Tugann an tAire Calleary cuairt ar chontae Longfoirt le haghaidh imeachtaí áineasa faoin aer i mBaile Uí Mhatháin agus Mainistir Shruthla
- Foilsithe: 21 Bealtaine 2026
- An t-eolas is déanaí: 21 Bealtaine 2026
Inniu (Déardaoin, an 21 Bealtaine 2026) thug an tAire Forbartha Tuaithe agus Pobail agus Gaeltachta, Dara Calleary TD, cuairt ar chontae an Longfoirt chun cosán a oscailt i mBaile Uí Mhatháin agus chun Plean Áineasa Allamuigh Chontae Longfoirt a sheoladh i Mainistir Shruthla.
Mhaoinigh an Roinn an cosán, atá suite ar thailte Pháirc an Athar Leo Casey, áit a bhfuil CLG Bhaile Uí Mhatháin lonnaithe, trí CLÁR. Chomh maith le cosán poiblí, áiríodh leis an tionscadal plandáil crainn dhúchasacha, toir agus fálta sceach a chabhróidh le bithéagsúlacht sa cheantar.
Ag labhairt i mBaile Uí Mhatháin, dúirt an tAire:
“Tá gníomhaíocht choirp ríthábhachtach dár bhfolláine agus cuirfidh an cosán seo anseo timpeall Pháirc an Athar Leo Casey spás sábháilte agus inrochtana ar fáil do mhuintir Bhaile Uí Mhatháin agus níos faide anonn chun dul amach agus a bheith gníomhach. Fuair an tionscadal seo, atá oscailte do chách, beagnach €45,000 faoi CLÁR mo Roinnse. Is sampla iontach é seo de na rudaí is féidir a bhaint amach nuair a oibríonn gach earnáil den phobal le chéile mar mheitheal.”
Ar an dara dul síos, dúirt an tAire:
“Bhí áthas orm CLÁR 2026 a sheoladh i mí an Mhárta le leithdháileadh €12 milliún thar thrí bheart, an méid ba mhó riamh. Táim ag tnúth go mór le fógairt na dtionscadal ar éirigh leo níos déanaí i mbliana agus gan amhras beidh níos mó dea-scéala sna fógraí sin do chontae an Longfoirt.”
Níos déanaí i Mainistir Shruthla, sheol an tAire Calleary Plean Áineasa Allamuigh Chontae Longfoirt a d’fhorbair Coiste Áineasa Allamuigh Chontae Longfoirt tar éis dul i gcomhairle le páirtithe leasmhara tábhachtacha caitheamh aimsire faoin aer sa chontae.
Ag labhairt ag an seoladh, dúirt an tAire:
“Bhí áthas orm maoiniú a chur ar fáil tríd an Roinn Forbartha Tuaithe agus Pobail agus Gaeltachta chun tacú le forbairt Phlean Áineasa Allamuigh Chontae an Longfoirt. Soláthraíonn sé seo creat comhordaithe, uile-chontae chun forbairt caitheamh aimsire lasmuigh i Longfort a bhainistiú amach anseo.
“Is contae é an Longfort a bhfuil acmhainneacht den scoth aige. Tá rochtain ar uisce, ar thalamh portaigh agus ar fhoraoiseacht. Tógfaidh an plean seo ar bhealach inbhuanaithe chun rochtain ar an aer úr a dhéanamh níos inrochtana agus níos fáiltiúla ionas gur féidir leis an bpobal ar fad leas a bhaint as na buntáistí sláinte agus folláine a thagann as a bheith gníomhach amuigh faoin aer.
“Molaim Coiste Caitheamh Aimsire Allamuigh an Longfoirt as ucht labhairt le páirtithe leasmhara ar fud an chontae chun an plean seo a fhorbairt do mhuintir an Longfoirt. Gan a gcomhoibriú agus a ndúthracht, ní bheimis anseo inniu.”