Fáiltíonn na hAirí Sláinte roimh dhul chun cinn suntasach i seirbhísí Sláinte na mBan agus iad ag seoladh Sheachtain Sláinte na mBan.
- Foilsithe: 6 Márta 2023
- An t-eolas is déanaí: 10 Márta 2023
- Scéim Frithghiniúna Saor in Aisce Seolta agus Leathnaithe
- Sainchlinicí Meanapáis Rollta Amach
- Seirbhísí Inmheatróise Leathnaithe
Tá an tAire Sláinte Stephen Donnelly TD; an tAire Sláinte Poiblí, Folláine agus an Straitéis Náisiúnta Frithdhrugaí Hildegarde Naughton TD agus an tAire Meabhairshláinte agus Daoine Aosta Mary Butler TD tar éis aird a tharraingt ar na dul chun cinn suntasach i soláthar Sláinte na mBan agus iad ag seoladh an dara Seachtain bhliantúil Sláinte na mBan.
An tseachtain seo freisin, beidh bliain amháin ann ó seoladh Plean Gníomhaíochta um Shláinte na mBan 2022-2023 - straitéis lánchistithe chun sláinte na mban in Éirinn a fheabhsú.
San am sin, tháinig forbairtí suntasacha ar sholáthar cúraim do mhná thar gach céim den saol, lena n-áirítear scéim frithghiniúna saor in aisce a chur i bhfeidhm do mhná 17-26 bliana d'aois, bunú Mol Torthúlachta Réigiúnacha, infheistíocht shuntasach sa Straitéis Náisiúnta Máithreachais, infheistíocht in dhá shainionad inmheatróise for-réigiúnacha le haghaidh cúram casta agus cúig fhoireann idirdhisciplíneach chun tacú le cóireáil iomlánaíoch inmheatróise i ngach ceann de na líonraí máithreachais, chomh maith le Sainchlinicí Meanapáis.
Sheol an Roinn Sláinte an chéad Seachtain Feasachta Meanapáis náisiúnta riamh agus láithreán gréasáin tiomnaithe gov.ie/menopause chun eolas, feasacht agus tacaíochtaí a fheabhsú ionas gur féidir le mná a n-eispéireas ar an meanapás a bhainistiú go réamhghníomhach.
Le fócas ar shláinte na mban a fheabhsú trí chosc agus idirghabháil luath, chuir infheistíocht mhéadaithe tacaíochtaí cúraim phríomhúil breise ar fáil, rochtain fheabhsaithe ar thacaíochtaí agus ar thionscnaimh meabhairshláinte chun glacadh seirbhísí scagthástála a fheabhsú.
Dúirt an tAire Donnelly:
“Tá sé dochreidte machnamh a dhéanamh ar na garspriocanna go léir atá bainte amach i mbliain amháin, rud a chruthaíonn go bhfuil réabhlóid fhadtéarmach chúram sláinte na mban in Éirinn faoi lán seoil.
“Tá sé mar thosaíocht agam mar Aire Sláinte éisteacht le mná agus freagairt dá n-iarratais ar sheirbhísí feabhsaithe ar gach leibhéal, agus comhionannas rochtana ar na seirbhísí sin.
“Táimid ag obair chun a chinntiú go bhfaigheann mná ar fud na tíre an cúram a theastaíonn uathu ag an am a dteastaíonn sé uathu agus bhí an deis agam bualadh le hothair atá ag baint tairbhe as na feabhsuithe seo cheana féin.
“Tá i bhfad níos mó le déanamh againn áfach agus i rith Sheachtain Sláinte na mBan beimid ag fógairt tuilleadh forbairtí a athróidh eispéireas cúram sláinte na mban in Éirinn."
Dúirt an tAire Sláinte Poiblí, Folláine agus an Straitéis Náisiúnta Frithdhrugaí Hildegarde Naughton:
“Is sainchomhartha é Plean Gníomhaíochta Sláinte na mBan 2022-2023 maidir le ceapadh beartais – ag cur mná i gcroílár an phróisis déanta beartais. Cuireann sé ar ár gcumas cúram níos fearr agus níos tráthúla a thairiscint do mhná le seirbhísí oiriúnaithe thar gach aoisghrúpa, ag méadú deiseanna do mhná a bheith ina gcomhpháirtithe ina gcúram sláinte féin.
