheonach, agus le gníomhaireachtaí stáit.
Tá 36 Chomhpháirtíocht Sábháilteachta san iomlán á mbunú i ngach limistéar údaráis áitiúil, agus 30 comhalta ar a mhéad ag gach ceann díobh.
Leis an mbonneagar tacaíochta, mar atá an Oifig Náisiúnta um Shábháilteacht Pobail, na Cathaoirligh faoi seach agus foireann na Comhpháirtíochta Sábháilteachta Pobail Áitiúla, cabhrófar le gach Comhpháirtíocht Sábháilteachta cur chuige straitéiseach a ghlacadh i leith déileáil le saincheisteanna a bhaineann le sábháilteacht pobail.
Tá an Oifig Náisiúnta um Shábháilteacht Pobail i gceannas ar an gcéad Straitéis Náisiúnta le haghaidh Sábháilteacht Pobail a Fheabhsú a fhorbairt. Osclaíodh suirbhé poiblí an 5 Feabhra 2026 agus dúnfar é an 27 Feabhra 2026.
Dúirt an tAire Séamus Ó Ceallacháin freisin:
“Is é a bheidh inár Straitéis Náisiúnta ná gealltanas uile-rialtais gan fasach chun sábháilteacht pobail a ath-shainmhíniú agus a fheabhsú ar fud na hÉireann. A bhuí léi, bunófar creat beartais bunúsach, freagrúil agus ábhartha lena gcuirfear ar chumas comhlachtaí seirbhíse poiblí agus pobal obair le chéile ar bhealach comhordaithe chun pobail a dhéanamh níos sábháilte.
“Molaim do dhaoine den phobal an suirbhé a líonadh isteach agus a dtuairimí ar na saincheisteanna is tábhachtaí dóibh a chur in iúl chun cabhrú linn pobail níos sábháilte a thógáil.”
Tá tuilleadh faisnéise faoin Straitéis Náisiúnta, lena n-áirítear tuilleadh faisnéise faoin suirbhé poiblí, ar fáil anseo: An Straitéis Náisiúnta le haghaidh Sábháilteacht Pobail a Fheabhsú
CRÍOCH
