Fógraíonn an tAire Foley go bhfuil Aontas Daltaí Iar-bhunscoile na hÉireann á chur leis an gComhairle Náisiúnta Curaclaim agus Measúnachta
- Foilsithe: 27 Aibreán 2022
- An t-eolas is déanaí: 12 Aibreán 2025
Shínigh an tAire Oideachais Norma Foley Ionstraim Reachtúil inniu faoina ndéanfar ballraíocht na Comhairle Náisiúnta Curaclaim agus Measúnachta a uasdátú le Uachtarán Aontas Daltaí Iar-bhunscoile na hÉireann (ADIÉ) a áireamh ann.
Arsa an tAire Foley:
"Tá ríméad orm go mbeidh ADIÉ páirteach i gComhairle na CNCM. Cuirfidh guth na ndaltaí go mór le hobair thábhachtach na CNCM ar fhorbairt curaclam.
"Tá feicthe againn le blianta beaga anuas feabhas mór ar an gcaoi a gcuirtear dearcadh na ndaltaí san áireamh agus beartais oideachais á gceapadh. Bhí ról thar a bheith tábhachtach ag ADIÉ le linn na paindéime, mar shampla, agus réitigh á bhforbairt ar na dúshláin a cuireadh roimh an gcóras oideachais.
"Creidim go láidir gur cheart na daltaí a bheith lárnach i bhforbairt beartas agus straitéisí oideachais agus is céim shuntasach ina threo sin atá i gceist leis seo."
Dúirt Emer Neville, Uachtarán Aontas Daltaí Iar-bhunscoile na hÉireann:
"Tá an-áthas orm gur shínigh an tAire an ionstraim reachtúil seo inniu chun ADIÉ a thabhairt isteach mar bhall iomlán de chuid na Comhairle Náisiúnta Curaclaim agus Measúnachta. Is gníomh ceannródaíocht é tábhacht ghuth na ndaltaí a aithint san obair seo agus cinntí móra á ndéanamh faoina gcuid oideachais. Deimhníonn sé seo ról na ndaltaí mar phríomh-pháirtithe leasmhara san oideachas.
"Fáiltíonn ADIÉ go mór roimhe seo agus tá muid ag súil go mór le cur le hobair na CNCM agus dearcthaí ár mballraíochta a chur in iúl sna blianta amach romhainn."
Dúirt Mary O’Sullivan, Cathaoirleach eatramhach na CNCM:
"Tá sé mar bhunphrionsabal de chuid Phlean Straitéiseach na CNCM go mbeifear gníomhach i gcur chun cinn cheart na bpáistí agus na ndaltaí a ndearcthaí féin a chur in iúl agus a beith san áireamh i múnlú na comhairle curaclaim agus measúnachta a bhíonn á forbairt againn. Fáiltím roimh chinneadh an Aire Ionstraim Reachtúil a chruthú chun ballraíocht daltaí a chur leis an gComhairle. Tá mé ag súil go mór le fáilte a chur roimh ionadaí de chuid ADIÉ agus tá a fhios agam go mbeidh baill na Comhairle agus mé féin mar Chathaoirleach an-sásta a rannpháirtíocht iomlán i ngnó na Comhairle a éascú le linn na tréimhse cinniúnaí seo ina bhfuil athruithe móra ag teacht ar chóras oideachais na hÉireann."
Tabharfar cuireadh d’Emer Neville, Uachtarán ADIÉ do 2021/22, chuig an gcéad chruinniú eile de chuid na CNCM ar an 12 agus 13 Bealtaine.
Cuireann an CNCM comhairle ar an Aire Oideachais i dtaobh cúrsaí curaclaim agus measúnachta ón luathóige anonn go dtí deireadh oideachais an dara leibhéal. Téann sé i bpáirt le foghlaimeoirí, múinteoirí, cleachtóirí, tuismitheoirí agus daoine eile chun tacú le nuáil sna scoileanna agus i suíomhanna eile oideachais. Déanann sé taighde agus úsáideann agus roinneann an taighde mar bhonn do chomhairle agus plé ar chúrsaí oideachais.