“Níor chóir go mbraithfeadh mná riamh gur ualach é a n-inscne agus táimid ag cabhrú chun aghaidh a thabhairt ar neamhionannais sláinte inscne trí go leor tionscnamh, mar shampla clár an anáis mhíosta agus an scéim frithghiniúna saor in aisce.
“Táimid ag obair freisin chun cur chuige réamhghníomhach i leith sláinte a chur chun cinn trí ghlacadh seirbhísí scagthástála a fheabhsú, go háirithe i measc grúpaí imeallaithe."
Dúirt an tAire Meabhairshláinte agus Daoine Aosta Mary Butler:
“Le bliain anuas, tá €1.9m infheistithe ag Ciste Sláinte na mBan chun dlús a chur le forbairt raon seirbhísí meabhairshláinte, lena n-áirítear tacaíochtaí meabhairshláinte imbhreithe, saintacaíochtaí maidir le neamhord itheacháin, agus tacaíochtaí meabhairshláinte spriocdhírithe do dhaoine leochaileacha lena n-áirítear mná i andúil agus mná imeallaithe.
“Is ionann mná agus leath ár ndaonra agus mar sin caithfear a riachtanais a léiriú agus aghaidh a thabhairt orthu ar an mbealach a dtugaimid aghaidh ar ár seirbhísí cúram sláinte go léir. Táim ag tnúth le sonraí faoi thionscnaimh fhorásacha a roinnt sna laethanta amach romhainn a chuirfidh tuilleadh le soláthar seirbhísí meabhairshláinte do mhná in Éirinn."
Dúirt Príomhoifigeach Altranais, Cosantóir Shláinte na mBan sa Roinn Sláinte agus Comhchathaoirleach Thascfhórsa Sláinte na mBan Rachel Kenna:
“Ó foilsíodh Plean Gníomhaíochta Sláinte na mBan 2022-2023, chonaiceamar móiminteam mór sna forbairtí ar sholáthar cúram sláinte na mban, le leathnú tapa agus seirbhísí den chéad scoth á seachadadh sa bhliain.
“Ó fhrithghiniúint go sos míostraithe, táimid ag seachadadh tacaíochtaí agus seirbhísí nua atá ag déanamh difríocht intomhaiste do shaol na mban in Éirinn.
“Leanfaidh an Roinn Sláinte, Tascfhórsa Sláinte na mBan, FSS agus príomhpháirtithe ag cur sláinte na mban chun cinn, le fócas úr ar thaighde, rochtain agus faisnéis - rud a thugann an infheistíocht agus an aird dhírithe atá tuillte ag Sláinte na mBan."
Nótaí don Eagarthóir:
Arna sheoladh i mí an Mhárta 2022, d'fhorbair an Roinn Sláinte Plean Gníomhaíochta um Shláinte na mBan 2022-2023, i gcomhpháirtíocht le FSS, an Clár Náisiúnta um Shláinte na mBan agus na Naíonán, an Institiúid Eorpach um Shláinte na mBan, Coláiste Dhochtúirí Teaghlaigh Éireann, agus Comhairle Náisiúnta na mBan in Éirinn trí obair Thascfhórsa Sláinte na mBan. Bunaíodh Ciste Sláinte na mBan (€10 milliún) mar chuid de Phlean Gníomhaíochta um Shláinte na mBan 2022-2023 chun tionscnaimh agus infheistíochtaí nua a chistiú.
Buaicphointí feabhsaithe sláinte:
- Frithghiniúint – Tugadh an scéim frithghiniúna saor in aisce do mhná idir 17 agus 25 bliana d'aois isteach i mí Mheán Fómhair 2022 agus tá sí leathnaithe chuig mná 26 bliain d'aois ó shin. Leathnófar é chuig mná atá 30 bliain d'aois agus níos óige a áireamh faoi Mheán Fómhair 2023.
