Fógraíonn an tAire Sláinte nuashonruithe ar Chlár Vacsaínithe COVID-19 na hÉireann - Dé Sathairn an 29 Eanáir 2022
- Foilsithe: 29 Eanáir 2022
- An t-eolas is déanaí: 12 Aibreán 2025
Ghlac an tAire Sláinte, Stephen Donnelly TD, le moltaí nua maidir le clár vacsaínithe COVID-19 na hÉireann.
Rinne an Coiste Comhairleach Náisiúnta Imdhíonta (NIAC) na moltaí nua don Phríomhoifigeach Leighis (CMO), a thacaigh leis na moltaí seo.
Tar éis don Ghníomhaireacht Leigheasra Eorpach (EMA) údarú margaíochta coinníollach a dheonú don vacsaín COVID-19 ó Novavax Nuvaxovid (ar a dtugtar NVX-CoV2373 freisin), mhol NIAC gur féidir an vacsaín seo a úsáid dóibh siúd atá 18 mbliana d’aois agus níos sine.
Dúirt an tAire Donnelly:
“Fáiltím roimh an nuashonrú seo ar ár gclár teanndáileoige, agus ba mhaith liom buíochas ó chroí a ghabháil le baill uile an NIAC as a gcuid oibre leanúnach ag tacú le Clár Vacsaínithe COVID-19 na hÉireann.
“Is é seo an cúigiú vacsaín COVID-19 atá údaraithe le húsáid in Éirinn agus is ábhar breise é seo lenár gclár vacsaínithe mar go dtugann sé rogha eile do dhaoine fásta nach bhfuil vacsaín faighte acu go fóill nó atá páirt-vacsaín faighte acu. Is vacsaín spícephróitéin-bhunaithe í an vacsaín áirithe seo, Nuvaxovid, agus is í an chéad vacsaín COVID-19 a ceadaíodh atá bunaithe ar an vacsaín a úsáidtear sna vacsaíní atá ann cheana a bhfuil cur amach againn orthu, lena n-áirítear Heipitíteas B agus triuch.
“Tá sé léirithe go bhfuil an vacsaín thar a bheith éifeachtach chun galair shiomptómacha, mheasartha agus throma a chosc. Táimid ag súil go mbeidh an vacsaín ar fáil an mhí seo chugainn, agus mholfainn do na daoine atá fós le teacht chun cinn le haghaidh príomhchúrsa vacsaíne COVID-19 é sin a dhéanamh.
“Beidh an vacsaín seo oiriúnach freisin do na daoine sin nach raibh in ann leas a bhaint as vacsaín COVID-19 eile mar gheall ar fhrithtásca leighis m.sh. frithghníomhú ailléirgeach. Tugtar an vacsaín i dhá dháileog le eatramh de thrí seachtaine idir na dáileoga.
“Is é príomhchuspóir an vacsaínithe breoiteacht thromchúiseach agus bás a chosc – leanann vacsaíní COVID-19 le bheith thar a bheith éifeachtach maidir leis seo agus mar sin tá sé fíorthábhachtach go ndéanfaidh aon duine nach bhfuil aon chúrsa den vacsaín COVID-19 faighte aige amhlaidh chomh luath agus is féidir, lena n-áirítear iad siúd idir 5 - 11 bliana d'aois atá i dteideal vacsaín Pfizer a fháil.
“Léiríonn an fhianaise freisin gur lú an baol ionfhabhtaithe dóibh siúd ar tugadh teanndáileog dóibh agus, má tá siad ionfhabhtaithe, nach mbíonn siad chomh tógálach do dhaoine eile, i gcomparáid leo siúd nach bhfuil an teanndáileog faighte acu. Mura bhfuil do theanndáileog faighte agat fós, déan é sin chomh luath agus is féidir le do thoil - cosnóidh sé tú féin agus na daoine mórthimpeall ort.”
Oibreoidh an Roinn Sláinte agus FSS anois chun na nuashonruithe seo a chur i bhfeidhm.