Fógraíonn an tAire Calleary maoiniú €6.2 milliún do thionscadail Ghaeilge agus Ultaise faoin Tionscnamh um Oileán Comhroinnte
- Foilsithe: 23 Márta 2026
- An t-eolas is déanaí: 23 Márta 2026
D’fhógair an tAire Forbartha Tuaithe agus Pobail agus Gaeltachta, Dara Calleary TD, inniu go bhfuil maoiniú caipitil €6.2 milliún ceadaithe aige do thionscadail a thacaíonn leis an nGaeilge agus le cultúr, oidhreacht agus teanga na hUltaise, faoin Tionscnaimh Rialtais um Oileán Comhroinnte.
San áireamh san fhógra seo, tá maoiniú caipitil suas le €4.8m san iomlán thar 4 bliana ceadaithe don Chiste Infheistíochta Gaeilge chun cómhaoiniú a dhéanamh ar thograí pobail Gaeilge i dTuaisceart Éireann. Tá maoiniú caipitil os cionn €1.4 milliún fógartha chomh maith do North West Cultural Partnership chun cómhaoiniú a dhéanamh ar an tionscadal caipitil Cuimsiú Cultúrtha i gCathair Dhoire.
Tá maoiniú curtha ar fáil ag an Rialtas tríd an gCiste um Oileán Comhroinnte – faoinar fógraíodh €6 milliún i bhFeabhra 2025 mar thacaíocht do thionscadail Ghaeilge agus Ultaise – mar aon le maoiniú ón Roinn Forbartha Tuaithe agus Pobail agus Gaeltachta, a dhéanfaidh maoirseacht ar sheachadadh an mhaoinithe, i gcomhar le comhpháirtithe i dTuaisceart Éireann.
Cuirfidh na tionscadail a bainfidh tairbhe as an maoiniú atá fógartha inniu go mór chun leas teangeolaíocha, sóisialta, eacnamaíochta agus cultúrtha na bpobal Gaeilge agus Ultaise i dTuaisceart Éireann agus cois teorann.
Agus an maoiniú á fhógairt aige inniu, dúirt an tAire Dara Calleary TD:
“Cuireann sé an-áthas orm an maoiniú suntasach caipitil seo a fhógairt inniu mar chuid den Tionscnamh Rialtais um Oileán Comhroinnte chun comhoibriú, caidrimh agus comhthuiscint a fheabhsú ar oileán na hÉireann. Cuirfidh an maoiniú le raon tionscadal a chruthóidh buntáistí buana pobail agus cultúrtha do phobail na Gaeilge agus na hUltaise i dTuaisceart Éireann agus cois teorann.
“Tá sé tábhachtach go dtacaímid le heagraíochtaí ar fud an oileáin atá ag obair ar mhaithe le daoine agus pobail a thabhairt le chéile, lena n-áirítear tríd an nGaeilge agus trí chultúr, oidhreacht agus teanga na hUltaise. Táim ag súil go mór le toradh na dtionscadal atá á bhforbairt ag an gCiste Infheistíochta Gaeilge agus ag an North West Cultural Partnership, ag neartú pobail áitiúla agus ag cothú ceangal cultúrtha ar fud an oileáin.”