Seolann na hAirí Naughton agus Moynihan feachtas earcaíochta don tSeirbhís Teiripe Oideachais (ETS) nua
- Foilsithe: 28 Samhain 2025
- An t-eolas is déanaí: 28 Samhain 2025
Sheol an tAire Oideachais agus Óige, Hildegarde Naughton, agus an tAire Stáit atá freagrach as Oideachas Speisialta agus Cuimsiú, Michael Moynihan, feachtas earcaíochta inniu do theiripeoirí don tSeirbhís Teiripe Oideachais (ETS) nua.
Mar thoradh ar an bhfeachtas earcaíochta atá á reáchtáil ag an gComhairle Náisiúnta um Oideachas Speisialta (CNOS) beidh 90 teiripeoir, idir theiripeoirí saothair agus theiripeoirí urlabhra agus teanga, ag teacht isteach sa tseirbhís nua.
Mar thoradh ar an ETS nua, a bheidh á soláthar ag CNOS, beidh tacaíochtaí teiripe ar fáil i scoileanna speisialta ar bhonn céimnithe, ag tosú i 45 scoil speisialta i scoilbhliain 2025/2026. Úsáidfidh an tseirbhís cur chuige ilsrathach chun tacaíocht a sholáthar do na leanaí a bhfuil na riachtanais is mó acu.
Leanfaidh an ETS de thacaíochtaí a sholáthar do scoileanna príomhshrutha a bhaineann leas as teiripe leanúnach inscoile agus do mhúinteoirí trí fhéilire náisiúnta CNOS um oiliúint múinteoirí. Go tábhachtach, cuirfidh an ETS leis na seirbhísí atá ann cheana féin seachas iad a athsholáthar, ag obair i gcomhar le hoideoirí chun an soláthar foriomlán a neartú.
Dúirt an tAire Naughton:
“Tá an-áthas orm an feachtas earcaíochta seo a sheoladh go foirmiúil do 90 teiripeoir ar fud na tíre. Ós rud é gur éirigh liom an maoiniú a fháil le linn mo thréimhse mar Aire Oideachais Speisialta chun teiripeoirí a thabhairt isteach i CNOS chun tacú le múinteoirí agus scoileanna ar bhonn píolótach, táim ag iarraidh an ETS a fheiceáil á fheidhmiú go céimneach chomh tapa agus is féidir. Táim muiníneach go ndéanfaidh CNOS dul chun cinn leis an bhfeachtas earcaíochta lena chinntiú nach mbeidh aon mhoilleanna ann agus go bhfostófar na teiripeoirí go tapa.
“Tá leanaí i gcroílár an tionscnaimh seo agus is é ár n-uaillmhian teiripeoirí a fheiceáil á n-earcú agus ag obair ar an talamh chomh luath le Feabhra na bliana seo chugainn. Léiríonn earcaíocht teiripeoirí laistigh CNOS bogadh suntasach i dtreo fheidhmiú iomlán na seirbhíse teiripe oideachais i scoileanna speisialta, agus i ranganna speisialta i scoileanna príomhshrutha. Táim meáite ar chóras oideachais den chaighdeán is airde a sholáthar ina léirítear meas ar gach leanbh agus duine óg agus ina dtugtar tacaíocht ghníomhach dóibh chun a lánacmhainneacht a bhaint amach.”
Dúirt an tAire Moynihan:
“Bhí bunú na Seirbhíse Teiripe Oideachais mar phríomhthosaíocht agam mar Aire agus mar sin tá an-áthas orm go bhfuil céim na hearcaíochta sroichte againn taobh istigh de chúpla mí ionas gur féidir linn an gealltanas sin a fhíorú. Cuirfidh sé seo athrú ó bhonn ar chúrsaí ar mhórán bealaí. Mar thoradh ar theiripí a chur ar fáil i suíomh na scoile beidh rochtain níos fearr ag leanaí ar thacaíocht agus ina theannta sin is lú an gá a bheidh ann go dtógfadh tuismitheoirí amach as an rang iad, rud a chuirfidh lena rannpháirtíocht i saol na scoile. Chomh maith leis sin, déanfar múinteoirí agus CRSanna a chumasú mar go mbeidh teiripeoirí ar fáil dóibh chun bonn eolais a chur faoi na bealaí inar féidir leo tacú le leanaí sa seomra ranga.
“Sna blianta seo amach romhainn, beimid ag obair chun an tseirbhís a leathnú isteach i ngach scoil speisialta, chomh maith le ranganna speisialta agus scoileanna príomhshrutha. Beidh sé seo bunathraitheach i ndáiríre do leanaí, do theaghlaigh agus do scoileanna ar fud na tíre. Tá súil agam go leanfaimid ar aghaidh ar luas lena chinntiú go gcuirfear an ETS i bhfeidhm chomh tapa agus is féidir.”
Dúirt John Kearney, Príomhfheidhmeannach CNOS,
“Cuireann CNOS fáilte mhór roimh fhorbairt na Seirbhíse Teiripe Oideachais. Cuirfidh an tseirbhís seo ar an obair iontach agus ar an bhfoghlaim atá curtha ar fáil ag ár seirbhís teiripe reatha go dtí seo. Leanfaidh CNOS de bheith ag cinntiú go gcuirtear seirbhísí teiripe ar fáil do leanaí ina scoil, agus ag an am céanna tacóidh siad le forbairt bhreise ar chóras oideachais chuimsithigh. Mar thoradh ar leathnú ár bhfoirne teiripe, tríd an bhfeachtas earcaíochta seo, neartófar an leibhéal tacaíochta a chuirimid ar fáil. Oibreoidh teiripeoirí in CNOS go dlúth le seirbhísí eile de chuid CNOS agus le seirbhísí oideachais eile, amhail Eagraithe Riachtanais Speisialta Oideachais (ERSOanna), Múinteoirí Cuartaíocht, an tSeirbhís Chomhairleach agus an tSeirbhís Náisiúnta Síceolaíochta Oideachais (SNSO) chun seirbhís iomlánaíoch chomhtháite a sholáthar do phobail scoile. Éilíonn oideachas cuimsitheach tiomantas sóisialta comhroinnte ar fud gach earnála den tsochaí, agus tá CNOS ag tnúth le bheith ag obair go dlúth lenár gcomhghleacaithe in earnáil na sláinte chun seirbhís chomhtháite agus ailínithe a sholáthar do leanaí agus do theaghlaigh agus é mar aidhm aici a chinntiú go mbeidh deis ag gach leanbh a lánacmhainneacht a bhaint amach.”
