Deimhníonn an tAire McEntee go ndéanfar móroibreacha iarfheistithe fuinnimh agus dícharbónaithe i 28 scoil an samhradh seo faoi Chlár REPowerEU
- Foilsithe: 9 Meitheamh 2025
- An t-eolas is déanaí: 9 Meitheamh 2025
Inniu (9 Meitheamh), d'fháiltigh an tAire Oideachais agus Óige, Helen McEntee TD, roimh an deimhniú go rachaidh 28 scoil ar aghaidh le móroibreacha iarfheistithe fuinnimh an samhradh seo, rud a léiríonn infheistíocht de thart ar €86 milliún i gClár uaillmhianach REPowerEU Pathfinder na Roinne.
Is céim mhór chun tosaigh í an gharsprioc seo in iarrachtaí na Roinne Oideachais agus Óige éifeachtúlacht fuinnimh eastát na scoile a fheabhsú agus spriocanna na hÉireann um ghníomhú ar son na haeráide a chur chun cinn, agus buntáistí fadtéarmacha á soláthar ag an am céanna do scoláirí, do bhaill foirne agus do phobail scoile.
Déanfar iarfheistiú domhain ar na 28 scoil atá ag dul ar aghaidh chuig an tógáil chun Rátáil Fuinnimh Foirgnimh (BER) de B ar a laghad a bhaint amach agus chuige sin teaschaidéil, soilsiú LED agus aeráil aisghabhála teasa meicniúil a shuiteáil. Déanfar uasghrádú freisin ar chreatlach agus aerdhíonacht na scoileanna agus suiteálfar luchtairí gluaisteán leictreach. Cuirfidh na t-uasghrádú seo go mór le compord agus feidhmiúlacht i ngach scoil agus cuideoidh sé le lorg carbóin níos ísle agus le costais fuinnimh a laghdú.
Tá tacaíocht á fáil ag 24 scoil san iomlán le huasghrádú leictreach gaolmhar ag ESB Networks chun freastal ar na córais nua teaschaidéil dhícharbónaithe.
Tionscnamh uaillmhianach a bhfuil tús áite á thabhairt dó is ea Clár Pathfinder REPowerEU a bhfuil amlínte luathaithe ag gabháil leis agus a ceapadh chun aidhmeanna agus garspriocanna AE a shásamh agus iad sin de dhíth chun comhlíonadh maoinithe a bhaint amach.
Dúirt an tAire McEntee:
"Inniu déanaimid ceiliúradh ar dhul chun cinn 28 scoil atá anois chun leas a bhaint as uasghrádú fuinnimh úrscothach an samhradh seo. Is forbairt thar a bheith dearfach é seo do gach ceann de na scoileanna, rud a fhágann go mbeidh siad níos compordaí dá scoláirí agus dá bhfoireann. Is comhartha soiléir é freisin ar ár dtiomantas do thimpeallachtaí scoile nua-aimseartha ina gcuirtear an aeráid san áireamh a sholáthar agus fíor-dhul chun cinn a dhéanamh maidir le spriocanna náisiúnta aeráide.
"Le hinfheistíocht fhoriomlán de €86 milliún, is infheistíocht shuntasach í seo i scoileanna tríd an gClár REPowerEU. In ainneoin a scála agus a chastacht, tá dul chun cinn iontach déanta aige i dtréimhse an-ghearr. Ó cheapadh foirne dearaidh go dtí céim na tairisceana a bhaint amach laistigh de shé mhí, bhí luas an tsoláthair eisceachtúil.
"Táimid an-bhuíoch de gach ceann den 40 scoil a ghlac páirt i gcéimeanna pleanála agus dearaidh an chláir as a rannpháirtíocht réamhghníomhach, a gcomhoibriú agus a dtacaíocht le linn an phróisis seo. Bhí a rannpháirtíocht ríthábhachtach do rath an chláir go dtí seo agus tugaimid aitheantas iomlán don tiomantas agus don iarracht atá léirithe ag gach pobal scoile.
