Buaileann an tAire Donnelly le Comhpháirtithe an AE chun athraithigh, tástáil agus rolladh amach pleananna vacsaínithe COVID-19 a phlé
- Foilsithe: 1 Márta 2021
- An t-eolas is déanaí: 11 Aibreán 2025
Bhuail an tAire Sláinte, Stephen Donnelly, lena chomhghleacaithe san AE inniu chun tionchar na n-athraitheach ar Bhallstáit, straitéisí tástála náisiúnta, agus an gá atá le comhroinnt faisnéise ar rolladh amach náisiúnta pleananna vacsaínithe COVID-19 a phlé. Bhí ionadaithe ón gCoimisiún Eorpach, ón Lárionad Eorpach um Ghalair a Chosc agus a Rialú (ECDC) agus ón nGníomhaireacht Eorpach Leigheasra (EMA) in éineacht le hairí sláinte an AE ar an bhfíschomhdháil.
Dúirt an tAire Donnelly,
“Caithfimid gníomhú anois chun dul i ngleic leis an mbagairt a bhaineann le hathraithigh COVID-19 atá ag teacht chun cinn agus a bheidh ann amach anseo. Tá sé ríthábhachtach éifeachtacht na vacsaíní atá ann cheana agus vacsainí nuafhorbartha a chosaint agus a chothabháil.
“Fáiltímid roimh chumarsáid an Choimisiúin maidir le Goradán HERA chun bonn eolais a chur faoi ghníomhaíocht ina leith seo. Cuirimid fáilte ar leith roimh an bhfócas ar athraithigh a bhrath go tapa agus ar phróisis údaraithe vacsaíní a shruthlíniú."
D'athdhearbhaigh an tAire Donnelly tacaíocht iomlán na hÉireann do chur chuige coiteann an AE i leith vacsaíní a sholáthar, agus dúirt sé
“Tá sé ríthábhachtach go gcomhlíonfaidh na cuideachtaí na gealltanais a tugadh chun an méadú suntasach a bhfuiltear ag súil leis a éascú i rith na ráithe seo."
D'athdhearbhaigh an tAire Donnelly freisin tacaíocht na hÉireann do rannchuidiú an AE do COVAX agus leag sé béim ar ról ceannaireachta an AE maidir le dáileadh cothrom domhanda vacsaíní COVID-19:
“Is é seo an rud eiticiúil le déanamh agus tá sé chun leasa gach duine, mar ní bheidh aon duine sábháilte go dtí go mbeidh gach duine sábháilte."
CRÍOCH