Preasráitis

Plean Gníomhaíochta Chiste na gCuntas Díomhaoin 2026 foilsithe ag an Aire Buttimer

Ó: An Roinn Forbartha Tuaithe agus Pobail agus Gaeltachta
Foilsithe: 24 Samhain 2025
An t-eolas is déanaí: 24 Samhain 2025

Maoiniú €47 milliún chun dul i ngleic le míbhuntáiste

Inniu (Dé Luain, 24 Samhain 2025) d’fhógair Jerry Buttimer, TD, Aire Stáit sa Roinn Forbartha Tuaithe agus Pobail agus Gaeltachta, maoiniú de bheagnach €47 milliún ó Chiste na gCuntas Díomhaoin chun dul i ngleic le míbhuntáiste fud fad na tíre. Sheol sé Plean Gníomhaíochta Chiste na gCuntas Díomhaoin 2026 sa Dúcharraig, Co. Chorcaí ag an “Try Table Tennis Programme” i Scoil Aston, a fuair tacaíocht faoi Chiste na gCuntas Díomhaoin.

Is féidir airgead i gCiste na gCuntas Díomhaoin a úsáid chun maoiniú a thabhairt i gcomhair beart lena dtugtar aghaidh ar mhíbhuntáiste eacnamaíoch, sóisialta nó oideachasúil, agus chun tacú le daoine faoi mhíchumas. Faoi Phlean Gníomhaíochta 2026, leithdháilfear maoiniú de €46.97 milliún ar 56 bheart atá le tabhairt i gcrích ar fud 11 Roinn Rialtais.

Agus é ag seoladh an Phlean Gníomhaíochta inniu, dúirt an tAire Buttimer:

“Is mór an t-áthas atá orm Plean Gníomhaíochta Chiste na gCuntas Díomhaoin 2026 a sheoladh go hoifigiúil, faoina dtabharfar maoiniú €46.97 milliún chun dul i ngleic le míbhuntáiste fud fad na hÉireann. Déanfar na 56 bheart dár ceadaíodh maoiniú in 2026 a chur i bhfeidhm ar fud an Rialtais agus cabhróidh siad le dul i ngleic le réimse leathan ceisteanna ar nós easpa dídine, míchumas, míbhuntáiste san aos óg, imeascadh imirceach agus bearta spóirt do phobail faoi mhíbhuntáiste.”

Lean an tAire ar aghaidh:

“Sa ré dhúshlánach seo, is mór an difear a dhéanann maoiniú ó na Cuntais Dhíomhaoine do dhaoine aonair agus do phobail fud fad na tíre. Cinnteoidh muid, le Plean Gníomhaíochta 2026 atá á fhoilsiú inniu, gur féidir linn leanúint lenár dtacaíocht dóibh siúd atá leochaileach inár sochaí. Cúis áthais ar leith dom go bhfuil mórán Ranna ag leanúint lena dtacaíocht dóibh siúd faoi mhíchumas ina mbearta.

“Tá áthas ar leith orm go bhfuil béim níos láidre curtha agam ar mhíchumas i ndáileadh mhaoiniú na gCuntas Díomhaoin i mbliana. Tá sé seo i gcomhréir le gealltanas an Chláir Rialtais chun tús áite a thabhairt do mhaoiniú agus do dheiseanna do dhaoine faoi mhíchumas.”

Dúirt an tAire Calleary TD:

“Cuirim fáilte roimh Phlean Gníomhaíochta Chiste na gCuntas Díomhaoin 2026 lena ndíreofar maoiniú de €46.97 milliún ar aghaidh a thabhairt ar an míbhuntáiste ar fud na tíre. Tá cúnamh leanúnach ó Chiste na gCuntas Díomhaoin faighte acu siúd is leochailí ar fad. Mar gheall ar an gCiste, beidh mo Roinn féin in ann leanúint le maoiniú €2.1 milliún don Scéim Rabhaidh do Sheanóirí, €4 milliún do Rethink Ireland agus €1.5 milliún chun tacú le cur i bhfeidhm an Bheartais Náisiúnta Daonchairdis. Beidh €2 milliún i gcomhair bearta Fiontraíochta Sóisialta ann dá bharr freisin, agus tabharfar €780k ar an iomlán don iliomad grúpaí aonair faoin Bheart um Ionchuimsiú Sóisialta Spriocdhírithe. Is mór an difríocht dár sochaí a dhéantar leis na hidirghabhálacha seo, agus le bearta cosúil leo ar fud an Rialtais.”

