An Scéim um Athnuachan Bailte agus Sráidbhailte

Tugadh an Scéim um Athnuachan Bailte agus Sráidbhailte isteach ar dtús in 2016. Déanann na húdaráis áitiúla í a bhainistiú thar ceann na Roinne, agus tá an clár á mhaoiniú faoi Thionscadal Éireann 2040. Tá an scéim dírithe go príomha ar bhailte agus sráidbhailte tuaithe a bhfuil daonra faoi 10,000 acu, ach breathnaítear ar bhailte a bhfuil daonra suas le 15,000 acu má fhaightear iarratas d’ardchaighdeán.

Ó seoladh an Scéim um Athnuachan Bailte agus Sráidbhailte in 2016, ceadaíodh maoiniú de bhreis agus €210 milliún i gcomhair níos mó ná 1,900 tionscadal ar fud Éireann.

Tá an Scéim um Athnuachan Bailte agus Sráidbhailte mar chuid de shraith beart tacaíochtaí náisiúnta agus áitiúil atá deartha chun bailte agus sráidbhailte tuaithe a athbheochan ar fud Éireann, faoin Chlár Infheistíochta Forbartha Tuaithe de chuid na Roinne.

Aithníonn an Roinn Forbartha Tuaithe agus Pobail agus Gaeltachta, trínár mbeartais amhail Ár dTodhchaí Thuaithe, Tús Áite do Lár an Bhaile agus Ár nOileáin Bheo, go bhfuil tábhacht le bailte agus sráidbhailte tuaithe bríomhara a chruthú agus a chothabháil, agus leanfaidh muid de bheith ag tabhairt seo i gcrích trí réimse leathan idirghabhálacha agus infheistíochtaí a chur ar fáil ar fud na tíre.

Tá súil go bhfógrófar Gairm ar Thograí i gcomhair na Príomhscéime agus an Bhirt Forbartha Tionscadail níos déanaí i mbliana.

Beart Fála Foirgnimh agus Talún 2026

Tá Beart Fála Foirgnimh agus Talún (BFFT) 2026 seolta ag an Aire. Tacófar le húdaráis áitiúla tríd an Bheart chun trí fhoirgneamh nó suíomh dearóile nó folmha, ar an uasmhéid, a cheannach láithreach. De réir mhóraidhmeanna na Scéime um Athnuachan Bailte agus Sráidbhailte, ní mór bunús soiléir a bheith le haon cheannach beartaithe maidir le conas a úsáidfear é amach anseo ar mhaithe le cuspóirí athnuachana baile.

Is é an spriocdháta i gcomhair iarratais a fháil faoin Bheart seo ná Dé hAoine, 29 Bealtaine 2026.

Dearadh an Scéim um Athnuachan Bailte agus Sráidbhailte 2025 chun tacú le hathbheochan cheantair thuaithe na hÉireann trí bhéim a leagan ar athghiniúint eacnamaíoch agus shóisialta lár bailte a spreagadh, rud a bhainfear amach trí thionscadail lena dtacaítear le cruthú fostaíochta inbhuanaithe, athléimneacht agus athghiniúint lár bailte, ár sráid-dreacha a fheabhsú, agus foirgnimh agus talún folamh agus dearóil a chur in úsáid arís mar spásanna ilchuspóra pobail trí athfheistiú agus athchóiriú.

Bhí trí shreabhadh maoinithe ar fáil faoin Scéim um Athnuachan Bailte agus Sráidbhailte 2025; an Phríomhscéim, an Beart Forbartha Tionscadail agus an Beart Fála Foirgnimh agus Talún. Is féidir teacht ar shonraí faoi thionscadail ar éirigh leo faoi Scéim 2025 ar leathanach gréasáin na leithdháiltí maoinithe.

Is féidir teacht ar fhaisnéis faoi thionscadail a maoiníodh roimhe seo faoin Scéim um Athnuachan Bailte agus Sráidbhailte ar an leathanach gréasáin seo: Leithdháiltí Maoinithe na Scéime um Athnuachan Bailte agus Sráidbhailte

Má tá ceisteanna ar bith agat faoin Scéim um Athnuachan Bailte agus Sráidbhailte, déan teagmháil le townandvillage@drcdg.gov.ie