Athbhreithniú le déanamh ar an Acht um Míchumas, 20 bliain i bhfeidhm

Spreagann an tAire Foley agus an tAire Higgins daoine faoi mhíchumas, a dteaghlaigh, a gcúramóirí agus a ngrúpaí ionadaíocha chun páirt a ghlacadh i gcomhairliúchán poiblí

Sheol an tAire Leanaí, Míchumais agus Comhionannais, Norma Foley agus an tAire Stáit le freagracht as Míchumas, Emer Higgins, comhairliúchán poiblí inniu chun bonn eolais a chur faoin athbhreithniú ar an Acht um Míchumas 2005. Tugtar cuireadh do dhaoine faoi mhíchumas, dá dteaghlaigh, dá gcúramóirí agus dá ngrúpaí ionadaíocha páirt a ghlacadh chun a léargas, a dtaithí agus a saineolas a chur ar fáil mar chuid den phróiseas.

Tá sé níos mó ná 20 bliain ó tugadh an tAcht um Míchumas 2005 cothrom le dáta. Is é seo an chéad chéim i gcomhlíonadh an ghealltanais maidir le hathchóiriú a dhéanamh ar an Acht um Míchumas a rinneadh sa Straitéis Náisiúnta um Chearta an Duine do Dhaoine faoi Mhíchumas 2025-2030 agus i gClár an Rialtais.

Is reachtaíocht fhairsing é an tAcht um Míchumas a bhaineann le sainmhíniú an mhíchumais, an próiseas measúnaithe riachtanas, foirgnimh phoiblí inrochtana, dearadh uilíoch, úsáid sonraí géiniteacha, fostaíocht, agus rudaí eile nach iad.

Déanfar athbhreithniú ar an Acht i bhfianaise Choinbhinsiún na Náisiún Aontaithe ar Chearta Daoine faoi Mhíchumas. Áireofar san athbhreithniú freisin scrúdú ar ghealltanas Chlár an Rialtais straitéis uathachais a chur ar bhonn reachtach.

Dúirt an tAire Leanaí, Míchumais agus Comhionannais, Norma Foley:

‘20 bliain anuas, achtaíodh an tAcht um Míchumas 2005. Tá athrú suntasach tagtha ar shaol daoine faoi mhíchumas agus dá dteaghlaigh ó shin. Is deis thábhachtach é an t-athbhreithniú seo, a bhfuiltear ag súil leis le fada, chun feabhas a chur ar chaighdeán na beatha do dhaoine faoi mhíchumas, dá dteaghlaigh agus dá gcúramóirí.

‘Is gá athbhreithniú a dhéanamh ar an Acht um Míchumas, rud atá curtha in iúl go seasta ag daoine faoi mhíchumas, ag Eagraíochtaí Daoine faoi Mhíchumas, ag teaghlaigh, ag cúramóirí agus ag comhlachtaí ionadaíocha. Tá sé ríthábhachtach a chinntiú go mbeadh deis ag gach duine páirt a ghlacadh sa phróiseas seo ionas go ndéanfar riachtanais agus mianta daoine faoi mhíchumas amach anseo a mheas go hiomlán san Acht nuashonraithe.

Dúirt an tAire Stáit le Freagracht as Míchumas, Emer Higgins:

‘Aithníodh le fada an lá gur gá athbhreithniú a dhéanamh ar an Acht um Míchumas agus tá sé tábhachtach sa chéad chéim seo, is é sin an comhairliúchán poiblí, go n-áireofaí an oiread guthanna agus dearcthaí agus is féidir. Ní mór dúinn oibriú le chéile chun an t-athrú a chur i gcrích, agus machnamh a dhéanamh ar conas is féidir linn an reachtaíocht seo a fheabhsú ar mhaithe le daoine le míchumas. D’fhéadfadh moltaí maidir le hathruithe reachtacha, forbairt beartais nó glaonna ar phíosaí sonracha taighde a bheith mar thoradh ar an athbhreithniú sin.’

DEIREADH