Molann an tAire McEntee do scoileanna spéis a léiriú i rannpháirtíocht sa mhodúl Cuir Fáilte roimh Theangacha in 2025/26
- Foilsithe: 8 Bealtaine 2025
- An t-eolas is déanaí: 8 Bealtaine 2025
Inniu (Déardaoin), mhol Helen McEntee TD, an tAire Oideachais agus Óige, do bhunscoileanna iarratas a dhéanamh chun páirt a ghlacadh sa mhodúl Cuir Fáilte roimh Theangacha sa scoilbhliain seo amach romhainn.
Tar éis an-rath a bheith air le ceithre bliana anuas – le breis agus 1,300 scoil ag glacadh páirte ann i scoilbhliain 2024/2025 – tá an modúl á thairiscint do scoileanna anois don chúigiú bliain.
Cuirfear tús leis an dara céim de Cuir Fáilte roimh Theangacha (SYTL) ó scoilbhliain 2025/2026 ar aghaidh, agus an chéim sin dírithe ar ullmhú do thabhairt isteach teangacha iasachta mar chuid de Churaclam athfhorbartha na Bunscoile, ag tacú leis na múinteoirí uasoiliúint a fháil i dteanga iasachta agus an modúl a theagasc, chomh maith le deontais a chur ar fáil chun tacú leis an teagasc ó mhúinteoir/theagascóir ar cuairt sa ghearrthéarma.
Dúirt an tAire McEntee:
"Tá an-tóir ar an gclár Cuir Fáilte roimh Theangacha agus tá lúcháir orm go bhfuil an oiread sin scoileanna tar éis páirt a ghlacadh sa chlár le ceithre bliana anuas agus an réimse leathan teangacha atá roghnaithe acu. Mholfainn do gach scoil iarratas a dhéanamh chun páirt a ghlacadh in Cuir Fáilte roimh Theangacha in 2025/26.
"Tá foghlaim teanga iasachta an-tairbheach do dhaltaí, is féidir léi feasacht na ndaltaí ar éagsúlacht chultúrtha a shaibhriú, chomh maith le tacú le cuimsiú agus folláine, ag cur lena bhfoghlaim sa todhchaí, lena ndeiseanna gairme agus ag cabhrú le forbairt na ndaltaí mar shaoránaigh ghníomhacha."
Tá an modúl ar fáil do dhaltaí i rang a 5 agus i rang a 6, agus tá scoileanna rannpháirteacha i dteideal deontais de €500 in aghaidh an tseomra ranga ón Roinn Oideachais, suas go dtí uasmhéid de €1,000 in aghaidh na scoile.
Tá tuilleadh eolais agus foirmeacha iarratais ar fáil i gCiorclán 0031/2025, atá ar fáil ar shuíomh gréasáin na Roinne anseo: Cuir Fáilte roimh Theangacha modúl sampla theangacha na bunscoile Abair Tá' le Teangacha Modúl samplála teangacha bunscoile
Is é an spriocdháta d'iarratas ná 5pm ar an 21 Bealtaine 2025.
Nóta don Eagarthóir
Tá sé mar aidhm ag an modúl Cuir Fáilte roimh Theangacha blaiseadh a thabhairt do mhúinteoirí agus do dhaltaí ar cad is brí le teangacha breise a chomhtháthú in éineacht le Béarla agus Gaeilge.
Sa chomhthéacs seo, tá sé mar aidhm ag Cuir Fáilte roimh Theangacha:
- feasacht a mhúscailt ar an tábhacht a bhaineann le hoideachas i nuatheangacha iasachta chun tras-scileanna a thógáil
- an bealach a réiteach chun Curaclam Teanga athfhorbartha na Bunscoile a chur i bhfeidhm.
- staidéar ar theangacha iasachta a spreagadh ag leibhéal na hiar-bhunscoile
- tacú le cur i bhfeidhm Déanann Teangacha Nasc, Straitéis do Theangacha Iasachta san Oideachas in Éirinn 2017-2026
- feabhas a chur ar litearthacht sa Bhéarla agus sa Ghaeilge
Raon teangacha
I measc na dteangacha a roghnaigh scoileanna le ceithre bliana anuas tá Araibis, Sínis, Fraincis, Gearmáinis, Eabhrais, Teanga Chomharthaíochta na hÉireann, Iodáilis, Seapáinis, Liotuáinis, Polainnis, Portaingéilis, Rómáinis, Spáinnis, Tamailis agus Úcráinis.
Cuirfear scoileanna a ainmníonn múinteoir ar an bhfoireann chun an clár a chur ar fáil agus a gheallann páirt a ghlacadh i gcúrsa uasoiliúna i dteanga iasachta san áireamh go huathoibríoch sa chlár (beidh roghanna éagsúla cúrsaí maoinithe ar fáil i rith na bliana - féach languagesconnect.ie/language-upskilling/ le haghaidh tuilleadh eolais - is féidir le scoileanna úsáid a bhaint as deontas Cuir Fáilte roimh Theangacha freisin chun cúrsaí uasoiliúna malartacha nó breise i dteangacha iasachta a mhaoiniú).
Sa chás nach bhfuil aon acmhainn sa scoil go fóill, déanfaidh scoileanna acmhainn teagaisc teangacha iasachta a aithint agus a aimsiú laistigh den phobal i gcoitinne (m.sh. múinteoir teanga ar cuairt, cúntóir teanga iasachta ó iar-bhunscoil).
Tá Cuir Fáilte roimh Theangacha á riar ag Teangacha Iar-bhunscoile Éireann (PPLI)/Déanann Teangacha Nasc thar ceann na Roinne. Tá réimse tiomnaithe de shuíomh gréasáin Déanann Teangacha Nasc (https://languagesconnect.ie/primary/) ina óstach ar an ábhar ar fad a bhaineann leis an modúl, lena n-áirítear liosta de na scoileanna rannpháirteacha. Tá na hacmhainní teagaisc agus foghlama ar fáil ón suíomh gréasáin agus tá siad ar fáil i nGaeilge chomh maith, a bhuíochas le comhoibriú leis an gComhairle um Oideachas Gaeltachta & Gaelscolaíochta (COGG). Soláthraíonn réimse ceisteanna coitianta soiléiriú ar cheisteanna a chuirtear go minic.
Cuireann Teangacha Iar-bhunscoile Éireann (PPLI)/Déanann Teangacha Nasc seisiúin oiliúna ar fáil do gach múinteoir/teagascóir a sholáthraíonn an modúl, agus éascaítear seisiúin eolais freisin do mhúinteoirí óstála agus d'ionadaithe scoile eile. Seoltar pacáistí múscailte feasachta chuig na scoileanna rannpháirteacha go léir chun cur leis na hacmhainní teagaisc.
Is féidir ceisteanna a sheoladh chuig foireann Bunscoile PPLI/Déanann Teangacha Nasc ach ríomhphost a sheoladh chuig primary@ppli.ie