Fógraíonn an tAire O’Gorman maoiniú do Thionscadail um Cheartas Aeráide don Aos Óg in 2024
- Foilsithe: 23 Iúil 2024
- An t-eolas is déanaí: 12 Aibreán 2025
- Cheadaigh an tAire O’Gorman maoiniú €457,861 do 10 dtionscadal chomhoibríocha óige nua
- Tacaíonn an Ciste um Cheartas Aeráide don Aos Óg le tionscnaimh faoi stiúir an aosa óig a bhaineann le ceartas aeráide ar leibhéal pobail, réigiúnach agus náisiúnta.
D’fhógair an tAire Leanaí, Comhionannais, Míchumais, Lánpháirtíochta agus Óige, Roderic O’Gorman, inniu go bhfuil €457,861 san iomlán tugtha d’eagraíochtaí deonacha óige in 2024 chun tacú le tionscadail faoi stiúir an aosa óig i réimse an cheartais aeráide.
Is é cuspóir an Chiste um Cheartas Aeráide don Aos Óg ná rannpháirtíocht daoine óga a chur chun cinn i ngníomhaíochtaí, i dtionscnaimh agus i gcláir a fhorbraíonn agus a thacaíonn lena n-eolas, lena gcumhacht agus lena gcumasú i ndáil le ceartas aeráide. Tugann fógra an lae inniu an t-iomlán a cuireadh ar fáil faoin scéim ó 2020 i leith go dtí beagnach €2.5 milliún.
Dúirt an tAire O’Gorman,
“Tá lúcháir orm a bheith in ann maoiniú a cheadú do réimse leathan tionscadal nuálach agus dinimiciúil faoi stiúir an aosa óig a thacaíonn le Ceartas Aeráide agus a chuireann chun cinn é. Tá mé i gcónaí an-tógtha le paisean agus tiomantas na ndaoine óga i ndáil leis an gceist seo, agus le tiomantas na ndaoine a chuidíonn leis na daoine óga seo roinnt tionscadal den scoth a chur ar fáil. Beidh sé iontach cloisteáil faoi thorthaí na ngníomhaíochtaí seo agus faoin gcaoi a ndéanann daoine óga, le cabhair ó roinnt eagraíochtaí iontacha, a ndícheall ár ndomhan a dhéanamh níos fearr”.
DEIREADH//
Nótaí d’Eagarthóirí:
Tá gach tionscadal a mhaoinítear faoin gCiste um Cheartas Aeráide don Aos Óg 2024 á stiúradh ag eagraíocht náisiúnta óige atá maoinithe faoi Scéim Deontais do Sheirbhísí Óige de chuid na Roinne Leanaí, Comhionannais, Míchumais, Lánpháirtíochta agus Óige.
Tá deontais á mbronnadh ar na ceithre iarratas ‘cuibhreannais’ seo a leanas:
- ECO-UNESCO (i gceannas) le Feachtas Óg-Ghluaiseacht Gaeilge, Club Gan Ainm, Young Irish Filmmakers agus Poppintree Youth Project
- Comhairle Náisiúnta na nÓg in Éirinn (i gceannas) le YMCA Ireland le Seirbhís Réigiúnach Óige Sféar 17, Gaisce – Gradam an Uachtaráin agus Concern Worldwide
- Localise Youth Volunteering (i gceannas) le hOideachas don Inbhuanaitheacht
Tá deontais á dtabhairt do na heagraíochtaí seo a leanas freisin:
• Foróige
• Voluntary Service International
• SpunOut
• Ógras
• Obair d’Ógra Éireann
• Youth Theatre Ireland
• Junior Chamber International Ireland
Leithdháiltí an Chiste um Cheartas Aeráide don Aos Óg 2024
| Eagraíocht | Leithdháileadh |
| €10,000 | |
| Eco-Unesco – Cé an Bhúrcaigh, Baile Átha Cliath 2 | €99,960 |
| Foróige – An Pháirc Thiar, Baile Átha Cliath | €49,916 |
| Localise – Glas Naíon, Baile Átha Cliath | €85,200 |
| NYCI – Sráid Montague, Baile Átha Cliath | €73,225 |
| Spunout – Sráid na Toinne, Baile Átha Cliath 2 | €38,220 |
| €16,210 | |
| Ógras – Sráid Fhearchair, Baile Átha Cliath | €25,880 |
| Obair d’Ógra Éireann – Rotunda, Baile Átha Cliath | € 49,250 |
| Youth Theatre Ireland – Rotunda, Baile Átha Cliath | €10,000 |
| Maoiniú Iomlán | €457,861 |