Nótaí
An Chomhairle Náisiúnta Curaclaim agus Measúnachta (CNCM)
Tá 25 comhaltaí ar an gComhairle, lena n-áirítear 17 n-athcheapachán agus 7 comhaltaí nua. Leanfaidh an Cathaoirleach, an tOllamh Mary O’Sullivan uirthi i ról an Cathaoirleach eatramhach go dtí go gceaptar Cathaoirleach nua sna míonna romhainn.
Bunaíodh an CNCM faoin Acht Oideachais, 1998 agus is é cuspóir na Comhairle comhairle a chur ar an Aire i dtaobh nithe a bhaineann leis an méid seo:
(a) an curaclam don oideachas luathóige, bunscoile agus iar-bhunscoile; agus
(b) nósanna imeachta measúnachta a úsáidtear i scoileanna agus scrúduithe ar ábhair atá mar chuid den churaclam.
Tá dhá fho-choiste ag an gComhairle - Coiste Iniúchóireachta agus Riosca agus Coiste Rialachais. Mar chuid de struchtúir CNCM, tá trí Bhord ann a thuairiscíonn don Chomhairle ar an Oideachas Luathóige agus Bunscoile, an tSraith Shóisearach agus an tSraith Shinsearach. Tá na trí Bhord seo faoi chathaoirleacht beirt Leas-Chathaoirleach agus comhalta eile den Chomhairle.
Feidhmeanna na Comhairle
Tá an Chomhairle freagrach as gníomhaíochtaí an CNCM a stiúradh, treoir straitéiseach a sholáthar d’fhoireann an fheidhmeannais agus monatóireacht a dhéanamh ar éifeachtacht na bainistíochta.
Comhaltaí ainmnithe a cheapadh chuig Boird Stáit
Sonraítear sna Treoirlínte maidir le Ceapacháin ar Bhoird Stáit go bhfuil eisceachtaí sonracha áirithe ann ó na socruithe atá leagtha síos sna treoirlínte a bhaineann le daoine a cheapadh chuig Boird Stáit, lena n-áirítear:
“Sa chás go bhfuil comhaontú nó socrú i bhfeidhm faoina lorgaíonn Airí ainmniúcháin le haghaidh ceapacháin chuig Boird Stáit ó eagraíochtaí bunriachtanacha geallsealbhóirí (amhail ceardchumainn, eagraíochtaí fostóirí, ionadaithe feirmeoireachta nó comhlachtaí deonacha)”.
Tá foireann lánaimseartha de 47 ag feidhmeannacht an CNCM, á stiúradh ag an bPríomhfheidhmeannach.
In 2022, tá deontas timpeall €6m don CNCM á mhaoiniú ag an Roinn.
Is féidir teacht ar shuíomh idirlín an CNCM ar www.ncca.ie.
Aontas Daltaí Iar-bhunscoile na hÉireann (ADIÉ)
Is é ADIÉ scáth-eagraíocht náisiúnta na gcomhairlí daltaí iar-bhunscoile in Éirinn. Déanann ADIÉ ionadaíocht ar dhaltaí iar-bhunscoile na hÉireann ar an leibhéal áitiúil, réigiúnach náisiúnta agus idirnáisiúnta.
Is é an príomhsprioc faoinar bunaíodh ADIÉ ná cur le cur chun cinn an oideachais iar-bhunscoile do gach dalta iar-bhunscoile chun oideachas gach dalta a fheabhsú agus a shaibhriú, agus chun tacú le rannpháirtíocht daltaí i ngach cuid dá gcuid oideachais le go mbainfidh siad amach barr a n-acmhainne agus le go gcuirfidh siad, mar shaoránaigh, leis an tsochaí.
