Baintear sprioc thábhachtach amach agus an tAire Calleary ag fógairt an 400ú Mol Nasctha
- Foilsithe: 13 Samhain 2025
- An t-eolas is déanaí: 14 Samhain 2025
- Mol Nuálaíochta ar Fhearann na Manach, Co. Ros Comáin, an 400ú mol ar Líonra na Mol Nasctha
- Fógraíodh an sprioc inniu ag Cruinniú Mullaigh Náisiúnta na Mol i mBéal Átha na Slua, agus is príomhsheachadadh é faoi pholasaí Thodhchaí Tuaithe an Rialtais
D’fhógair an tAire Forbartha Tuaithe agus Pobail agus Gaeltachta, Dara Calleary TD, gur cláraíodh 400 mol le ConnectedHubs.ie chun freastal ar phríomhsheachadadh Ár dTodhchaí Tuaithe. Rinne an tAire an fógra inniu ag ceathrú Cruinniú Mullaigh Náisiúnta na Mol, a tionóladh i mbliana i mBéal Átha na Slua, Co. na Gaillimhe.
Feidhmíonn an Cruinniú Mullaigh mar ardán do chainteoirí idirnáisiúnta agus Gaeilge, foirne mol, comhlachtaí ionadaíocha, gníomhaireachtaí stáit agus ranna rialtais chun páirt a ghlacadh i bplé maidir le treo straitéiseach Líonra Náisiúnta na Mol in Éirinn amach anseo.
Mar aon le príomhphlé straitéiseach, dírítear san ócáid ar roinnt eolais, líonrú agus dea-chleachtas a fhorbairt.
Tabharfaidh an tAire Calleary cuairt ar Mhol Nuálaíochta Fhearann na Manach tráthnóna i gcontae Ros Comáin.
Ag labhairt ag an gcruinniu, dúirt an tAire Dara Calleary:
“Aithnítear inár dTodhchaí Tuaithe an deis a bhaineann le hobair chianda a chur ar fáil maidir lenár mbailte agus ár sráidbhailte tuaithe a athnuachan.
“Tá áthas orm an 400ú mol a fhógairt. Léiríonn comhlíonadh an phríomhsheachadta seo faoi Ár dTodhchaí Tuaithe tiomantas an Rialtais don obair chianda agus do cheantair thuaithe na hÉireann.
“Mar Aire Forbartha Tuaithe agus Pobail agus Gaeltachta, tá sé tábhachtach domsa go dtabharfar deis dóibh siúd ar mhaith leo maireachtáil i gceantair thuaithe na hÉireann leas a bhaint as na deiseanna méadaithe oibre cianda a tháinig chun cinn le blianta beaga anuas.
“Ní hamháin go gcabhraíonn líonra na mol leis na deiseanna seo, ach tá sé ag cabhrú le daonra roinnt ceantar tuaithe a choinneáil beo, láir bhailte a athbheochan, amanna comaitéireachta a laghdú agus caighdeán beatha daoine a fheabhsú.”
Dúirt Allan Mulrooney, POF Choimisiún Forbartha an Iarthair:
“Cuireadh tús le Moil Nasctha mar thionscnamh píolótach i Réigiún an Iarthair agus tá fás tagtha air go bhfuil sé anois ina líonra náisiúnta. Is díol suntais é go bhfuil 400 mol anois bainte amach againn, agus is léiriú é ar an bhfíorthionchar atá an tionscnamh seo ag imirt ar phobail ar fud na hÉireann.
“Trínár gcomhpháirtíocht leis an Roinn Forbartha Tuaithe agus Pobail agus Gaeltachta, is cúis bhróid do Choimisiún Forbartha an Iarthair í Líonra na Mol Nasctha a bhainistiú agus tacú leis an mborradh leanúnach atá ag teacht faoi dheiseanna cianoibre. Le chéile, táimid ag cabhrú le pobail áitiúla a chothú, daoine cumasacha a mhealladh, agus geilleagair réigiúnacha a neartú, chun na spriocanna atá leagtha amach in Ár dTodhchaí Thuaithe a chomhlíonadh.”