Nótaí d’Eagarthóirí

Tacófar le 56 bheart difriúla, de €46.97 milliún ar an iomlán, faoi Phlean Gníomhaíochta 2026. Leagtar amach sa tábla thíos liosta iomlán de na bearta atá le maoiniú faoi Phlean Gníomhaíochta Chiste na gCuntas Díomhaoin 2026.

Maoiníodh cuid mhór de na beartais faoi Phleananna Gníomhaíochta roimhe seo agus anois leanfar leis an mhaoiniú sin in 2026 chun go mbeidh na bearta sin i bhfeidhm arís an bhliain seo chugainn. Leanfar le mórchuid na mbeart faofa in 2026, agus gach Roinn Rialtais freagrach as a mbearta féin a thabhairt i gcrích. Is féidir le bearta dul chun cinn thar roinnt blianta agus maoiniú á tharraing aníos ón Chiste de réir mar a thabhaítear caiteachas.

Seo a leanas roinnt samplaí de bhearta ar ceadaíodh maoiniú ina leith:

€10 milliún i gcomhair infheistíochta agus gníomhartha atá dírithe ar bhorradh a chur faoi rannpháirtíocht i spóirt i bpobail faoi mhíbhuntáiste agus i measc daoine faoi mhíchumas.
€3 milliún chun daoine a aistriú ón easpa dídine fhadtéarmach go tionóntachtaí tacaithe.
€3 milliún i gcomhair seirbhísí ceartais d’óige agus pobail a bhfuil mar aidhm leo tionchar agus éifeachtaí na coiriúlachta ar dhaoine óga agus pobail a chomhrac.
€2 milliún chun tacú le fiontair shóisialta chun dul i ngleic le míbhuntáiste sóisialta agus eacnamaíoch.
€1.4 milliún i gcomhair tionscnaimh óige agus teaghlaigh chun na scileanna boga atá de dhíth chun infhostaitheacht a fheabhsú a thabhairt do dhaoine óga.

Cuireann an Plean Gníomhaíochta seo le pleananna roimhe seo agus leanfar le tacaíocht do dhaoine agus eagraíochtaí fud fad na tíre dá bharr. Tháinig ardú 4.8% ar mhaoiniú i bPlean Gníomhaíochta 2026 i gcomparáid le 2025.

Cúlra Chiste na gCuntas Díomhaoin

Sna hAchtanna um Chuntais Dhíomhaoine 2001-2012, in éineacht leis an Acht um Polasaithe Árachais Saoil Neamhéilithe 2003, cuirtear creat ar fáil i gcomhair riarachán cuntas neamhéilithe in institiúidí creidmheasa (i.e. bainc, cumainn foirgníochta agus An Post) agus polasaithe árachais saoil neamhéilithe i ngnóthais árachais.

Is é príomhchuspóir na reachtaíochta ná sealbhóirí cuntas nó sealbhóirí polasaithe a thabhairt ar ais le chéile lena n-airgead in institiúidí creidmheasa nó gnóthais árachais, agus ina leith seo, ceanglaítear ar na forais seo céimeanna a ghlacadh chun úinéirí na gcuntas díomhaoin agus na bpolasaithe árachais saoil neamhéilithe a shainaithint agus teagmháil a dhéanamh leo.

