Fógraíonn an tAire Calleary €26 mhilliún do bhreis is 100 tionscadal ar fud na tíre faoin Scéim Athnuachana Bailte agus Sráidbhailte
- Foilsithe: 22 Nollaig 2025
- An t-eolas is déanaí: 22 Nollaig 2025
- Fógraíodh maoiniú do thionscadail chun athnuachan eacnamaíoch agus sóisialta agus acmhainneacht lár na mbailte a spreagadh
- Díriú ar dhul i ngleic le foirgnimh thréigthe chun níos mó daoine a mhealladh chuig lár na mbailte
- Maoiniú do na costais réamhfhorbartha a bhaineann le tionscadail chun cabhrú le pobail iarratais a fhorbairt do ghlaonna maoinithe amach anseo
Inniu (Dé Luain, 22 Nollaig 2025) d’fhógair an tAire Forbartha Tuaithe agus Pobail agus Gaeltachta, Dara Calleary TD, maoiniú níos mó ná €26 mhilliún do 116 thionscadal i bpobail thuaithe ar fud na tíre.
Déanfar an maoiniú, faoin Scéim Athnuachana Bailte agus Sráidbhailte, a infheistiú i dtionscadail a athnuachanóidh lár na mbailte, a thiomáinfidh fás eacnamaíoch agus líon na ndaoine i mbailte, a rachaidh i ngleic le foirgnimh thréighthe, a fhorbróidh criosanna coisithe agus spásanna lasmuigh agus a threiseoidh turasóireacht faoin tuath in Éirinn.
Tá an Scéim ar cheann de na córais mhaoinithe ríthábhachtacha do cheantar tuaithe na hÉireann agus bhí na buntáistí soiléir nuair a d’oscail an tAire Áis Óige Pobail Theach na Canála i mBéal an Mhuirthead, Contae Mhaigh Eo, go hoifigiúil Dé hAoine seo caite. Cuirfidh an tionscadal, a fuair maoiniú €500,000 faoin Scéim Athnuachana Baile agus Sráidbhaile 2022, ionad ar fáil do ghníomhaíochtaí óige atá de dhíth go géar i gceantar Iorrais.
I measc samplaí de thionscadail a fuair ceadú maoinithe inniu tá:
- €500,000 le haghaidh athchóiriú agus síneadh halla pobail ó na 1940idí ina amharclann, ionad ealaíon agus spás margaidh i mBaile Uí Bheoláin, an Clár
- €500,000 le haghaidh athchóiriú an Bhloc Príosúin folamh trí stór chun eispéireas cuairteoirí a sholáthar sa Cheathrú Stairiúil agus Cultúir san Aonach, Tiobraid Árann
- €500,000 chun athchóiriú a dhéanamh ar dhá fhoirgneamh fholmha i gCafé agus Siopa Pobail sa Ghleann Mór, Cill Chainnigh.
- €500,000 chun seanleabharlann Shuí an Róin in Uíbh Fhailí a athfhorbairt ina spás pobail ilfheidhmeach nua-aimseartha
- €300,000 le hathchóiriú ar Mhúseum Chorca Dhuibhne agus ionad pobail i gceantar Gaeltachta Bhaile an Fheirtéaraigh
- €300,000 le haghaidh athghiniúint Chearnóg an Mhargaidh i mBaile na Cille, Laois
- €300,000 le haghaidh tógáil clós súgartha i gCollan, Lú
Tá liosta iomlán de na tionscadail ar éirigh leo ar fáil anseo
Agus é ag fógairt an mhaoinithe do na 116 thionscadal, dúirt an tAire Calleary:
“Tá áthas orm na tionscadail rathúla a roghnaíodh as iarratais chuig Scéim Athnuachana Bailte agus Sráidbhailte 2025 a fhógairt. Tá tionchar thar a bheith dearfach ag an Scéim i gcónaí ar bhailte agus sráidbhailte tuaithe na hÉireann agus neartóidh an infheistíocht seo an obair seo tuilleadh.
“In 2025, leanfaimid orainn ag cur leibhéil infheistíochta i dtuath na hÉireann i bhfeidhm nach bhfacthas riamh cheana – ag déanamh ár mbailte agus ár sráidbhailte níos fearr le maireachtáil iontu, le hoibriú iontu, le teaghlach a thógáil agus le gnó a reáchtáil iontu. Deimhnítear i bhfógra an lae inniu ár dtiomantas láidir chun tacú lenár bpobail thuaithe go heacnamaíoch agus go sóisialta araon.”
Ar an dara dul síos, dúirt an tAire:
"Tá ardleibhéal spéise sa scéim Athnuachana Bailte agus Sráidbhailte agus is ar ardchaighdeán i gcónaí a bhíonn na hiarratais a chuireann ár n-údaráis áitiúla chun cinn tar éis a rannpháirtíochta le pobail. Is rud dearfach é a thabhairt faoi deara go bhfuil líon na dtionscadal atá ag teacht chun cinn ag fás ó bhailte atá gníomhach i bpróiseas chun tosaíocht a thabhairt do lár an bhaile. Tá na bailte seo ag obair lena nOifigigh Athnuachana Baile chun a bpobail a fhorbairt agus a fheabhsú. Déanaim comhghairdeas le gach duine ar éirigh leo.”
Le fógra an lae inniu, meastar gur éirigh le 77 thionscadal maoiniú €24.4 mhilliún a fháil faoin bpríomhscéim. Ina theannta sin, tá €1.85 mhilliún á sholáthar do 39 dtionscadal faoin mBeart Forbartha Tionscadal. Tacaíonn an beart seo le húdaráis áitiúla sraith tionscadal a fhorbairt agus soláthraítear maoiniú ann i dtreo na gcostas chun tionscadail a thabhairt go dtí an pointe ina bhfuil siad réidh le húsáid.