Foilsíonn an tAire Sláinte Tuarascáil ar Dhul chun Cinn Lárbhliana Sláintecare don bhliain 2021
- Foilsithe: 10 Meán Fómhair 2021
- An t-eolas is déanaí: 12 Aibreán 2025
D’fhoilsigh an tAire Sláinte, Stephen Donnelly TD Tuarascáil ar Dhul chun Cinn Lárbhliana Sláintecare. Sonraítear sa tuarascáil 112 bunsprioc inghnóthaithe, ar an iomlán, do na chéad 6 mhí den bhliain seo. As na 112 bunsprioc inghnóthaithe siúd, cuirfear 109 díobh i gcrích nó rinneadh iad a thabhairt chun cinn mar a bheartaítear.
Sonraítear sa tuarascáil an dul chun cinn a rinneadh sna chéad sé mhí den bhliain, in aghaidh na dtosaíochtaí agus na ngníomhartha a mhionsonraítear i Straitéis agus Plean Gníomhaíochta 2021-2023 agus dírítear ann ar dhá chlár athchóirithe:
- Clár a hAon: Díríonn Rochtain Shábháilte Thráthúil a Fheabhsú ar Chúram agus Sláinte agus Folláine a Chur chun Cinn, ar imeascadh, sábháilteacht, cosc, an chúraim go dtí an láthair cheart, táirgiúlacht, toilleadh breise agus spriocanna tréimhse feithimh Sláintecare a bhaint amach
- Clár a Dó: Díríonn Dul i nGleic le Neamhionannas Sláinte ar dhul i ngleic le neamhionannas sláinte i dtreo cúram sláinte uilíoch
Forbraíodh aon Tionscadal déag agus déantar iad a ailíniú le príomhstraitéisí, príomhbheartais agus príomhthionscnaimh náisiúnta:
- rinneadh an Réamhchás Gnó Ospidéal Roghnach a chur chun cinn go mór. Beidh na hospidéil lonnaithe i mBaile Átha Cliath, Corcaigh agus Gaillimh
- rinneadh cur i bhfeidhm an Chláir Ríomhshláinte a chur chun cinn go mór
- rinne Ciste Lánpháirtíochta Sláintecare triail phíolótach a bhaint as agus tástáil ar sheirbhísí a sholáthraíonn cúram sa phobal. Sheachain seo daoine a thabhairt go dtí an t-ospidéal, laghdaigh sé an líon daoine a bhí ag freastal ar an Roinn Éigeandála agus laghdaigh sé liostaí feithimh i sainlimistéir, cosúil le hÚireolaíocht, Ortaipéidic agus Cairdeolaíocht
- tá measúnú á dhéanamh ar na tionscadail seo faoi láthair i dtaobh cistiú leanúnach agus príomhshruthú, agus sainaithníodh 41 tionscadal Chiste Lánpháirtíochta Sláintecare lena bpríomhshruthú agus lena scálú trasna na seirbhíse sláinte go príomha faoin gCiste Cúraim Pobail Breisithe. Príomhghné é Cúram Pobail Breisithe (CPB) de Sláintecare a sholáthar agus is ionann agus aistriú cúraim ó ospidéil ghéarmhíochaine isteach sa phobal agus níos gaire d’áiteanna cónaithe daoine, ar aon dul le fís ‘An Cúram san Áit Cheart, ag an Am Ceart’ Sláintecare
- tá na Líonraí Cúraim Sláinte Pobail (LCSPanna) agus Foirne Idirghabhála Pobail á dtabhairt isteach faoi láthair. Tacaíonn LCSPanna lenár n-aidhm chun níos mó cúraim a sholáthar sa phobal. Tacóidh na Líonraí seo le daoine maireachtáil níos neamhspleáiche ina bpobal trí sheirbhísí a chomhordú agus a chomhtháthú
Dúirt an tAire Donnelly:
"Is í fís Sláintecare córas sláinte agus cúraim shóisialta uilíoch aonsraithe a bhaint amach, ina mbíonn an teacht céanna ag gach duine ar sheirbhísí bunaithe ar riachtanas, seachas ar chumas chun íoc as. As na 112 bunsprioc inghnóthaithe a shonraítear sa tuarascáil lárbhliana, cuirfear 109 i gcrích mar a bheartaítear nó tá siad á gcur chun cinn.
