Fógraíonn an tAire Helen McEntee bearta nua chun dul i ngleic le neamhláithreacht scoile

D'fhógair an tAire Oideachais agus Óige, Helen McEntee TD, sraith chuimsitheach de ghníomhartha spriocdhírithe agus uilíocha inniu chun feabhas a chur ar thinreamh scoile.

I measc na bpríomhthionscnamh atá á dtabhairt isteach tá:

• "Anseo" – creat nua atá bunaithe ar fhianaise chun cabhrú le scoileanna anailís a dhéanamh ar shonraí tinrimh agus freagairt dóibh, le cur i bhfeidhm i 60 scoil i ndiaidh clár píolótach a chur i gcrích go rathúil.
• Feachtas náisiúnta ilmheán, a bheidh á sheoladh i mí Mheán Fómhair 2025, chun an tábhacht a bhaineann le tinreamh rialta scoile a chur chun cinn i measc scoláirí, tuismitheoirí agus caomhnóirí
• Infheistíocht leanúnach sa tSeirbhís Leasa Oideachais, lena n-áirítear acmhainn na n-oifigeach leasa oideachais (EWO) a leathnú
• Cur chun cinn na mbuntáistí do leanaí agus do dhaoine óga a bhaineann le bheith i láthair ar scoil ar gach lá scoile. Comhdháil Náisiúnta Tinrimh go luath in 2026 chun dea-chleachtais a roinnt agus rannpháirtíocht an chórais uile a chur chun cinn
• Tionscadal scóipe chun sonraí tinrimh fíor-ama a sholáthar ar mhaithe le cinnteoireacht agus idirghabháil níos fearr
• Infheistíocht leanúnach sa Chlár Críochnaithe Scolaíochta agus pleanáil níos fearr idir an Clár Críochnaithe Scolaíochta agus an réimse tacaíochtaí atá ar fáil tríd an earnáil oideachais neamhfhoirmiúil don aos óg ionas go ndéanfar réimse riachtanas na ndaoine óga le linn laethanta scoile, laethanta saoire scoile agus deireadh seachtaine a phleanáil agus a shásamh ar an mbealach is fearr.
• Obair ar fud an rialtais chun tinreamh a leabú mar thosaíocht ón luath-óige ar aghaidh.

Tá sé i gceist ag an Aire McEntee athbhreithniú a dhéanamh freisin ar an Acht Oideachais (Leas), 2000 chun tacaíochtaí reachtúla do leanaí óga a neartú, lena n-áirítear leanaí faoi bhun 6 bliana d'aois atá ag freastal ar bhunscoil a thabhairt isteach faoina raon feidhme chun idirghabháil níos luaithe a chinntiú, agus foilseoidh sí plean náisiúnta nua maidir le míbhuntáiste oideachais go luath, a bheidh ailínithe leis na bearta sin.

Dúirt an tAire McEntee:

Tá Seirbhís Tacaíochta Oideachais Tusla (TESS) faoi shainchúram na Roinne Oideachais agus Óige ón 1 Eanáir 2021.

Feidhmíonn TESS faoin Acht Oideachais (Leas), 2000, píosa reachtaíochta ina leagtar béim ar chur ar thinreamh, rannpháirtíocht agus coinneáil scoile a chur chun cinn. Tá trí shnáithe ag TESS: an tSeirbhís reachtúil Leasa Oideachais (EWS) agus an dá sheirbhís tacaíochta scoile, an Scéim Theagmhála Baile, Scoile agus an Phobail (HSCL) agus an Clár Críochnaithe Scolaíochta (SCP). Oibríonn trí shnáithe TESS le chéile i gcomhar le scoileanna, tuismitheoirí agus caomhnóirí agus le seirbhísí ábhartha eile chun na torthaí oideachais is fearr a bhaint amach do leanaí agus do dhaoine óga.

Léiríonn sonraí a d'fhoilsigh Tusla ina Thuarascáil Bhliantúil ar Thinreamh (AAR) gur díol imní iad na leibhéil neamhláithreachta scoláirí i scoilbhliain 2022/23:

• 6.86 milliún lá caillte i mbunscoileanna (8.6% de na laethanta iomlána)
• 5.56 milliún lá caillte in iar-bhunscoileanna (11.4%)
• Chaill os cionn 110,000 dalta bunscoile agus 65,000 scoláire iar-bhunscoile 20 lá nó níos mó
• Thaifead scoileanna DEIS agus suíomhanna oideachais speisialta rátaí neamhláithreachta an-ard.

Is cuid lárnach de DEIS é an Clár Críochnaithe Scolaíochta (SCP). Is clár spriocdhírithe tacaíochta é SCP do leanaí bunscoile agus iar-bhunscoile agus do dhaoine óga a aithníodh mar dhaoine a d'fhéadfadh a bheith i mbaol ó luathfhágáil scoile. Tá sé mar aidhm ag SCP duine óg a choinneáil nó go mbeidh an Ardteistiméireacht, cáilíocht choibhéiseach, nó leibhéal oiriúnach gnóthachtála oideachais bainte amach aige/aici agus chuige sin réimse d’idirghabhálacha áitiúla a sholáthar i bpobail faoi mhíbhuntáiste a thacaíonn le coinneáil daoine óga san oideachas.

Tá an Scéim Theagmhála Baile, Scoile agus an Phobail (HSCL) ar cheann de na príomhthacaíochtaí i gclár DEIS agus cuireann TESS ar fáil í thar ceann na Roinne. Féachann sé le comhpháirtíocht a chur chun cinn idir tuismitheoirí, múinteoirí agus seirbhísí tacaíochta teaghlaigh pobail, d'fhonn tacú le tinreamh, rannpháirtíocht agus coinneáil níos fearr. Is é sprioc uileghabhálach chomhordaitheoir HSCL torthaí oideachais do leanaí a fheabhsú trína gcuid oibre leis na príomhdhaoine fásta i saol an linbh.

Tacóidh foireann bheag laistigh de TESS le Anseo a mhéadú go 60 scoil go náisiúnta. Déanfar an chéim seo den chlár píolótach a thairiscint do scoileanna uirbeacha, tuaithe, bunscoileanna agus iar-bhunscoileanna. Tabharfar cuireadh do scoileanna léiriú spéise a dhéanamh. Déanfar an roghnú chun go mbeidh sampla ionadaíoch ann maidir le tíreolaíocht, cineál scoile agus déimeagrafaigh. Rachfar i dteagmháil le scoileanna a léiríonn spéis lena chinntiú go gcuirfear san áireamh iad in aon chéim a d'fhéadfadh a bheith ann amach anseo.

Forbraíodh seimineár gréasáin nua atá dírithe ar chur i bhfeidhm Anseo, cur chuige an Chórais Tacaíochtaí Ilghnéitheacha illeibhéil (MD-MTSS) chun dul i ngleic le Fadhbanna Tinrimh Scoile agus beidh sé ar fáil do gach scoil in 2025.