Cead an Rialtais faighte ag an Aire Iompaire chun aghaidh a thabhairt ar an Teorainn Paisinéirí in Aerfort Bhaile Átha Cliath
- Foilsithe: 10 Feabhra 2026
- An t-eolas is déanaí: 10 Feabhra 2026
Tá comhaontú faighte ag an Aire Iompair Darragh O’Brien inniu ón Rialtas maidir le dréachtú tosaíochta ar Bhille Aerfort Bhaile Átha Cliath (Teorainn Phaisinéirí) 2026. Tabharfaidh sé seo an chumhacht dó aghaidh a thabhairt ar an uasteorainn 32 milliún paisinéir ag Aerfort Bhaile Átha Cliath.
"Aithníonn an Rialtas seo an tábhacht straitéiseach atá ag Aerfort Bhaile Átha Cliath mar ár bpríomhgheata idirnáisiúnta agus an ról ríthábhachtach atá aige i dtaca le fás eacnamaíoch, nascacht agus poist ar fud an Stáit a chothú. Inniu, fuair mé comhaontú ón Rialtas maidir le foilsiú na Scéime Ginearálta, ina leagtar amach an cur chuige reachtach chun aghaidh a thabhairt ar an uasteorainn paisinéirí. Is ionann seo agus an chéad chéim choincréiteach i gcomhlíonadh an ghealltanais a leagtar amach i gClár an Rialtais. Beidh mé i mbun oibre anois le Comhchoiste Iompair an Oireachtais chun dul chun cinn a dhéanamh ar ghrinnscrúdú réamhreachtaíoch agus ar dhréachtú foirmiúil an Bhille."
An tAire O’Brien
Leis an Scéim Ghinearálta tugtar cumhacht don Aire Iompair ordú a dhéanamh chun an uasteorainn 32 milliún paisinéir ag Aerfort Bhaile Átha Cliath a leasú nó a tharraingt siar. Sula ndéanfar ordú, rachaidh an tAire i dteagmháil leis an gCoimisiún Pleanála a dhéanfaidh na measúnuithe cuí a theastaítear faoi dhlí an AE. Cuirfidh an tAire toradh na measúnuithe sin san áireamh agus ordú á dhéanamh aige. Leis an gcur chuige seo éascófar forbairt inbhuanaithe Aerfort Bhaile Átha Cliath trí chomhlíonadh dhlí infheidhme an AE a chinntiú, agus cothromaíocht á coinneáil idir cearta mhuintir na háite agus cuspóirí Bheartas Náisiúnta Eitlíochta na hÉireann mar aon leis na riachtanais ghnó agus turasóireachta.
I dtreocheangal leis an reachtaíocht atá á cur chun cinn ag an Aire, tá an “tIarratas Bonneagair” a chuir an DAA isteach ag dul tríd an gcóras pleanála. San iarratas seo lorgaítear cead chun an teorainn paisinéirí a ardú agus chun roinnt tionscadal a fhorbairt i dtaca le teorainn a mhéadú, lena n-áirítear céanna nua agus seastáin aerárthaí, mar aon le hIonad Iompair Chomhtháite nua. Le chéile, soláthraíonn na bearta seo an bonneagar atá riachtanach chun an méadú ar phaisinéirí a éascú.
Tá an tAire Ó Brien tiomanta Bille Aerfort Bhaile Átha Cliath (Teorainn Phaisinéirí) a dhréachtú mar thosaíocht agus tá sé beartaithe aige é a thabhairt isteach le dul tríd Tithe an Oireachtais a luaithe is féidir.