Fógraíonn an tAire Naughton Méadú Mór ar Mhaoiniú d’Eagraíochtaí Óige ar Oíche na hÓige

Tá leithdháileadh de €338,681 ceadaithe ag an Aire Oideachais agus Óige Hildegarde Naughton faoin Scéim Maoinithe Caipitil don Óige 2025 chun tacú le 26 eagraíocht óige náisiúnta.

Soláthraíonn an scéim deontais le haghaidh uasghrádú a dhéanamh ar TFC, mionoibreacha chun inrochtaineacht a fheabhsú, agus troscán chun spásanna cuimsitheacha a chruthú don óige, lena n-áirítear spásanna a ceapadh chun fáilte a chur roimh dhaoine óga néara-éagsúla.

Agus an maoiniú á fhógairt aici roimh Oíche na hÓige, dúirt an tAire Naughton:

Bhí na deontais faoin Scéim Maoinithe Caipitil don Óige 2025 sa réimse idir €1,000 agus €35,000, agus uasteorainneacha bunaithe ar chroímhaoiniú na Scéime Deontais do Sheirbhísí Óige atá ag gach eagraíocht. Ceapadh na teorainneacha seo chun rochtain leathan a chinntiú, go háirithe d’eagraíochtaí beaga.

Is é €338,681 an maoiniú iomlán atá ceadaithe. Tacóidh €11,319 breise le costais chaipitil chun 10 dtionscadal nua oibre don óige de chuid UBU a bhunú a fógraíodh níos luaithe i mbliana, rud a thabharfaidh a leithdháileadh caipitil iomlán go dtí €161,319.

Rinneadh measúnú ar gach iarratas mar incháilithe, a chlúdaíonn uasghrádú ar TFC, feabhsuithe ar rochtain, uasghrádú ar spásanna lasmuigh, oibreacha athchóirithe riachtanacha agus spásanna cuimsitheacha don óige.

Tá cuid mhór den mhaoiniú á úsáid ag eagraíochtaí óige chun tacú lena n-oibríochtaí náisiúnta trí fheabhas a chur ar TFC. I measc úsáidí eile a bhainfear as na deontais tá:

I mBaile Átha Cliath, úsáidfidh dhá eagraíocht, Banóglaigh Catoilici na hÉireann agus ECO-UNESCO, an maoiniú chun a n-oifigí faoi seach a dhéanamh níos inrochtana agus níos fáiltí do dhaoine óga.

I Maigh Eo, úsáidfidh Foróige a mhaoiniú chun oibreacha riachtanacha a chur i gcrích lena chinntiú go bhfanfaidh ionad cónaithe ina thimpeallacht shábháilte agus fháilteach do dhaoine óga, d’oibrithe deonacha agus d’fhoireann na gclubanna agus na dtionscadal óige éagsúla a úsáideann é.

I gCill Mhantáin, forbróidh Banóglaigh na hÉireann bonneagar gníomhaíochtaí lasmuigh ag a dteachín cuimhneacháin náisiúnta chun rochtain ar oideachas lasmuigh a fheabhsú do gach ball óg, lena n-áirítear daoine faoi mhíchumas.

I gCorcaigh, úsáidfear maoiniú YMCA chun athchóiriú a dhéanamh ar fhoirgneamh oidhreachta, a úsáidtear faoi láthair chun críocha éagsúla, lena n-áirítear clár béilí laethúil do dhaoine óga leochaileacha agus faoi mhíbhuntáiste, feabhas a chur ar shlándáil agus an spás a dhéanamh níos fáiltí.

Beidh Oíche na hÓige/Youth Night 2025 ar siúl an Aoine seo, 21 Samhain.

Tá óstáil á déanamh ag breis agus 400 club óige agus seirbhís ar fud na tíre ar imeachtaí Oíche na hÓige mar cheiliúradh agus mar bhealach chun an pobal i gcoitinne a chur ar an eolas faoi cad a chiallaíonn a gclub nó a seirbhís dóibhsean.

Ar Oíche na hÓige, osclóidh clubanna agus seirbhísí óige ar fud na hÉireann a ndoirse don phobal, chun ceiliúradh a dhéanamh ar bhaill clubanna agus grúpaí óige, ar a n-oibrithe óige agus a n-oibrithe deonacha, agus chun feasacht ar obair óige ina bpobail a mhúscailt — ag tarraingt aird ar an tairbhe a bhaineann daoine óga agus an pobal i gcoitinne as obair óige.

Tionscnamh de chuid na roinne is ea Oíche na hÓige a sholáthraítear i gcomhpháirtíocht leis na boird oideachais agus oiliúna, Comhairle Náisiúnta na nÓg in Éirinn agus earnáil na hoibre óige.

Faigh tuilleadh eolais faoi na himeachtaí atá ar siúl i do cheantar. Tá sonraí faoi na himeachtaí liostaithe ag: Aimsigh d’imeacht áitiúil d'Oíche na hÓige