Togra píolótach ‘Gael-Iomána’ seolta ag an Aire Dara Calleary i nGaeltacht Mhaigh Eo
- Foilsithe: 28 Samhain 2025
- An t-eolas is déanaí: 28 Samhain 2025
Is togra píolótach 3 bliana é seo cómhaoinithe ag Roinn na Gaeltachta do lucht na hidirbhliana in Iarbhunscoileanna Gaeltachta i Maigh Eo.
Ceadaíodh deontas suas le €108,075 thar tréimhse 3 bliana do Bhord Oideachais & Oiliúna Mhaigh Eo, Shligigh & Liatroma anuraidh. Baineann an deontas le togra píolótach dar teideal Gael-Iomána a reáchtáil do dhaltaí idirbhliana in iar-bhunscoileanna Gaeltachta i Maigh Eo. D’fhógair Dara Calleary, An tAire Forbartha Tuaithe agus Pobail agus Gaeltachta inniu go bhfuil síneadh bliana curtha leis an deontas sin agus é ag seoladh an togra go hoifigiúil san Ionad Barr Feabhais i mBéacán. Cuirfear clár foghlama Gaeilge ar fáil do na rannpháirtithe ina mbeidh Scileanna Múineadh Iomána, TEG Gaeilge B2, Léargas ar Bhia Folláin agus Taithí Oibre mar chuid de.
Agus é ag seoladh an togra inniu, dúirt an tAire Calleary:
“Tá nasc láidir idir an spórt agus an Ghaeilge d’óige na Gaeltachta agus tá sé aitheanta mar bheart lárnach sa phróiseas pleanála teanga. Tá mé cinnte go gcuideoidh an togra nuálach seo agus an tacaíocht mhaoinithe ó mo Roinn leis an iarracht deiseanna úsáide agus leanúnachas a chruthú do dhaoine óga chun gur féidir leo an Ghaeilge a úsáid laistigh agus lasmuigh den chóras oideachais. Is sampla den scoth é an togra seo den chomhoibriú pobail idir Chumainn Iománaíochta, Iar-bhunscoileanna Gaeltachta agus an Bord Oideachais & Oiliúna ag teacht le chéile chun togra a dhearadh agus tá áthas orm tacú leis”.
Nóta d’Eagarthóirí
Tá an maoiniú seo ceadaithe faoi Chlár Tacaíochtaí Pobail agus Teanga agus tá níos mó eolais fán chlár sin ar fáil ag gov.ie - An Clár Tacaíochtaí Pobail agus Teanga (www.gov.ie)