Díreoidh an tSeirbhís Teiripe Oideachais nua ar Theiripe Saothair agus ar Theiripe Urlabhra agus Teanga i dtús báire. Oibreoidh na teiripeoirí faoi rialachas CNOS, agus iad faoi mhaoirseacht chliniciúil. Cinnteoidh sé sin maoirseacht chuí agus cabhróidh sé le teiripeoirí cleachtais atá bunaithe ar fhianaise, raon feidhme comhaontaithe oibre, agus coinneáil caighdeán gairmiúil a sholáthar.
Leanfaidh CNOS de bheith i mbun plé le páirtithe leasmhara—gairmithe sláinte agus oideachais, grúpaí abhcóideachta, agus tuismitheoirí—lena chinntiú go bhfuil an tseirbhís ailínithe le seirbhísí leanaí atá ann cheana féin. Má bhíonn teiripeoirí leabaithe i scoileanna, cabhróidh sé le caidreamh láidir a fhorbairt le múinteoirí, réiteach fadhbanna i gcomhair a spreagadh, agus comhsheasmhacht a chinntiú. Chomh maith leis sin, tabharfaidh sé deis oibriú i gcomhar go rialta le tuismitheoirí agus le seirbhísí atá ann cheana amhail Foirne an Líonra Míchumais Leanaí (CDNTanna) agus Cúram Príomhúil. Ní bheidh an ETS ag teacht in ionad seirbhísí atá ann cheana féin; oibreoidh sé taobh leo.
Tá an phleanáil maidir le roghnú na scoileanna a bheidh san áireamh sa chéad fheidhmiú céimnithe ag céim luath go fóill. Táthar ag súil go gcuirfear tús leis an tseirbhís i roinnt scoileanna speisialta níos déanaí i scoilbhliain 2025/26, agus go leanfaidh an feidhmiú céimnithe ar aghaidh isteach in 2026/27 ionas go mbeidh rochtain ag gach scoil speisialta uirthi. Ba chóir go mbeadh roghnú scoileanna don chéad chéim críochnaithe sna seachtainí seo amach romhainn.
Fógrófar na poist Dé hAoine an 28 Samhain 2025 agus is é Dé hAoine 16 Eanáir 2026 an dáta deiridh. Is féidir sonraí an fheachtais a fháil anseo. Tá na tuarastail i gcomhréir le scálaí pá comhdhlúite FSS (Deireadh Fómhair 2024) do ghráid teiripe.
CRÍOCH
NÓTAÍ DON EAGARTHÓIR
- Gealltanas i gClár an Rialtais is ea forbairt na Seirbhíse Teiripe Oideachais agus is tionscnamh tras-rannach é. Cinnteoidh sé go n-úsáidfear cur chuige comhordaithe chun líon na n-áiteanna coláiste do ghairmithe sláinte agus cúraim shóisialta a mhéadú.
- Beidh meastóireacht agus feabhsú cáilíochta leanúnach ina bpríomhghné den ETS. Tógfaidh an tseirbhís ar an bhfoghlaim ó Thionscadal Píolótach FSS um Scoileanna Feabhsaithe agus ar obair a rinne seirbhísí FSS agus CNOS roimhe seo i scoileanna.
- Aithnítear go bhfuil ganntanas teiripeoirí in Éirinn faoi láthair. Maidir le bainistiú a dhéanamh ar earcaíocht agus ar choinneáil teiripeoirí agus ag leanúint ar aghaidh ón ngealltanas i gClár an Rialtais chun líon na n-áiteanna oiliúna a mhéadú do dhisciplíní ríthábhachtacha, tá mo Roinn i mbun plé le comhghleacaithe sa Roinn Sláinte, sa Roinn Breisoideachais agus Ardoideachais, Taighde, Nuálaíochta agus Eolaíochta mar aon leis an Roinn Leanaí, Míchumais agus Comhionannais agus le an FSS lena chinntiú go méadófar líon na n-áiteanna oiliúna do dhisciplíní tábhachtacha amhail teiripeoirí urlabhra agus teanga, teiripeoirí saothair agus fisiteiripeoirí mar thosaíocht.
- Cuirfidh forbairt seirbhíse teiripe laistigh den earnáil oideachais deiseanna breise ar fáil chun líon na n-áiteanna coláiste agus na n-áiteanna oideachais cleachtais a mhéadú.
- Tá sé beartaithe ag CNOS 20 socrúchán cleachtais a thairiscint ar dtús chun oibriú taobh leis na 39 teiripeoir sa tSeirbhís Tacaíochta Teiripe Oideachais (ETSS) agus d’fhéadfaí é sin a mhéadú go suntasach de réir mar a mhéadaíonn líon na dteiripeoirí in CNOS.
- Is féidir tuilleadh sonraí faoin ETS a fháil anseo.
https://ncse.ie/an-introduction-to-the-education-therapy-service-ets