Béim á leagan ag an Roinn Sláinte ar na hiarrachtaí leanúnacha atá ar bun maidir le hathchóiriú na sláinte poiblí agus í ag cur fáilte roimh thoscaireacht na Gearmáine le haghaidh cruinnithe trí-lá
- Foilsithe: 8 Aibreán 2024
- An t-eolas is déanaí: 12 Aibreán 2025
Chuir an Roinn Sláinte fáilte inniu roimh thoscaireacht na Gearmáine d'oifigigh shláinte le haghaidh cruinnithe trí-lá, atá dírithe ar fheabhas a chur ar chórais shláinte phoiblí.
Tá sé mar aidhm ag an gcuairt seo comhoibriú, comhroinnt faisnéise agus foghlaim a chothú idir oifigigh shláinte sa dá thír.
In Éirinn, tá obair ar bun faoi láthair trí chlár uaillmhianach um athchóiriú na sláinte poiblí, lena n-áirítear infheistíocht shuntasach sa lucht saothair sláinte poiblí, breithniú agus cur i bhfeidhm mholtaí na Sainghrúpaí Comhairleacha um Athchóiriú na Sláinte Poiblí, straitéis um shláinte phoiblí a fhorbairt agus scrúdú a dhéanamh ar an mbealach is fearr chun freagairt do bhagairtí sláinte amach anseo agus bagairtí sláinte atá le teacht chun cinn.
Chinntigh freagairt láidir na hÉireann ar phaindéim COVID-19 go raibh sí ar cheann de sheacht dtír de chuid an OECD nach raibh farasbarr básanna ann le linn na paindéime. Bhí an ráta glactha do vacsaínithe príomhúla COVID-19 i measc na rátaí is airde san Aontas freisin.
Agus tíortha eile ag iarraidh foghlaim ó thaithí na hÉireann, is deis í cuairt thoscaireacht na Gearmáine d'Éirinn aird a tharraingt ar na tionscadail leanúnacha a neartóidh córais shláinte phoiblí a thuilleadh, chomh maith le foghlaim ó thaithí ár gcomhghleacaithe Gearmánacha.
Tabharfaidh an grúpa, lena n-áirítear an Státrúnaí Sláinte, an Dr Antje Draheim agus Comhairleoir Sinsearach sa tSláinte Phoiblí, an Dr Elke Jakubowski, cuairt ar roinnt suíomhanna agus áiseanna cúraim sláinte chun tuiscint níos fearr a fháil ar an gcaoi a gcuirtear seirbhísí ar fáil ar an láthair.
Agus í ag cur fáilte roimh an ngrúpa go hÉirinn, dúirt an Príomhoifigeach Leighis, an tOllamh Breda Smyth:
“Tá an-áthas orm fáilte a chur roimh an Dr Antje Draheim, an Dr Elke Jakubowski agus an toscaireacht uilig go Baile Átha Cliath ar feadh trí lá de chomhroinnt agus d'fhoghlaim faisnéise. Tharraing paindéim COVID-19 béim ar an tábhacht a bhaineann le seirbhísí sláinte poiblí láidre laistigh den tseirbhís sláinte i gcoitinne. Agus an dá thír ag plé na bhfeidhmeanna sláinte poiblí, seo an t-am iontach le foghlaim óna chéile agus tús a chur leis an idirphlé leanúnach maidir le hathchóiriú agus forbairt na sláinte poiblí.
"Tá an Roinn ag an gcéim thosaigh faoi láthair chun straitéis um shláinte phoiblí a fhorbairt a thabharfaidh aghaidh ar na ceithre réimse sláinte poiblí: Feabhsú Sláinte, Feabhsú na Seirbhíse Sláinte, Cosaint Shláinte agus Faisnéis Shláinte. Áireofar leis seo straitéis coiscthe, a thacóidh le sláinte agus folláine sa bhaile, a mbeidh sé mar aidhm aici cúram a mhéadú sa phobal, agus an gá atá le cúram ospidéalbhunaithe a laghdú."