Tugann an tAire McEntee cuairt ar shuíomh foirgnimh scoile nua do Choláiste Pobail an Ghrifín, Leamhcán, Co. Bhaile Átha Cliath
- Foilsithe: 25 Meán Fómhair 2025
- An t-eolas is déanaí: 29 Meán Fómhair 2025
Thug an tAire Oideachais agus Óige, Helen McEntee TD, cuairt inniu (DÉARDAOIN) ar shuíomh fhoirgneamh nua na scoile do Choláiste Pobail Ghrifín, i Leamhcán, Co. Bhaile Átha Cliath.
Dúirt an tAire McEntee go bhfuil sí an-bhródúil as an infheistíocht atá á déanamh ag a roinn i leith spásanna foghlama ardchaighdeáin a sholáthar dár ndaoine óga.
Dúirt sí:
“Tá áthas an domhain orm a bheith anseo libh ar maidin ar an láthair ina dtógfar baile buan nua do Choláiste Pobail an Ghrifín go luath.”
Ghabh an tAire buíochas leo siúd a d’eagraigh an ócáid chun cloch mhíle chomh spreagúil sin a cheiliúradh do phobal na scoile, do Leamhcán agus a thimpeallacht. Thug sí ómós don fhoireann bhainistíochta, do na múinteoirí, agus don fhoireann ar chruthaigh a ndúthracht dá scoláirí timpeallacht foghlama dhearfach agus spreagúil ón gcéad lá.
Dúirt an tAire McEntee:
“Ó bunaíodh é in 2017, gan ann ach 16 scoláire, tá Coláiste Pobail an Ghrifín tar éis cur go mór le saol oideachais Leamhcáin cheana féin. I mbeagán ama, tá cáil bainte amach aige “ina bhfoghlaimíonn daoine óga le bród agus ina ndéanann siad dul chun cinn le muinín.” Is léir go bhfuil mana na scoile fite fuaite, luachmhar agus beo gach lá, gach téarma agus gach bliain de réir mar a fhásann an scoil.
“Cuirfidh an foirgneamh nua níos mó spáis agus dálaí oibre níos fearr ar fáil do chách, ach is iad na múinteoirí agus an fhoireann a thabharfaidh luach don fhoirgneamh. Is iad na daltaí a bheidh mar chroílár agus a thabharfaidh beocht don fhoirgneamh.”
Dúirt an tAire McEntee freisin go bhfuil sí ag tnúth leis an fhoirgneamh nua a fheiceáil ag teacht chun beatha mar ionad foghlama agus cruthaitheachta.
Tagann an foirgneamh nua i gcomhthéacs infheistíochta leanúnach na Roinne i dtionscadail tógála.
Ó 2020 i leith, tá an infheistíocht seo a leanas déanta ag an Roinn Oideachais agus Óige:
- Os cionn € 1.6 billiún ag tacú le 312 tionscadal tógála scoile a chur i gcrích agus 98 tionscadal eile á dtógáil faoi láthair, i mBaile Átha Cliath.
Ar fud na tíre, tá níos mó ná €6 bhilliún infheistithe ag an Roinn i dtionscadail tógála scoile ar fud na tíre ó bhí 2020 ann. Áirítear leis sin breis is 1,400 tionscadal agus os cionn 400 tionscadal tógála scoile atá ar bun faoi láthair a chur i gcrích, lena mbaineann 40 foirgneamh scoile nua.
Thug an tAire cuairt ar Choláiste Pobail Pháirc Bhaile Choilín i gCluain Dolcáin, Baile Átha Cliath, inniu freisin.
Mhol an tAire McEntee baill phobal na scoile agus dúirt sí:
“Ba mhaith liom tús a chur le mo bhuíochas ó chroí a chur in iúl daoibh go léir as cuireadh a thabhairt dom freastal ar oscailt oifigiúil bhur seomra uathachais oideachais speisialta.
“Bhí sibh réamhghníomhach i gcónaí inár gcur chun cinn i dtreo córas oideachais chuimsithigh do chách agus tá taifead cruthaithe agaibh maidir le nuálaíocht, acmhainneacht agus oscailteacht a léiriú i leith an oideachais speisialta.”
Nótaí don Eagarthóir ar Choláiste Pobail an Ghrifín
Tá an tionscadal tógála scoile buan do Choláiste Pobail Ghrifín á chur i gcrích faoi Chlár Dearaidh agus Tógála na Roinne, agus cuirfidh iar-bhunscoil nua le 1,000 dalta agus cóiríocht ar fáil ag Crosaire na Ciseoige, Ascaill an Ghrífín, Leamhcán, Co. Bhaile Átha Cliath.
Táthar ag súil go mbeidh an tionscadal seo críochnaithe faoi 2026.