Gníomhaíonn an Coiste Gnó thar ceann ADIÉ ar bhonn laethúil agus is é sin an grúpa daoine óga a dhéanann ionadaíocht ar an eagraíocht go poiblí. Toghtar an Coiste Gnó gach bliain ag an gComhdháil Bhliantúil.
Is í Emer Neville Uachtarán ADIÉ don bhliain 2021/22. Tá Emer páirteach in ADIÉ le roinnt blianta anuas, agus chaith sí tréimhse mar Oifigeach Réigiúnach Thiobraid Árann agus mar Oifigeach Cumarsáide an Choiste Gnó do 2020/21.
Is mar seo a leanas atá ballraíocht na CNCM anois:
| Bunús an cheapacháin | Ainm |
| Ceaptha ag an Aire Oideachais | Mary O’Sullivan, Cathaoirleach eatramhach |
| Ainmní de chuid Chumann Múinteoirí Éireann (INTO) | *Joe McKeown, Leaschathaoirleach |
| Ainmní de chuid Chomhchoiste na mBainisteoirí (JMB) | *Michael Redmond, Leaschathaoirleach |
| Ceaptha ag an Aire Oideachas (próiseas na Seirbhíse um Cheapacháin Phoiblí (SCP)) | *Teresa Hagan |
| Ainmní de chuid an Aire Leanaí, Comhionannais, Míchumais, Lánpháirtíochta agus Óige (próiseas SCP) | *Sheila Garrity |
| Ainmní de chuid Choimisiún na Scrúduithe Stáit (SEC) | *Elaine Sheridan |
| Ainmní de chuid Bhoird Oideachais agus Oiliúna na hÉireann (ETBI) | *Anne McHugh |
| Ainmní de chuid Aontas Múinteoirí Éireann (TUI) | *David Duffy |
| Ainmní de chuid Aontas Múinteoirí Éireann (TUI) | *Liz Farrell |
| Ainmní de chuid Chumann Múinteoirí Éireann (INTO) | Mairin Ni Chéileachair |
| Ainmní de chuid Chumann Múinteoirí Éireann (INTO) | *Carmel Browne |
| Ainmní de chuid Chumann na Meánmhúinteoirí, Éire (ASTI) | Deirdre McDonald |
| Ainmní de chuid Chumann na Meánmhúinteoirí, Éire (ASTI) | *Ed Byrne |
| Ainmní de chuid Chomhdháil na gCeardchumann (ICTU) | *Brian Tubbert |
| Ainmní de chuid JMB | *Patricia Gordon |
| Ainmní de chuid Chomhairle Náisiúnta na dTuismitheoirí (Iar-bhunscoile) | Martina O’Shea |
| Ainmní de chuid Chomhairle Náisiúnta na dTuismitheoirí (Bunscoile) | Clare Downey |
| Ainmní de chuid Chumann Náisiúnta na mBord Bainistíochta san Oideachas Speisialta (NABMSE) | *Finn O’ Murchú |
| Ainmní de chuid Chónaidhm Ghnólachtaí agus Fhostóirí na hÉireann (IBEC) | Meadbh Costello – (Ceapaí eatramhach) |
| Ainmní de chuid Chumann Bainistíochta na mBunscoileanna Caitliceacha (CPSMA) | Rory D’Arcy |
| Ainmní de chuid Chónaidhm Éireannach na Múinteoirí Ollscoile (IFUT) | Deirdre Ní Mhurchú |
| Ainmní de chuid na Roinne Oideachais | *Orlaith O’Connor |
| Ainmní de chuid Fhoras na Gaeilge | *Edel Ní Chorráin |
| Ainmní de chuid Bhord Oideachais Eaglais na hÉireann (CIBE) | *Joyce Perdue |
| Ainmní de chuid Chumann na Scoileanna Pobail is Cuimsitheacha (ACCS) | Denis Ring |
| Uachtarán ADIÉ | Emer Neville |