"Leanfaidh an Roinn de bheith ag obair go dlúth leis na scoileanna, le foirne tionscadail, leis na conraitheoirí agus leis na páirtithe leasmhara go léir lena chinntiú go seachadfar na hoibreacha iarfheistithe gan stró agus go tráthúil sna míonna seo amach romhainn."
Nóta d'Eagarthóirí
Go dtí seo, tá ocht bhfoireann deartha ildisciplíneacha agus dhá chonraitheoir déag tar éis conradh a dhéanamh faoi chlár REPowerEU na Roinne, rud a léiríonn céim shuntasach chun cinn maidir lena sholáthar go tapa.
Mar chuid de chur chuige bainistíochta riosca chun a chinntiú go mbainfear Luach ar Airgead amach agus go mbainfear úsáid iomlán as maoiniú AE laistigh de na hamlínte dochta, ghlac 40 scoil san iomlán páirt i gcéimeanna pleanála agus dearaidh an chláir ar an tuiscint chomhaontaithe nach rachadh gach tionscadal ar aghaidh chun tógála. Chuir sé seo solúbthacht ar fáil maidir le rioscaí a bhainistiú amhail moilleanna pleanála, riachtanais bhonneagair ESB Networks, agus dúshláin maidir le tairiscintí nó soláthar tionscadail.
Cuireadh próiseas measúnaithe mionsonraithe céimnithe i bhfeidhm do gach scoil le cinntí deiridh bunaithe ar phríomhchritéir lena n-áirítear féidearthacht theicniúil, luach ar airgead, ailíniú le hamlínte an chláir agus comhoiriúnacht leis an imchlúdach maoinithe foriomlán. I gcás na scoileanna nach rachaidh ar aghaidh le hoibreacha ag an gcéim seo, bhí tionchar ag tosca ar nós luach ar airgead, moill ar chead pleanála a fháil agus dúshláin le linn an phróisis tairisceana ar an toradh. Ina theannta sin, beidh an Roinn ag déanamh measúnú ar dheiseanna do na scoileanna seo dul chun cinn a dhéanamh ina n-iarrachtaí a bheith aeráid-díonach trí chláir eile, lena n-áirítear trí Chlár na nOibreacha Samhraidh um Ghníomhú ar son na hAeráide, atá ar oscailt faoi láthair d'iarratais go dtí an 30 Meitheamh.
Roghnaíodh na scoileanna a bhainfidh tairbhe as an maoiniú iarfheistithe agus úsáid á baint as sonraí a fuarthas ó chéim phíolótach Fhardal Fuinnimh na Scoileanna. Chlúdaigh an fardal píolótach scoileanna i gCill Dara, sa Mhí, in Uíbh Fhailí, i gCill Mhantáin agus i Loch Garman agus cuireadh i gcrích é le tacaíocht ón mBanc Eorpach Infheistíochta.
Chomh maith leis sin, tá maoiniú REPowerEU ag déanamh éascaíochta chun na suirbhéanna fardail fuinnimh, atá ar siúl faoi láthair ar fud an 21 contae eile a leathnú ar fud na tíre.
Tá liosta iomlán de na 28 scoil atá ag dul ar aghaidh go dtí céim na n-oibreacha ar fáil thíos.
REPowerEU
Tá clár REPowerEU á mhaoiniú ag an Aontas Eorpach – NextGenerationEU. Is é REPowerEU plean AE chun spleáchas ar bhreoslaí iontaise na Rúise a laghdú go tapa tar éis an chogaidh san Úcráin, neamhspleáchas agus slándáil sholáthar fuinnimh an Aontais a threisiú agus dlús a chur leis an aistriú glas. Tá sé mar aidhm aige an t-aistriú glan a chur chun cinn go tapa agus teacht le cheile chun córas fuinnimh níos athléimní agus fíor-Aontas Fuinnimh a bhaint amach. Tá REPowerEU á mhaoiniú tríd an tSaoráid Náisiúnta Téarnaimh agus Athléimneachta (NRRF).