Bás a chlárú leis an gCróinéir

Más rud é go gcomhlíonfar na coinníollacha uile atá mínithe sa rannán Bás a chlárú agus nach mbeidh aon imscrúdú breise ag teastáil, ligfidh an Cróinéir don dochtúir Foirm Fógra Báis a chomhlánú.

Áirítear leis an bhfoirm sin Cúis Liachta an Bháis, agus fágann sí go bhféadfar an bás a chlárú ansin le Cláraitheoir na mBásanna.

Ní foláir do ghaol (nó do dhuine incháilithe eile) Foirm Fógra Báis a fháil ón lia-chleachtóir a chonaic an duine éagtha agus a chuir cóireáil air nó uirthi le linn a bhreoiteachta deireanaí nó a breoiteachta deireanaí.

Tugtar an Fhoirm Fógra Báis d’Oifig an Chláraitheora, áit a gcláraítear an bás agus a n-eisítear an Deimhniú Báis.

Más rud é go dtarlóidh bás in ospidéal, féadfaidh duine d’fhoireann an ospidéil an bás a chlárú.

Beidh an deimhniú báis ar fáil ó d’oifig cláraitheora áitiúil.

Más gá imscrúduithe breise a dhéanamh ar bhás, is féidir leat faisnéis a fháil thíos faoi cad atá le déanamh agat.

Más rud é go measfar bás a bheith mínádúrtha, ní fhéadfaidh dochtúir é a dheimhniú. Ní fhéadfaidh dochtúir Foirm Fógra Báis a chomhlánú thar ceann dochtúir eile.

Bunaithe ar an bhfaisnéis atá ar fáil, cinnfidh an Cróinéir:

• an féidir bás a dheimhniú gan aon ghníomh eile
• an mbeidh scrúdú iarbháis ag teastáil chun tuilleadh faisnéise a shuí
• an mbeidh scrúdú iarbháis agus ionchoisne ag teastáil

Más rud é go dtuairisceofar bás don Chróinéir agus go mbeidh sé ina ábhar do scrúdú iarbháis nó d’ionchoisne, clárófar an bás nuair a eiseoidh an Cróinéir an deimhniú uaidh nó uaithi tar éis an scrúdaithe iarbháis nó an ionchoisne.

Féadfaidh tú iarratas a dhéanamh ar Dheimhniú Báis Eatramhach go dtí go suífidh an Cróinéir cúis an bháis agus go gcláróidh sé nó sí an bás go hoifigiúil.