Fógraíonn an tAire Sláinte Poiblí, Folláine agus an Straitéis Náisiúnta Drugaí Hildegarde Naughton maoiniú €500,000 do thionscadail snámha taobh amuigh
- Foilsithe: 4 Aibreán 2024
- An t-eolas is déanaí: 12 Aibreán 2025
D'fhógair an tAire Sláinte Poiblí, Folláine agus an Straitéis Náisiúnta Drugaí Hildegarde Naughton inniu scéim nua mhaoinithe €500,000 d'áiseanna snámha taobh amuigh ar fud na hÉireann.
Aithníonn an tionscnamh Éire Shláintiúil an fás atá tagtha ar an tóir ar shnámh lasmuigh le blianta beaga anuas, chomh maith leis na buntáistí sláinte a bhaineann leis.
Bronnfar deontais suas le €30,000 ar thionscadail a chumasaíonn rannpháirtíocht níos leithne i snámh taobh amuigh, trí rochtain a fheabhsú, seomraí gléasta a fhorbairt agus a fheabhsú agus trealamh a sholáthar chun cabhrú le daoine faoi mhíchumas.
Tabharfaidh Spórt Éireann an maoiniú thar ceann na Roinne Sláinte, agus osclófar iarratais ón lá amárach Dé hAoine 5 Aibreán go dtí Dé hAoine an 17 Bealtaine, chun tús a chur leis na hoibreacha roimh shéasúr an tsamhraidh.
Dúirt an tAire Naughton:
“Tá an suim atá ag daoine i snámh amuigh faoin aer tar éis fás le blianta beaga anuas, agus mar shnámhaí rialta mé féin, tuigim go maith na buntáistí uilig a bhaineann leis dár bhfolláine fhisiciúil agus mheabhrach. Ar mhaithe leis an spéis i snámh amuigh faoin aer a chothú ar fud na tíre, bhí áthas orm maoiniú €500,000 a fháil mar chéad chéim den scéim nua seo i mBuiséad 2024.
"Cinnteoidh an maoiniú seo go mbeidh rochtain níos fearr ag tuilleadh daoine ar na láithreacha snámha lasmuigh ar fud na hÉireann. Is í an sprioc atá againn ná deiseanna a chruthú do dhaoine de gach aois teacht le chéile chun taitneamh a bhaint as gníomhaíocht choirp.
“Ní hamháin go ndéanann snámh ar ár dtránna iontacha agus inár lochanna áille maitheas don chorp agus don intinn, cuireann sé lenár bpobal sóisialta ar fud na tíre freisin.
“Tá mé ag iarraidh ar gach díograiseoir snámha taobh amuigh, agus ar ár gComhpháirtíochtaí Spóirt Áitiúla, machnamh a dhéanamh ar an áit ina gceantair féin a d'fhéadfadh a bheith go maith don scéim, go háirithe maidir le hathrú foscaidh, céimeanna nó ráillí láimhe isteach san uisce a chur isteach, agus iarratas a dhéanamh don mhaoiniú mar chuid den scéim nua seo.
“Tá mé ar bís na tionscadail rathúla a fheiceáil ag feidhmiú go cumasach agus réidh le húsáid ar fud na hÉireann, chomh luath leis an samhradh seo."
Dúirt Príomhfheidhmeannach Spórt Éireann Una May:
“Cuireann Spórt Éireann fáilte mhór roimh fhógra an Aire sula bhfoilseofar an chéad Straitéis Náisiúnta Snámha in Éirinn níos déanaí i mbliana. Tá rannpháirtíocht sa spórt agus i ngníomhaíocht choirp thar a bheith tábhachtach d'fholláine fhisiciúil agus mheabhrach ár ndaonra.
"Sáraíonn snámh faoin aer go leor bacainní geografacha agus eacnamaíocha, agus trí na Comhpháirtíochtaí Spóirt Áitiúla agus na hÚdaráis Áitiúla, oibreoimid i gcomhar le Snámh Éireann agus le hÉire Shláintiúil chun an úsáid de láithreacha snámha cosúil le haibhneacha, lochanna agus farraigí ar fud na tíre a mhéadú."
Dúirt Príomhfheidhmeannach Swim Ireland, Sarah Keane:
“Ba mhaith liom buíochas a ghabháil leis an Aire as a tiomantas don Straitéis Náisiúnta Snámha, trí ghníomh láithreach, tríd an tacaíocht mhaoinithe seo a chur ar fáil do na hÚdaráis Áitiúla agus do Chomhpháirtíochtaí Spóirt Áitiúla.
"Tá ríméad ar Swim Ireland a bheith ag obair leo agus le Spórt Éireann chun treoir agus comhairle a chur ar fáil maidir leis an méid a d'fhéadfadh cabhrú le rannpháirtíocht i snámh faoin aer a mhéadú, agus conas rochtain níos fearr a chinntiú. Is iontach an rud é a bheith inár gcónaí i dtír ina bhfuil láithreacha dochreidte lasmuigh ann, agus ina bhfuil sláinte agus folláine an phobail mar thosaíocht ag an Aire féin."
Dúirt an Príomhoifigeach Leighis, an tOllamh Breda Smyth:
“Tá go leor buntáistí sláinte coirp agus meabhrach a bhaineann le snámh lasmuigh, cosúil le folláine chardashoithíoch a fheabhsú, córais imdhíonachta a neartú, brú fola agus leibhéil struis a laghdú agus codladh níos fearr a chinntiú.