Mar sin féin, ionas gur féidir úsáid a bhaint as an airgead nár úsáideadh, tugadh scéim isteach leis an reachtaíocht lenar féidir úsáid a bhaint as maoiniú nár dhócha go n-éileofar ar ais é ó na cuntais dhíomhaoine agus na polasaithe neamhéilithe, ar mhaithe le bearta chun tacú le:

forbairt phearsanta agus shóisialta daoine atá faoi mhíbhuntáiste eacnamaíoch nó sóisialta;
forbairt oideachasúil daoine atá faoi mhíbhuntáiste oideachasúil; nó
daoine faoi mhíchumas.

Tábla Achomair um Plean Gníomhaíochta Chiste na gCuntas Díomhaoin

Tugtar achoimre sa tábla a leanas ar na bearta agus ar an maoiniú a leithdháileadh orthu faoi Phlean Gníomhaíochta 2026 ar gach Roinn Rialtais ábhartha. Tá na sonraí go léir le fáil sa Phlean Gníomhaíochta féin.

Príomh-Roinn/Gníomhaireacht	Uimh.	Cur Síos	Uas-Leithdháileadh
An Roinn Forbartha Tuaithe agus Pobail agus Gaeltachta	1	Beart Fiontair Shóisialta	2,000,000
	2	Scéim Rabhaidh do Sheanóirí	2,100,000
	3	Ionchuimsiú Sóisialta Spriocdhírithe	779,930
	4	Leabharlanna - Tionscnamh Scileanna Saoil	150,000
	5	Rethink Ireland	4,000,000
	6	An Polasaí Náisiúnta Daonchairdis 2024-2028	1,500,000
An Roinn Tithíochta, Rialtais Áitiúil agus Oidhreachta	7	Tithíocht ar dTús	3,000,000
An Roinn Tithíochta, Rialtais Áitiúil agus Oidhreachta	8	Lóistín do Bhaill an Lucht Siúil	620,000
An Roinn Dlí agus Cirt, Gnóthaí Baile agus Imirce	9	Seirbhísí Ceartais d’Óige agus Pobail	3,000,000
	10	Eagraíochtaí Pobail – Earnáil an Cheartais Choiriúil	300,000
	11	Bearta chun tacú le daoine óga atá ag fágáil géibhinn nó coimeádta.	521,000
	12	Maoiniú do Bhaile Formaid agus Gort na Silíní	480,000
	13	Sláinte Pobal-Bhunaithe sa Chóras Dlí agus Cirt	455,648
	14	Acmhainní chun eolas a dhéanamh agus tacaíocht a thabhairt do pháistí agus dóibh siúd le constaicí litearthachta nó teanga chun próisis ceartais teaghlaigh a láimhseáil	720,000
	15	Piarmheantóireacht – Earnáil an Cheartais Choiriúil	360,000
	16	Obair choisctheach agus chosanta Cuan faoin Tríú Straitéis Náisiúnta maidir le Foréigean Baile, Gnéasach agus Inscnebhunaithe	1,500,000
	17	Ballymun Implementation Board (BIB)	200,000
An Roinn Coimirce Sóisialaí	18	Beart um Chúramóirí Teaghlaigh - Tacaíocht do Chúramóirí Teaghlaigh lena n-áirítear Cúramóirí Óga & Iar-Chúramóirí chun rochtain a fháil ar thacaíochtaí fostaíochta agus/nó oiliúna agus oideachais	1,000,000
An Roinn Leanaí, Míchumais agus Comhionannais	19	Tacaíocht Chúraim do Dhaoine Leochaileacha sa Phobal	1,720,000
	20	Tionscnaimh Oiliúna Champas Coinneála Bhaile an Oibricigh	285,000
	21	Tionscnaimh Phobail don Lucht Siúil agus/nó Romaigh	1,344,000
	22	Tionscnaimh Óige agus/nó Teaghlaigh	1,413,900
	23	Tionscnamh Feasachta Míchumais	736,380
An Roinn Oideachais agus Óige	24	Clár Píolótach d’fhoghlaimeoirí RSO [riachtanais speisialta oideachais] i mbun aistrithe	400,000
	25	Network for Teaching Entrepreneurship (NFTE)	300,000
