Fógraíonn an tAire Calleary €12.3 mhilliún do 206 thionscadal faoi CLÁR 2025
- Foilsithe: 28 Samhain 2025
- An t-eolas is déanaí: 28 Samhain 2025
- Infheistíocht i gclubanna spóirt agus in áiseanna pobail ar fud na tíre
- Maoiniú do chlóis súgartha, páirceanna astroturf, rianta siúil, seastáin lucht féachana agus uasghráduithe ar ionaid phobail
- Maoiniú sonrach do cheantair na Gaeltachta agus na hoileáin
Inniu, (Dé hAoine, an 28 Samhain 2025), d’fhógair an tAire Forbartha Tuaithe agus Pobail agus Gaeltachta, Dara Calleary TD €12.3 mhilliún le linn cuairte ar chlub sacair Kiltimagh Knock United i gContae Mhaigh Eo chun 206 thionscadal pobail a sheachadadh faoi CLÁR 2025. Gheobhaidh Kiltimagh Knock United beagán níos mó ná €50,000 le haghaidh seastán lucht féachana nua 2 bhá.
I measc na dtionscadal eile atá á maoiniú tá:
- Contae an Chláir – Baile an Droichid: Maoiniú €100,000 le haghaidh tógáil páirc nua astroturf i gclub peile an Droichid agus scoil náisiúnta Bhaile an Droichid.
- Contae Chorcaí – Áth Trasna: Maoiniú €100,000 do Spórt & Fóillíocht Áth Trasna chun an cosán i gCoill an Oileáin a athdhromchlú.
- Contae na Gaillimhe – Inis Meáin: Maoiniú €49,808 do Chomhlacht Forbartha Inis Meáin chun clós súgartha a fhorbairt ag ionad pobail Inis Meáin.
- Contae Mhaigh Eo – Cliara: Maoiniú €22,958 chun gineadóir a sholáthar d’Ionad Pobail Chliara.
- Contae Liatroma – Droim Seanbhó – Maoiniú €99,671 le haghaidh oibreacha feabhsúcháin ar ionad cuairteoirí Shliabh an Iarainn.
- Contae Mhuineacháin – Cluain Eois: Maoiniú €100,000 do ghiomnáisiam pobail agus seastán lucht féachana ag club peile Choirrín.
- Contae Shligigh – Baile an Tóchair: Maoiniú €100,000 le haghaidh athchóiriú an chlóis súgartha pobail.
- Contae Chill Mhantáin – Tigh na hÉille: Maoiniú €100,000 chun giomnáisiam pobail nua a fhorbairt i mBaile Mhánais.
Ag labhairt inniu, dúirt an tAire Calleary:
“Soláthraítear tacaíocht ríthábhachtach i gcuid dár gceantair thuaithe is iargúlta faoi CLÁR. Cabhraíonn na tionscadail seo le pobail láidre acmhainneacha agus bríomhara a thógáil trí fheabhsú a dhéanamh ar áiseanna pobail atá ann cheana féin agus trí áiseanna nua a sholáthar chun tacú le hidir óg agus aosta ar fud raon seirbhísí.
“Le fógra an lae inniu de níos mó ná €12 mhilliún, cuirfear 206 thionscadal i gcrích i bpobail ar fud na tíre agus ar na hoileáin amach ón gcósta. Bhí áthas ar leith orm foráil shonrach a chur san áireamh i mbliana do thionscadail i gceantair na Gaeltachta. Gan amhras, cuirfidh na tionscadail seo go mór leis na pobail seo agus na daoine a thugann cuairt orthu.
“Le fógra an lae inniu, leithdháil mé €14 mhilliún ar an iomlán i mbliana ar thionscadail faoi CLÁR – an leithdháileadh is airde ó athbhunaíodh an scéim in 2016. Leanann an maoiniú ag fás de réir mar a fheicimid an tionchar ollmhór atá ag an maoiniú seo ar cheantair na tuaithe.”
Tá sonraí na 206 thionscadal a fógraíodh inniu ar fáil anseo. Tá an maoiniú a fógraíodh inniu i leith Beart 1: Forbairt Áiseanna agus Saoráidí Pobail & Beart 3: Ár nOileáin Bheo. Fógraíodh maoiniú faoi Bheart 2 ní ba luaithe sa bhliain.
Nótaí don Eagarthóir:
CLÁR 2025
Is clár infheistíochta spriocdhírithe é CLÁR (Ceantair Laga Ard-Riachtanais) a bhfuil sé mar aidhm aige maoiniú a sholáthar do thionscadail bheaga bonneagair i gceantair thuaithe ina bhfuil leibhéil shuntasacha meathlaithe daonra.
Athosclaíodh an Scéim in 2016 chun tacú le forbairt ceantair thuaithe iargúlta trí thionscadail chaipitil ar scála beag lena mbaineann comhoibriú idir údaráis áitiúla agus pobail, chomh maith le heagraíochtaí pobail eile.
Dirítear ar chodanna de na contaetha seo a leanas faoi CLÁR: Ceatharlach, an Cabhán, an Clár, Corcaigh, Dún na nGall, Gaillimh, Ciarraí, Cill Chainnigh, Laois, Luimneach, Longfort, Lú, Maigh Eo, an Mhí, Muineachán, Uíbh Fhailí, Ros Comáin, Sligeach, Tiobraid Árann, Port Láirge, an Iarmhí, Cill Mhantáin agus Contae Liatroma ar fad.
Tá léarscáil náisiúnta de cheantair CLÁR, mar aon le léarscáileanna contae aonair, ar fáil: anseo
Is iad seo a leanas na bearta atá á maoiniú faoi CLÁR 2025:
- Beart 1: Forbairt Áiseanna agus Saoráidí Pobail (iarratais trí údaráis áitiúla)
- Beart 2: Soghluaisteacht, Cúram Ailse, Céad Fhreagróir Pobail agus Iompar Béilí ar Rothaí (iarratais dhíreacha chuig an RFTPG)
- Beart 3: 'Ár nOileáin Bheo' (iarratais dhíreacha chuig an RFTPG)