Tá na hAirí Calleary agus Buttimer ag tnúth le fáilte a chur roimh chuairteoirí chuig an gComórtas Náisiúnta Treabhadóireachta 2025
- Foilsithe: 9 Meán Fómhair 2025
- An t-eolas is déanaí: 9 Meán Fómhair 2025
- Béim ar thacaíocht do phobail agus ar fhás na Gaeilge
- Taispeántas na Roinne lena n-áirítear taispeántais ríomhaireachta agus róbataice
- Túr dreapadóireachta 8 méadar do chuairteoirí chun scileanna a thriail
Leagfar béim ar thionchar dearfach na hinfheistíochta i gceantair thuaithe, acmhainneacht an phobail agus díograis athnuaite don Ghaeilge ag Comórtas Náisiúnta Treabhadóireachta na bliana seo, a bheidh ar siúl i Screagán, Co. Uíbh Fhailí, ón 16 go dtí an 18 Meán Fómhair.
Is féidir le cuairteoirí ar thaispeántas na Roinne Forbartha Tuaithe agus Pobail agus na Gaeltachta, ‘Ár dTodhchaí Tuaithe - Ag Tacú le Pobail agus lenár dTeanga’, leabhair a fháil ar iasacht ón leabharlann shoghluaiste, páirt a ghlacadh i gceardlanna códaithe, a fháil amach conas a fuair bailte a n-ainmneacha oifigiúla Gaeilge, ACS tarrthála beatha a fhoghlaim, a gcuid scileanna a chleachtadh ar an mballa dreapadóireachta 8 méadar faoin aer agus go leor eile.
Ag labhairt faoi thaispeántas a Roinne ag an gComórtas Náisiúnta Treabhadóireachta, dúirt an tAire Calleary:
“Tá an oiread sin rudaí le déanamh agus le feiceáil ag an gComórtas Náisiúnta Treabhadóireachta agus tá taispeántas spreagúil againn i mbliana.
“Is deis iontach é an ócáid do dhaoine a fháil amach conas is féidir leo páirt a ghlacadh ina bpobal nó faoi na cláir infheistíochta agus maoinithe iomadúla a sheachadann mo Roinnse chun tacú le ceantair thuaithe.
“Táim ag tnúth le fáilte a chur roimh chuairteoirí chuig ár bpuball agus cuairt a thabhairt ar go leor de na seastáin eile sa spás taispeántais. Is deis iontach dúinn an Comórtas Treabhadóireachta chun ceiliúradh a dhéanamh ar cheantair thuaithe na hÉireann.”
Dúirt an tAire Stáit le freagracht speisialta as Forbairt Pobail agus Carthanachtaí, Jerry Buttimer T.D.:
“Is deis thábhachtach í láithreacht na Roinne ag an gComórtas Náisiúnta Treabhadóireachta d’airí agus d’oifigigh labhairt leo siúd a bhfuil suim acu i bhforbairt pobail agus i gcúrsaí tuaithe.
“Tá ról ríthábhachtach againn i dtacaíocht a thabhairt do gach pobal ar fud raon clár agus tionscnamh. Is deis iontach í an taispeántas ag an gComórtas Treabhadóireachta chun aird a tharraingt ar an obair sin agus chun éisteacht le moltaí maidir leis an mbealach is fearr is féidir linn leanúint de thacaíocht a thabhairt do cheantar tuaithe na hÉireann.”
Beidh na seastáin seo a leanas san áireamh i dtaispeántas ‘Ár dTodhchaí Tuaithe - Ag Tacú le Pobail agus lenár dTeanga’ (Bloc 3, Sraith 16, Seastán 312 - 314):
- Scéim Foláirimh do Sheanóirí
- Clár Seirbhísí Pobail
- Obair Dheonach agus Rannpháirtíocht an Phobail
- Maoiniú Pobail
- Sábháilteacht Uisce Éireann
- Maoiniú Bailte Slachtmhara agus Tuaithe
- Nascacht
- An Ghaeltacht / Logainmneacha
- LEADER
- Ag Glacadh le Saol na hÉireann faoin Aer
- Ár dTodhchaí Tuaithe
- Balla Dreapadóireachta (taispeántas seachtrach)
- Leabharlann Soghluaiste (taispeántas seachtrach)
Le haghaidh tuilleadh eolais, tabhair cuairt ar gov.ie/treabhdóireacht
Lean an Roinn le haghaidh nuashonruithe rialta faoin gComórtas Treabhadóireachta ar Twitter, Instagram, Facebook agus LinkedIn