	26	Nuálaithe Sóisialta Óga	120,000
	27	Time To Count	20,000
	28	Experience Glasnevin	30,000
	29	The B!G Idea	136,000
	30	Rolladh amach suímh City Connects in Oirthuaisceart na Cathrach	700,000
	31	Saibhriú- Foghlaimeoirí le hardchumas a chumasú	150,000
	32	Foróige - Clár Ceannaireacht don Saol	270,000
	33	Ionad Pobail San Aignéas um Cheol agus na hEalaíona	45,000
	34	Anseo – Uirlis Tinrimh Inghníomhaithe do Scoileanna	544,346
	35	I dTreo an Ionchuimsithe	150,000
	36	Foróige – Clár Oibre Digiteach don Aos Óg	150,203
	37	Foróige – Clár Sábháilteachta ar Líne	160,267
	38	Tacú le páistí agus daoine óga trí CLG	100,000
	39	Tionscadal Health Alliance for Practice-based Professional Education and Engagement (HAPPEE)	130,000
	40	Cuairteanna baile chun tacú le haistrithe chun bunscoileanna - DEIS Plus	100,000
	41	Bord Oideachais agus Oiliúna Átha Cliath agus Dhún Laoghaire (DDLETB)	405,000
	42	Comhairle Náisiúnta Óige na hÉireann – Tionscadal Skills Summary	110,000
	43	Díriú ar mhíbhuntáiste oideachasúil i measc páistí agus daoine óga ó phobail an Lucht Siúil agus na Romach	47,500
	44	Tinreamh, rannpháirtíocht agus coinneáil scoile a chur chun cinn	371,143
An Roinn Cosanta	45	Flít Feithiclí agus Bád Cosanta Sibhialta a Uasghrádú	400,000
An Roinn Cosanta	46	Maoiniú ó Chuntais Dhíomhaoine do Chumainn Iarshaighdiúirí	200,000
	47	Sail Training Ireland	50,000
An Roinn Cultúir, Cumarsáide agus Spóirt	48	Moil Phobail Spóirt agus Gníomhaíochta Fisiciúla	1,354,000
	49	Mol Náisiúnta Oideachais agus Traenála Spóirt	1,950,000
	50	Bearta Spóirt do Phobail faoi Mhíbhuntáiste chun tacú leis an Phlean Náisiúnta um Ghníomhaíocht Choirp	6,696,000
An Roinn Breisoideachais agus Ardoideachais, Taighde, Nuálaíochta agus Eolaíochta	51	Clár Dreasachta Printíseachtaí don Lucht Siúil agus Clár Dreasachta Printíseachtaí dóibh siúd atá ag Fágáil Cúraim	360,000
	52	Sparánacht Lóistín Mac Léinn do Phobail an Lucht Siúil agus na Romach, agus dóibh siúd atá ag Fágáil Cúraim	500,000
	53	Tacaíochtaí airgeadais d’fhoghlaimeoirí ar Chlár Chéim Threasach P-TECH DABs	602,500
An Roinn Fiontar, Turasóireachta agus Fostaíochta	54	Balance for Better Business	243,512
An Roinn Sláinte	55	Rochtain ar sheirbhísí cúraim sláinte a fheabhsú do phobal na Romach in gach ceann de sé réigiún sláinte an FSS	860,000
An Roinn Sláinte	56	Foireann Scoile Ildisciplíneach Bhaile Munna	1,125,000
IOMLÁN:			€46,966,329

Plean Gníomhaíochta Chiste na gCuntas Díomhaoin 2026 foilsithe ag an Aire Buttimer

Nótaí d’Eagarthóirí

Cuid den

Conas mar a bhí d’eispéireas ar an leathanach reatha? (ag teastáil)

Plean Gníomhaíochta Chiste na gCuntas Díomhaoin 2026 foilsithe ag an Aire Buttimer

Nótaí d’Eagarthóirí

Cuid den

Conas mar a bhí d’eispéireas ar an leathanach reatha? * (ag teastáil)

Conas mar a bhí d’eispéireas ar an leathanach reatha? (ag teastáil)