Athbhreithniú um Beartas Tuaithe ar Éirinn 2026 foilsithe ag an ECFE
- Foilsithe: 18 Feabhra 2026
- An t-eolas is déanaí: 18 Feabhra 2026
- Athbhreithniú ECFE ar bheartas tuaithe chun eolas a dhéanamh d’fhorbairt bheartas nua Ár dTodhchaí Thuaithe
Tá an Eagraíocht um Chomhar agus Forbairt Eacnamaíoch (ECFE) i ndiaidh a céad Athbhreithniú um Beartas Tuaithe ar Éirinn a fhoilsiú.
Léirítear san athbhreithniú an cur chuige uile-rialtais ar leith atá á ghlacadh faoi bheartas Ár dTodhchaí Thuaithe de chuid na hÉireann, lena ndírítear aird mhéadaithe ar an tionchar atá á imirt ar cheantair thuaithe ag beartais agus cláir ar fud na ranna rialtais go léir, in éineacht leis an stádas shuntasach a tugadh do bheartas tuaithe le bunú na Roinne Forbartha Tuaithe agus Pobail agus Gaeltachta in 2017.
Taispeánadh in anailís an ECFE, in ainneoin go bhfuil an-acmhainn i gceantair thuaithe na hÉireann i réimsí cosúil le hearnálacha an gheilleagair ghlais, na turasóireachta agus an bhia, go bhfuil réimse dúshlán roimh cheantair thuaithe go fóill.
Agus sraith moltaí á cur ar fáil acu, díríonn an anailís ECFE ar na buntáistí a bhaineann le húsáid níos fearr a bhaint as intleacht tuaithe, le tacaíocht d’fhiontair thuaithe a leathnú agus le seachadadh seirbhísí bunriachtanacha a éascú i gceantair thuaithe.
Dúirt an tAire Calleary:
“Táim fíor-bhuíoch den ECFE as ucht a saineolas agus taithí leathan ag scrúdú beartais agus cleachtais forbartha tuaithe i measc a chuid ball.”
“Tá measúnú neamhspleách fiúntach ar bheartas tuaithe na hÉireann curtha ar fáil san athbhreithniú seo, a bheidh ina chúnamh dúinn chun eolas a dhéanamh d’fhorbairt ár mBeartas Forbartha Tuaithe nua – Ár dTodhchaí Thuaithe.
“Cúis áthais í domsa a thabhairt faoi deara go bhfuil aitheantas sa tuarascáil ar bhuntáistí ár gcur chuige uile-rialtais chun ár n-uaillmhianta do cheantair thuaithe na hÉireann a bhaint amach. Dár ndóigh, tá dúshláin romhainn go fóill agus muid ag iarraidh na huaillmhianta sin a bhaint amach ina n-iomlán, agus beidh an anailís mhionsonraithe a chuir an ECFE ar fáil ina cabhair dúinn ina leith seo.”
Nóta don Eagarthóir
Foilsíodh an t-athbhreithniú i ndiaidh beart cuimsitheach dhá-bhliana, inar tugadh roinnt cuairteanna misin ar Éirinn. Déanfar plé iomlán ar an athbhreithniú i gcomhthéacs na hoibre leanúnaí ar fhorbairt an bheartais nua Ár dTodhchaí Thuaithe don tréimhse 2026-2031.