Freastalaíonn an tAire Canney ar Chomhairle Iompair an AE i Lucsamburg roimh Uachtaránacht na hÉireann ar an AE
- Foilsithe: 9 Meitheamh 2026
- An t-eolas is déanaí: 9 Meitheamh 2026
D’fhreastail an tAire Stáit le freagracht as Iompar Idirnáisiúnta agus Bóthair, Lóistíocht, Iarnród agus Calafoirt, Seán Canney, ar chruinniú Chomhairle Iompair an AE i Lucsamburg inné (8 Meitheamh 2026), agus Éire ag ullmhú chun glacadh le hUachtaránacht Chomhairle an AE i gceann trí seachtaine.
Chuir an tAire Canney fáilte roimh cheadú na Comhairle ar Chonclúidí maidir le Straitéis Thionsclaíoch Mhuirí an AE agus Straitéis Calafoirt an AE. Tá sé mar aidhm ag an Straitéis Thionsclaíoch Mhuirí tionscail na déantúsaíochta muirí agus na loingseoireachta a chosaint agus a threisiú, a gcumas nuálaíochta a fheabhsú agus a n-iomaíochas a chosaint. Le Straitéis Calafoirt an AE, cuirfear feabhas suntasach ar iomaíochas, athléimneacht, slándáil agus inbhuanaitheacht chalafort na hEorpa.
I measc na n-ábhar eile ag an gComhairle Iompair bhí plé i measc Airí ar dhul chun cinn maidir leis an Rialachán atá beartaithe maidir le Feithiclí Corparáideacha Glana, agus malartú tuairimí maidir le Dícharbónú Iompair i ndiaidh 2030.
Ba é seo an cruinniú deireanach de Chomhairle Iompair faoi Uachtaránacht na Cipire, sula nglacfaidh Éire le hUachtaránacht Chomhairle an AE ó mhí Iúil go mí na Nollag 2026.
Chun deireadh a chur leis an seisiún Comhairle, chuir an tAire Canney, ina ról mar chathaoirleach nua, Clár Oibre Uachtaránacht na hÉireann i láthair, ina leagtar amach príomhthosaíochtaí na hÉireann i réimse an iompair.
Mar chuid d’ullmhúcháin na hÉireann don Uachtaránacht, bhí cruinnithe déthaobhacha ag an Aire Canney le comhghleacaithe ón tSeicia, ón Eastóin, ón bPolainn, ón tSualainn, ón Ostair, ón bhFionlainn agus ón Ungáir.
“Gabhaim comhghairdeas leis an Aire Vafeades, leis an Aire Hadjimanolis agus le hUachtaránacht na Cipire ina hiomláine as a gcuid oibre mar chathaoirleach ar an gComhairle agus as tosaíochtaí iompair a chur chun cinn le sé mhí anuas. Tá Éire ag tnúth le glacadh le hUachtaránacht an AE ar 1 Iúil agus leanúint leis an dea-obair atá á déanamh ag an gCipir ar shaincheisteanna tábhachtacha.”
“Tá na cruinnithe déthaobhacha a bhí againn le linn na Comhairle tábhachtach chun caidrimh le mo chomhghleacaithe Aireachta ar fud na hEorpa a neartú. Cuidíonn siad freisin le hÉirinn ár n-ullmhacht a choinneáil chun glacadh le hUachtaránacht na Comhairle, áit a n-oibreoimid i gcomhar le gach comhghleacaí san AE chun clár oibre iompair a chur chun cinn a thacaíonn le nascacht, iomaíochas agus aistriú glan agus a chuireann le leasa shaoránaigh an AE.”
An tAire Stáit Canney