Ceapacháin chuig an gComhairle um Ghairmithe Sláinte agus Cúraim Shóisialaigh (CORU)

Ag teacht sna sála ar fheachtas de chuid na Seirbhíse um Cheapacháin Phoiblí, rinne Simon Harris TD, an tAire Sláinte, na comhaltaí neamhghairmiúla seo a leanas a cheapadh chuig an gComhairle um Ghairmithe Sláinte agus Cúraim Shóisialaigh le héifeacht ón 24 Samhain 2019 go dtí an 20 Márta 2023:

An Dr Mary Tumelty

Tá an Dr Tumelty ina hacadóir lánaimseartha i Scoil an Dlí i gColáiste na hOllscoile, Corcaigh. Tá PhD agus Baitsiléir Dlí ó Ollscoil Luimnigh ag an Dr Tumelty. I measc a réimsí spéise taighde tá an dlí leighis, an eitic leighis, sábháilteacht othar agus réiteach malartach díospóide.

Tá dea-theist taighde idirdhisciplínigh uirthi sna réimsí seo a leanas: an dlí leighis, an eitic leighis, an dlí torta agus réiteach malartach díospóide, lena n-áirítear foilsitheoireacht, cistiú taighde a mhealladh agus idirchaidreamh a dhéanamh le geallsealbhóirí. Tá an Dr Tumelty ina scrúdaitheoir seachtrach do lear cúrsaí acadúla freisin, lena n-áirítear cúrsaí i réimse an dlí sláinte agus i réimse na heitice.

Chuir an Dr Tumelty ardchúrsa in idirghabháil i gcrích i Scoil Dlí Harvard, áit ar díríodh ar straitéisí agus uirlisí a bhfuil mar aidhm leo teacht ar chomhaontú, cásanna casta a bhainistiú agus easaontuithe a réiteach.

An tUas. Barry Downes

Tá Barry ina fheidhmeannach sinsearach a bhfuil raon leathan taithí idirnáisiúnta agus ilchultúrtha aige. I measc na speisialtachtaí atá ag Brian tá bainistíocht oibríochtaí agus treorú a dhéanamh ar fhoirne trasfheidhme chun cuspóirí corparáideacha a chomhlíonadh. Tá taithí fhairsing aige ar na réimsí seo: bainistíocht oibríochtaí, bunathrú eagraíochta chun feabhais, forbairt tionscadal, rannpháirteachas le fostaithe, caidreamh le cliaint, agus idirbheartaíocht conarthaí a stiúradh.

I láthair na huaire, tá Brian ar an bPríomhoifigeach Feidhmiúcháin ar Affidea Ireland. D’oibrigh sé roimhe seo i róil bhainistíochta sinsearaí oibríochtaí i roinnt tionscail dhifriúla. Tá taithí ag Brian mar Stiúrthóir Teicniúil Díolachán agus ar Bhainistíocht Gléasra freisin. Ar na cáilíochtaí acadúla atá aige tá Céim Baitsiléara in Innealtóireacht Mheicniúil ó Institiúid Teicneolaíochta Átha Cliath, Sráid Bolton, agus Céim Máistreachta i Riarachán Gnó ó Scoil Ghnó an Choláiste Impiriúil, Londain.

Rinne Simon Harris TD, an tAire Sláinte, an comhalta neamhghairmiúil seo a leanas a athcheapadh chuig an gComhairle um Ghairmithe Sláinte agus Cúraim Shóisialaigh le héifeacht ón 24 Samhain 2019 go dtí an 20 Márta 2023:

An Dr Carmel Smith

Tá an Dr Smith ina Léachtóir sa Scoil Ghnó agus Daonnachtaí in Institiúid Teicneolaíochta Cheatharlach. Chomh maith leis sin, tá sí ina Comhlach Taighde san Ionad Taighde Leanaí i gColáiste na Tríonóide, Baile Átha Cliath. Bhronn Coláiste na Tríonóide, Baile Átha Cliath, PhD i Síceolaíocht uirthi. Baineann a réimsí spéise agus a foilseacháin go príomha le réimse na leanaí agus le réimse na hóige.

D’oibrigh an Dr Smith roimhe seo mar oibrí sóisialach agus mar oifigeach promhaidh i Londain, i mBéal Feirste agus i mBaile Átha Cliath. D’oibrigh sí mar Dhuine Neamhspleách agus mar Imscrúdaitheoir Gearán d’Údaráis Áitiúla i Sasana agus sa Bhreatain Bheag.

Tá méid suntasach eolais agus taithí ag an Dr Smith ar athbhreithnithe institiúideacha agus dearbhú cáilíochta a dhéanamh san earnáil ardoideachais. Ghníomhaigh sí mar Bhall den Phainéal agus mar Chathaoirleach ar Athbhreithnithe Cláir agus Institiúideacha ar institiúidí tríú leibhéal thar ceann Dhearbhú Cáilíochta agus Cáilíochtaí Éireann.