- Clinicí Gínéiceolaíochta Siúlach – Táimid ag méadú acmhainne agus ag laghdú amanna feithimh do mhná trí líonra clinicí gínéiceolaíochta siúlach ilfhreastail “féach agus cóireáil” a bhunú ar fud na tíre. Tá 12 de na 20 clinic pleanáilte i bhfeidhm faoi láthair, agus an chuid eile á bhforbairt.
- Inmheatróis – Táimid ag bunú dhá sheirbhís inmheatróise casta foréigiúnacha i dTamhlacht agus i gCorcaigh. Tacóidh líonra seirbhísí moil inmheatróise réigiúnacha, atá á bhforbairt, agus a chomhordóidh cúram laistigh dá nGrúpaí Ospidéil faoi seach, leis na seirbhísí casta seo.
- Meanapás: Tá 5 chlinic speisialaithe meanapáis i bhfeidhm anois (An tOspidéal Náisiúnta Máithreachais, Ospidéal Ginearálta an Aonaigh, Ospidéal an Rotunda, Ospidéal na hOllscoile Gaillimh agus Ospidéal an Choim), agus tá an 6ú ceann le hoscailt in Ospidéal Máithreachais Ollscoil Chorcaí i mbliana. Déileálfaidh na 6 chlinic, ceann i ngach líonra máithreachais, le mná a dteastaíonn sainchúram casta uathu. Is féidir cóireáil a chur ar fhormhór na mban atá i bpeirea-mheanapás agus meanapás sa phobal agus mar thaca leis sin, seoladh Treoir Thagartha Thapa GP maidir leis an Meanapás in 2022.
- Feachtas Feasachta ar an Meanapás – reáchtáladh an chéad Fheachtas Feasachta náisiúnta ar an Meanapás in 2022, agus sheol an Roinn Sláinte gov.ie/menopause freisin, ionad ilfhreastail le haghaidh faisnéise faoi mheanapás agus a siomptóim chomh maith le comhairle maidir le bainistíocht réamhghníomhach.
- Máithreachas – Leithdháileadh €8.66 milliún ar an Straitéis Náisiúnta Máithreachais in 2022, ag foráil d'fhorbairt bhreise ar sheirbhísí cnáimhseachais pobail, leathnú ar thacaíochtaí um bheathú cíche, rochtain fheabhsaithe ar sheirbhísí gaolmhara agus speisialaithe agus oiliúint agus tacaíochtaí oideachais neartaithe don fhoireann. Tá feabhas á chur ar bhonneagar ár seirbhísí máithreachais leis an infheistíocht seo freisin trí sheomraí breithe breise ón mbaile a sholáthar agus uasghráduithe ar obrádlanna agus bardaí.
- Torthúlacht Tá Moil Torthúlachta Réigiúnacha á mbunú i ngach ceann de na sé líonra máithreachais d'fhonn idirghabháil saincheaptha íseal-leibhéil a sholáthar d'othair a bhfuil saincheisteanna torthúlachta acu. Cuireadh €11.7 milliún ar fáil chun an chéad Ard-Ionad Náisiúnta AHR a fhorbairt, ag seachadadh IVF agus ICSI trí chlinic poiblí go hiomlán atá sceidealta le hoscailt in 2024, agus chun tacú, mar bheart eatramhach, le hothair rochtain a fháil ar chóireáil phríobháideach AHR.
- Meabhairshláinte – In 2022, d'infheistigh Ciste Sláinte na mBan €1.9 milliún chun dlús a chur le forbairt raon seirbhísí chun tacú le mná agus cailíní. Áiríodh orthu seo rochtain ar sheirbhísí meabhairshláinte digiteacha a mhéadú, tacaíochtaí meabhairshláinte imbhreithe a fheabhsú, tacaíochtaí um neamhord itheacháin a fheabhsú, tacaíochtaí meabhairshláinte spriocdhírithe a sholáthar do mhná imeallaithe agus do mhná in andúil agus freagairt do riachtanais cailíní óga atá i mbaol síocóise a fhorbairt.
- HPV – Clár Athdheise Vacsaín HPV Laura Brennan a rolladh amach chun an vacsaín HPV a sholáthar dóibh siúd nach bhfuair an vacsaín ar scoil.