Athcheapann an tAire O’Gorman Pat Rabbitte ina Chathaoirleach ar Tusla
- Foilsithe: 11 Eanáir 2024
- An t-eolas is déanaí: 12 Aibreán 2025
Tá an tAire Leanaí, Comhionannais, Míchumais, Lánpháirtíochta agus Óige, Roderic O’Gorman tar éis Pat Rabbitte a athcheapadh ina Chathaoirleach ar Tusla, an Ghníomhaireacht um Leanaí agus an Teaghlach. Is é seo an dara téarma a bheidh ag an Uasal Rabbitte agus trí chomhaontú idir an tUasal Rabbitte agus an tAire tiocfaidh deireadh leis tar éis dhá bhliain, an 30 Nollaig 2025. Ligeann sé seo do leanúnachas príomhphearsanra i struchtúr rialachais Tusla.
Tá an tUasal Rabbitte ina ionadaí poiblí le 30 bliain anuas, lena n-áirítear tréimhsí sa Rialtas mar Aire Cumarsáide, Fuinnimh agus Acmhainní Nádúrtha ó 2011 go 2014. Ceapadh an tUasal Rabbitte mar Chathaoirleach ar Bhord Tusla ón 31 Nollaig 2018 ar feadh téarma cúig bliana. Chuaigh a chéad téarma in éag ar an 31 Nollaig 2023. Leanfaidh sé, in éineacht leis an mBord, ag obair le POF agus Foireann Bainistíochta Feidhmiúcháin Tusla, chun clár athchóirithe na Gníomhaireachta a bhrú chun cinn atá ag athrú seachadadh seirbhíse, d’fhonn rochtain thráthúil agus chothrom a sholáthar ar sheirbhísí comhtháite, agus muinín an phobail a chothú agus tacaíocht a thabhairt don fhoireann.
Dúirt an tAire Ó Gormáin:
“Ba mhaith liom buíochas ó chroí a ghabháil le Pat as a sheirbhís go dtí seo, agus as a thoilteanas leanúint ar aghaidh mar Chathaoirleach an Bhoird. Chuidigh Pat le Tusla a stiúradh trí imeachtaí suaite suntasacha le déanaí ar nós na paindéime COVID-19 agus fáiltíonn sé roimh leanaí ón Úcráin a bhfuil cosaint an Stáit seo de dhíth orthu. Ba mhaith liom gach rath a ghuí air dá dhara téarma agus táim ag tnúth le bheith ag obair leis thar an dá bhliain atá romhainn.”
CRÍOCH
Nótaí don Eagarthóir:
- Sonraítear in alt 19(2) den Acht fán nGníomhaireacht um Leanaí agus an Teaghlach, 2013, go bhfuil comhalta den Bhord a bhfuil a théarma oifige in éag nó ar tí dul in éag, incháilithe lena athcheapadh ar an mBord, ach ní fhéadfaidh siad é a dhéanamh ar feadh níos mó ná 2 théarma as a chéile.
- Tar éis dul i gcomhairle leis an Aire, dheimhnigh an tUasal Rabbitte go raibh sé toilteanach an dara téarma a chaitheamh mar Chathaoirleach, ar feadh dhá bhliain. Tiocfaidh an dara téarma seo chun críche ar 30 Nollaig 2025.
- Iarradh agus fuarthas cead don athcheapachán seo ón Aire Caiteachais Phoiblí, Sheachadta PFN agus Athchóirithe, de réir Alt 19(2) den Acht.