“Tá lúcháir orm go gcabhróidh maoiniú Éire Shláintiúil le snámh a dhéanamh níos ionchuimsithí agus níos inrochtana in áiteanna ar fud na tíre, ag cur leis an réimse tacaíochtaí a forbraíodh le blianta beaga anuas le Spórt Éireann.
“Tá na céimeanna seo tábhachtach, go háirithe i gcomhthéacs ár n-aidhme de fhís Éire Shláintiúil d’Éirinn níos gníomhaí agus ar deireadh thiar, daonra níos sláintiúla a bhaint amach. "
Nótaí:
Is féidir iarratais ar Chiste Bonneagair Snámha Lasmuigh d'Éire Shláintiúil a dhéanamh anseo.
An próiseas iarratais
Tá Comhpháirtíocht Áitiúil Spóirt (CÁS) incháilithe chun iarratas a dhéanamh ar Chiste Bonneagair Snámha Lasmuigh d'Éire Shláintiúil. Arna éascú ag Spórt Éireann, oibreoidh CÁSanna go dlúth le húdaráis áitiúla agus le clubanna agus grúpaí snámha áitiúla chun na criosanna snámha is oiriúnaí ina gceantar féin a aithint le haghaidh tacaíochta faoin scéim seo, a osclófar d'iarratais ar an 5 Aibreán agus a dhúnfaidh ar an 17 Bealtaine.
Chun críche an chiste seo, is féidir le CÁSanna iarratas a dhéanamh ar thacaíocht faoi dhá shruth maoinithe. Tá aidhm gach srutha liostaithe thíos:
Sruth a hAon – Bonneagar Snámh faoin aer a Neartú
- Tacaíocht mhaoinithe suas le €30,000 ar a mhéad a chur ar fáil do réitigh nuálacha agus chruthaitheacha chun feabhas a chur ar áiseanna athraitheacha ag láithreacha snámha lasmuigh.
- Tacaíocht mhaoinithe suas le €30,000 a chur ar fáil chun inrochtaineacht ghinearálta ar chriosanna snámha sábháilte a fheabhsú.
- Tacaíocht mhaoinithe suas le €30,000 a chur ar fáil chun feabhas a chur ar áiseanna stórála do chathaoireacha rothaí trá agus/nó trealamh cuimsitheach chun tacú le hinrochtaineacht ar chriosanna snámha sábháilte do chách.
- Tacaíocht mhaoinithe suas le €30,000 a chur ar fáil do réitigh nuálacha agus chruthaitheacha chun rochtain ar chriosanna snámha sábháilte a fheabhsú do dhaoine faoi mhíchumas.
- Tacaíocht mhaoinithe suas le €10,000 a chur ar fáil d'fheabhsuithe rochtana a bhaineann go sonrach le céimeanna agus ráillí láimhe chun cabhrú le tacaíocht dul isteach san uisce agus é a fhágáil chun críche snámha.
Sruth a Dó – Trealamh Snámha faoin aer
- Tacaíocht mhaoinithe suas le €10,000 a chur ar fáil do threalamh ar nós áiseanna baoitheachta, sainchathaoireacha rothaí, trealamh chun tacú le daoine faoi mhíchumas dul isteach san uisce chun snámh.
- Tacaíocht mhaoinithe suas le €10,000 a chur ar fáil do mhaidí trá a thacaíonn le húsáideoirí cathaoireacha rothaí isteach ar an trá chun teacht ar uisce.
- Tacaíocht mhaoinithe suas le €10,000 a chur ar fáil do réitigh nuálacha agus chruthaitheacha do threalamh snámha ar scála beag ag láithreacha snámha lasmuigh chun níos mó deiseanna a chruthú do dhaoine páirt a ghlacadh sa snámh lasmuigh.
Is féidir le gach iarratas a bheith ina shruth uatha amháin nó meascán den dá shruth. Áfach, tá iarratais iomlána teoranta d'uasmhéid iomlán de €30,000.
Spórt Éireann
Is é Spórt Éireann an t-údarás a bhfuil sé de chúram air maoiniú dírithe a threorú, a mholadh agus a chur ar fáil d'fhorbairt an spóirt in Éirinn. Is í fís Spórt Éireann ná Éire ghníomhach inar féidir le gach duine taitneamh a bhaint as na buntáistí a bhaineann le spórt agus gníomhaíocht choirp ar feadh an tsaoil.
Is é príomhchuspóir líonra Comhpháirtíochtaí Spóirt Áitiúla Spórt Éireann forbairt leanúnach deiseanna spóirt agus gníomhaíochta coirp ar ardchaighdeán a chumasú ar fud na tíre, i dtimpeallacht a chuireann stíleanna maireachtála sláintiúla chun cinn, an rannpháirtíocht is mó agus atá cuimsitheach agus fáilteach do chách. Éascaíonn an líonra CÁS spórt agus gníomhaíocht choirp ag leibhéal áitiúil trí oibriú le clubanna, cóitseálaithe agus oibrithe deonacha, agus trí thacú le comhpháirtíochtaí le heagraíochtaí eile agus le grúpaí pobail. Tá 29 CÁSanna i 31 ceantar Údaráis Áitiúil in Éirinn.