Nótaí
Ár dTodhchaí Tuaithe
Is é Ár dTodhchaí Tuaithe an polasaí uile-rialtais do cheantair thuaithe na hÉireann do thréimhse 2021-2025. Glactar cur chuige níos straitéisí, uaillmhianaí agus iomlánaíche ann maidir le hinfheistíocht a dhéanamh i gceantair thuaithe agus deiseanna a uasmhéadú dóibh.
Connectedhubs.ie
Ceann de na gealltanais a tugadh inár dTodhchaí Tuaithe ná líonra náisiúnta cuimsitheach agus comhtháite de 400 Mol Oibre Cianda a bhunú thar shaolré an pholasaí (lena n-áirítear ardán áirithinte lárnach d'úsáideoirí na Mol Nasctha).
Is ardán áirithinte ar líne comhroinnte iad Moil Nasctha (www.connectehubs.ie) do mhoil oibre cianda agus a n-úsáideoirí, a seoladh i mí Bealtaine 2021. Soláthraíonn an t-ardán léarscáil idirghníomhach a thaispeánann suíomh agus sonraí gach mol oibre cianda ar an líonra agus tugann sé deis d'oibrithe cianda deasca agus seomraí cruinnithe a chur in áirithe. Tá 400 Mol Oibre Cianda beo ar an ardán faoi láthair. Bainistíonn Coimisiún Forbartha an Iarthair ardán na Mol Nasctha thar ceann an RFTPG.
Straitéis na Mol Náisiúnta
Tá Straitéis Náisiúnta Mol nua á cur i gcrích faoi láthair. Cuirfidh sé cur chuige comhtháite agus cur chuige uile-rialtais i láthair maidir le forbairt oibre cianda agus mol fiontraíochta amach anseo.
Tá an straitéis seo á forbairt i gcomhpháirtíocht leis an Roinn Fiontar, Turasóireachta agus Fostaíochta agus Coimisiún Forbartha an Iarthair agus i gcomhairle le bainisteoirí mol, údaráis áitiúla, pobail agus páirtithe leasmhara eile, lena n-áirítear Fiontraíocht Éireann, an ÚFT agus Údarás na Gaeltachta. Rinne aiseolas ó Chruinnithe Mullaigh Náisiúnta Mol le déanaí eolas d’fhorbairt na straitéise freisin.
Coimisiún Forbartha an Iarthair
Is comhlacht reachtúil é Coimisiún Forbartha an Iarthair a bunaíodh in 1997 chun forbairt shóisialta agus eacnamaíoch a chur chun cinn i Réigiún an Iarthair (contaetha Dhún na nGall, Liatroma, Shligigh, Mhaigh Eo, Ros Comáin, na Gaillimhe agus an Chláir). Is iad a phríomhréimsí fócais ná forbairt réigiúnach, Ciste Infheistíochta an Iarthair agus taighde agus forbairt beartais. Tá an Coimisiún i gceannas ar bhunú agus ar fhorbairt Líonra na Mol Nasctha faoi choimirce an RFTPG.
Cainteoirí ag Cruinniú Mullaigh na Mol
- An tAire Forbartha Tuaithe agus Pobail agus Gaeltachta, Dara Calleary TD
- An tAire Fiontar, Turasóireachta agus Fostaíochta, Peter Burke TD (teachtaireacht físe)
- Marina Donohoe, Fiontraíocht Éireann
- Valerie Moreau, Ceann Líonraí Idirnáisiúnta agus Tionscadail AE, Laval Mayenne Technopole (LMT), an Fhrainc
- Pádraig Walsh, POF ChangeAble Behaviour
- Kingsley Aikins, bunaitheoir, an Institiúid Líonraithe
- Ainslie Peters, Bunaitheoir, Work Made Well
- Dimitar Inchev agus Pauline Rouseel, comhbhunaitheoirí Coworkies agus comhúdair Around the World in 250 Coworking Spaces