Síníonn an tAire Canney reachtaíocht a chuireann riachtanas ar thiománaithe faoi oiliúint tástáil tiomána a dhéanamh faoi cheann ceithre bliana
- Foilsithe: 5 Samhain 2025
- An t-eolas is déanaí: 5 Samhain 2025
Shínigh an tAire Stáit le freagracht as Sábháilteacht ar Bhóithre, Seán Canney, reachtaíocht inniu lena chinntiú nach féidir le tiománaithe foghlaimeora a gceadúnais foghlaimeora a athnuachan arís agus arís eile gan tástáil tiomána a dhéanamh.
Leis an reachtaíocht seo, leasaítear na Rialacháin um Thrácht ar Bhóithre (Ceadúnú Tiománaithe) (I.R. 537 de 2006). Tiocfaidh sé i bhfeidhm an 1 Samhain 2026.
Ón dáta sin ar aghaidh, beidh ar thiománaithe faoi oiliúint a bhfuil ceadúnas acu i gcatagóir A, A1, A2, AM, B nó W ar feadh ceithre bliana, tástáil tiomána phraiticiúil a dhéanamh sula ndéanfaidh siad a gceadúnas a athnuachan. Faoi láthair, is féidir le foghlaimeoirí a gceadúnais a athnuachan arís agus arís eile má tá tástáil tiomána curtha in áirithe nó sceidealaithe acu.
Ina theannta sin, beidh ar fhoghlaimeoirí a bhfuil ceadúnas foghlaimeora acu ar feadh seacht mbliana tosú ar an bpróiseas foghlama tiomána arís. I gcás foghlaimeoirí i gcatagóir B, is éard atá sa phróiseas seo ná tástáil teoirice, ceadúnas foghlaimeora a fháil, 12 cheacht Oiliúna Tiomána Riachtanaí a dhéanamh, agus tástáil phraiticiúil a dhéanamh.
Léiríonn sonraí ón Údarás um Shábháilteacht ar Bhóithre i gcás beagnach duine as gach cúigear a bhfuil ceadúnas foghlaimeora de chatagóir B acu, go ndearna siad a gceadúnais a athnuachan trí huaire nó níos mó. Níl tástáil tiomána déanta ag beagnach 60% den ghrúpa seo fós, tuairim is 38,000 duine.
“Is tosaíocht don Rialtas seo sábháilteacht ar bhóithre, agus tá sé ríthábhachtach a chinntiú go bhfuil oiliúint agus cáilíochtaí cuí ag gach tiománaí chun an sprioc seo a bhaint amach.
“Is é cuspóir na reachtaíochta seo foghlaimeoirí a spreagadh chun bheith ina dtiománaithe láncháilithe. Tá sé ríthábhachtach go gcríochnóidh tiománaithe foghlaimeora an próiseas foghlama, agus go gcuirfear ina n-aghaidh ceadúnais foghlaimeora a bheith acu gan tástáil tiomána a dhéanamh riamh.
“Tá sé ar cheann de raon gníomhartha a rinneadh faoin Straitéis um Shábháilteacht ar Bhóithre agus é mar aidhm acu líon na mbásanna agus na ngortuithe tromchúiseacha ar bhóithre a laghdú 50% faoi 2030, ag obair i dtreo sprioc deiridh Fhís Nialasach (gan aon bhásanna bóthair ná gortuithe tromchúiseacha) faoi 2050.”
An tAire Iompair Darragh O’Brien
“Is forbairt thábhachtach í an reachtaíocht seo chun sábháilteacht ar bhóithre a chur chun cinn agus leis sin comhlíonfar ceann de phríomhghníomhartha Chéim 2 de Phlean Gníomhaíochta na Straitéise um Shábháilteacht ar Bhóithre – deireadh a chur leis an gcleachtas trínar féidir tiománaithe faoi oiliúint ceadúnais foghlaimeora a chur ar athlá gan an riachtanas orthu tástáil a dhéanamh.
“Ní ceadúnas tiomána é ceadúnas foghlaimeora. Ceadaíonn sé do dhaoine tiomáint ar bhóithre poiblí nuair a bhíonn tiománaí cáilithe ina dteannta, chun an taithí is gá a fháil chun tiomáint go sábháilte. Go dtí go gcomhlíonann foghlaimeoir an caighdeán riachtanach agus éirí leis sa tástáil tiomána, ní féidir a mheas go bhfuil sé sábháilte dó tiomáint leis féin ar bhóithre poiblí. Tá sé ríthábhachtach an próiseas foghlama tiomána a chríochnú chun a chinntiú go bhfuil na scileanna agus an mhuinín ag tiománaithe chun tiomáint ar ár mbóithre.
“Is freagracht chomhroinnte í an tsábháilteacht ar bhóithre agus is tiomantas lárnach é a chinntiú go bhfuil gach tiománaí oilte agus cáilithe i gceart.”
An tAire Stáit atá freagrach as Sábháilteacht ar Bhóithre, Séan Canney