Fógraíonn an tAire Calleary ceapadh triúr comhaltaí nua boird ar bhord Pobail
- Foilsithe: 30 Meán Fómhair 2025
- An t-eolas is déanaí: 30 Meán Fómhair 2025
Inniu (Dé Máirt, an 30 Meán Fómhair 2025) fuair an tAire Forbartha Tuaithe agus Pobail agus Gaeltachta, Dara Calleary TD, cead ón rialtas chun triúr comhaltaí
nua a cheapadh ar bhord Pobail.
Is eagraíocht neamhbhrabúis í Pobal a oibríonn thar ceann an Rialtais chun tacú
le pobail agus le gníomhaireachtaí áitiúla i dtreo cuimsiú sóisialta agus forbairt
a bhaint amach.
D’fhógair an tAire Calleary ceapadh an Uasail Paul Rogers, an Uasail Vincent Keenan agus an Uasail Michael Heaney mar ghnáthchomhaltaí ar bhord Pobail. Roghnaíodh na comhaltaí boird don ról seo tar éis próiseas ceapacháin de chuid
na mBord Stáit, atá á bhainistiú ag an tSeirbhís um Cheapacháin Phoiblí.
Le ceapadh an lae inniu, tá sé chomhalta déag ar an mbord anois, ar a bhfuil ochtar fear agus ochtar ban.
Ag déanamh an fhógra, dúirt an tAire Calleary:
“Oibríonn Pobal thar ceann an Rialtais agus cuireann siad tacaíocht ar fáil do roinnt ranna rialtais trí éagsúlacht clár a bhainistiú agus a mhaoirsiú a chuidíonn le pobail agus le gníomhaireachtaí áitiúla ina gcuid oibre chun cuimsiú sóisialta a bhaint amach agus forbairt phobail a thacú.
“Gabhaim buíochas le gach duine a chaith an t-am ar iarratas a dhéanamh chun suí ar bhord Pobail. Tá áthas orm fáilte a chur roimh cheapadh triúr comhaltaí nua boird a thugann réimse taithí agus saineolais leo ina ról.
“Gabhaim buíochas freisin leis na comhaltaí boird atá ag imeacht as a ndíograis agus a dtiomantas. Guím gach rath orthu amach anseo.
“Níl aon amhras orm ach go leanfaidh bord Pobail ag cur go luachmhar le pobail ar fud na tíre.”
Nótaí don eagarthóir
- Oibríonn Pobal i réimsí an chuimsithe shóisialta, cúram agus oideachas luath-óige, forbairt áitiúil agus pobail, síochána agus athmhuintearais, comhionannais, tacaíochtaí don mhargadh saothair, agus oideachais agus oiliúna. I measc roinnt de na grúpaí a fhaigheann tacaíocht ón Rialtas trí Phobal tá daoine atá dífhostaithe go fadtéarmach, daoine óga, feirmeoirí/iascairí, teaghlaigh, an Lucht Siúil, daoine níos sine agus iar-phríosúnaigh.
- Is féidir tuilleadh eolais faoi Phobal a fháil ar https://www.pobal.ie/