Infheistíocht de €2 Mhilliún chun Tacú le Leanaí agus Freagairtí Scoile d’Iompraíocht a Neartú
- Foilsithe: 8 Aibreán 2026
- An t-eolas is déanaí: 8 Aibreán 2026
D’fhógair an tAire Oideachais agus Óige, Hildegarde Naughton, infheistíocht de €2 mhilliún inniu chun oiliúint agus tacaíochtaí a leathnú do scoileanna atá ag freagairt d’iompraíochtaí ar díol imní iad, agus béim shoiléir ar thorthaí agus eispéiris leanaí a fheabhsú. Méadóidh na tacaíochtaí seo cumas scoileanna tacú le leanaí atá i nguais, ag tabhairt tosaíochta d’idirghabháil luath, díghéarú agus folláine, agus ag an am céanna ag cinntiú go bhfuil an fhoireann feistithe chun freagairt go sábháilte agus go cuí.
Tabharfar isteach tairseach nua um ghearáin tuismitheoirí freisin, rud a thabharfaidh bealach neamhspleách do thuismitheoirí chun ábhar imní a léiriú i gcás nach bhfuil siad sásta leis an gcaoi ar láimhseáil scoil eachtra a bhaineann le srianadh.
Ag labhairt di ag comhdháil Aontas Múinteoirí Éireann (TUI), dúirt an tAire Naughton:
"Ba cheart go mothódh ár leanaí go léir sábháilte ar scoil agus go mothóidís go bhfuil meas orthu agus go bhfuil tacaíocht á fáil acu. Tá an méid sin tuillte acu. Tá an infheistíocht seo á déanamh lena chinntiú go bhfaigheann leanbh tuiscint, cúram agus na tacaíochtaí cearta nuair a bhíonn sé/sí ag streachailt, seachas méadú ar an deacracht. Tá sí á déanamh freisin chun an mhuinín agus an oiliúint a theastaíonn uathu chun freagairt ar bhealach comhréireach agus éifeachtacha a thabhairt dár múinteoirí agus dár bhfoireann scoile.
“Is eol dúinn go bhfuil an-tábhacht ag baint leis an gcaoi a bhfreagraíonn scoil ag amanna deacra. Is féidir leis cabhrú le leanbh mothú slán, muinín a chothú agus taitneamh a bhaint as a lá scoile gan cur isteach. Leis na bearta seo, táimid ag leanúint de bheith ag cur folláine agus forbairt fhadtéarmach an linbh i lár an aonaigh.”
Agus í ag leanúint ar aghaidh, dúirt an tAire:
“Tá clár oiliúna cuimsitheach san iompraíocht ar fáil ó CNOS mar chuid dá clár foghlama gairmiúla. Is féidir le scoileanna leas a bhaint as oiliúint iontu seo a leanas:
- Samhail Tacaíochta Relate
- Tuiscint ar Iompraíocht
- Tuiscint ar Iompraíocht agus Tacaíocht a thabhairt di (Iar-bhunscoil)
"Taobh amuigh de sin, cuireadh cúrsa samhraidh do mhúinteoirí bunscoile ar fáil in 2025, arna fhorbairt ag SNSO, an Chigireacht agus seirbhís iompraíochta CNOS, agus beidh sé ar fáil arís an samhradh seo. Molaim go láidir do gach scoil leas a bhaint as na tacaíochtaí oiliúna seo.”
Tacaíocht a thabhairt do Scoileanna chun Freagairt go hÉifeachtach
Tá an infheistíocht seo ag cur leis an obair leanúnach atá á déanamh ag an Roinn, CNOS, SNSO agus ag an gCigireacht chun dea-chleachtas i dtacaíocht iompraíochta a chur chun cinn.
Beidh teacht ag scoileanna ar an méid seo a leanas:
- Foghlaim ghairmiúil leathnaithe trí CNOS
- Cúrsa samhraidh tiomnaithe do mhúinteoirí bunscoile
- Treoir nuashonraithe maidir le hiompraíocht, rialáil agus freagairt do ghéarchéim
- An Chigireacht ag díriú go leanúnach ar dhíghéarú agus ar fholláine na scoláirí
- Tá CNOS i mbun próiseas soláthair faoi láthair chun oiliúint a sholáthar do scoileanna príomhshrutha maidir le freagairt do chásanna géarchéime. Beidh an oiliúint sin ar fáil do scoileanna nuair a bheidh an próiseas sin curtha i gcrích.
Dúirt an tAire Naughton:
“Tá foirne scoile ar an líne thosaigh maidir le tacú le leanaí gach lá. Tá na huirlisí, an oiliúint agus an treoir cheart ag teastáil uathu. Cinntíonn an infheistíocht seo go bhfuil an tacaíocht sin acu.”
Tairseach Nua um Ghearáin Tuismitheoirí
Beidh feidhm ag an Tairseach nua um Ghearáin Tuismitheoirí i gcásanna ina bhfuil próiseas gearán na scoile críochnaithe ag tuismitheoirí ach nach bhfuil siad sásta fós. Déanfaidh painéal neamhspleách, lena n-áirítear iarchigirí, síceolaithe, saineolaí ar chosaint leanaí agus ionadaithe páirtithe leasmhara, athbhreithniú ar ghearáin.
Beidh an tairseach um ghearáin tuismitheoirí a bhaineann le srianadh ar fáil ó mhí Mheán Fómhair 2026. Beidh tuismitheoirí a bhfuil imní orthu maidir leis an gcaoi ar bhainistigh scoil srianadh, agus a bhfuil próiseas gearán na scoile críochnaithe acu, in ann doiciméid a chur faoi bhráid na Roinne trí sheoladh ríomhphoist tiomnaithe. Déanfaidh grúpa saineolaithe athbhreithniú ar an bhfaisnéis sin.
Agus í ag fógairt bhunú na tairsí, dúirt an tAire Naughton:
“Baineann sé seo le muinín agus trédhearcacht. Cé gur annamh a thagann na cásanna seo chun cinn, ní mór do thuismitheoirí muinín a bheith acu go n-éistfear lena n-ábhair imní agus go ndéanfar measúnú neamhspleách orthu. Rud ríthábhachtach is ea go mbeidh speisialtóir cosanta leanaí san áireamh sa ghrúpa saineolaithe a dhéanfaidh athbhreithniú ar chásanna. Sa líon beag cásanna sin ina bhfanann fadhbanna gan réiteach, soláthraíonn sé seo cosán soiléir agus cothrom chun an cás a thabhairt ar aghaidh céim eile.”
Feidhmeoidh an tairseach mar bheart eatramhach go dtí go dtabharfar nósanna imeachta reachtúla maidir le gearáin isteach.