"Nuair a chuirtear san áireamh an méid a cuireadh roimh an tseirbhís sláinte le 18 mí, is dul chun cinn as cuimse é seo agus léiríonn sé go soiléir obair dhian agus tiomantas na foirne fud fad na Roinne Sláinte, FSS agus na n-eagraíochtaí comhpháirtíochta go léir a oibríonn le chéile chun Sláintecare a sholáthar.
"Mar an tAire Sláinte, is iad mo thosaíochtaí anois cur leis an rath a bhí orainn go dtí seo a mhionsonraítear sa tuarascáil seo trí Phlean mionsonraithe Liosta Feithimh a chur i bhfeidhm, obair a chur chun cinn chun Ospidéil Roghnacha nua a thógáil timpeall na tíre, nuálaíocht chomhtháthaithe a scálú agus a phríomhshruthú agus an Clár Ríomhshláinte a chur i bhfeidhm."
Tá an Tuarascáil ar Dhul chun Cinn Lárbhliana Sláintecare don bhliain 2021 ar fáil anseo.
Nótaí
Éachtaí Sláintecare go dtí seo
- cinneadh chun Sláintecare a chistiú ar na leibhéil a bheartaítear san Athbhreithniú Acmhainne ar an tSeirbhís Sláinte (2018), sláinte agus folláine, agus cúram pobail breisithe san áireamh
Rinne Sláintecare infheistiú mór i seirbhísí a fhairsingiú a chuirfear ar fáil sa phobal, i dtaobh foirne agus trí Ionaid Chúraim Phríomhúil. Rinneamar breisiúcháin mhóra a chur ar fáil dár mbuanlucht saothair agus rinneamar ár mbonneagar a uasghrádú chun barr feabhais a chur ar acmhainn ár seirbhísí sláinte.
- Cistíodh Líonraí Cúraim Sláinte Pobail chun seirbhísí comhtháite a sholáthar do dhaoine níos gaire don áit chónaithe
- Moil Chúraim Chomhtháite do Dhaoine Breacaosta agus Daoine ar a bhfuil Galair Ainsealacha
- An Oifig um Shábháilteacht Othar a bhunú
- Réamhchás Gnó d’ospidéil roghnacha curtha chun cinn agus infheistíocht déanta in obrádlann roghnach Thamhlachta
- Spriocthionscnaimh laghdaithe liostaí feithimh
- Oidis a aistriú go leictreonach ón DG go dtí an chógaslann
- Cuireadh dlús faoi Aitheantóirí Sláinte Aonair a chur chun feidhme i rith na paindéime mar mhodh lena chinntiú gur cruthaíodh taifid uathúla leictreonacha sláinte dóibh siúd go léir a bhí á vacsaíniú. Bhain tábhacht ar leith leis seo i gcás clár náisiúnta, ar nós chlár vacsaínithe COVID-19, ina raibh a vacsaíniú á fháil ag daoine ag láithreacha éagsúla agus ó ghairmithe cúraim sláinte éagsúla. Bailíodh sonraí chun sannadh Aitheantóirí Sláinte Aonair (ASAanna) a éascú do thaifid vacsaínithe, agus chumasaigh sé Deimhnithe Vacsaínithe Covid Digiteacha (DCDanna) a chruthú nuair a baineadh srianta taistil an 19 Iúil, agus eisíodh breis agus 3.6 milliún DCD go dtí seo
- Teacht díreach ar dhiagnóisic ag Cleachtas Ginearálta
- Teidlíocht mhéadaithe do chúram DG agus laghdú ar tháillí oidis
- Tá comhaontú conartha DG le tacú le galair ainsealacha a bhainistiú
- Pacáistí méadaithe cúraim baile
- Comhfhóram DGanna a bhunú
- Tá tionscadail Ciste Lánpháirtíochta Sláintecare i mbreis agus 100 láthair fud fad na tíre, agus idir ospidéil, grúpaí ospidéal, Eagraíochtaí Cúraim Sláinte Pobail, eagraíochtaí pobail agus deonacha, Ollscoileanna agus Ionaid Chúraim Phríomhúil atá i gcomhpháirtithe an tionscadail. Tá an cúram ceart, san áit cheart, ag an am ceart, agus an bhfoireann cheart á sholáthar ag na tionscadail seo, agus dírítear ar chosc, cúram pobail agus comhtháthú an chúraim i measc gach suímh sláinte agus chúraim shóisialta. Rinneadh 41 tionscadal imeasctha a phríomhshruthú cheana féin, go príomha tríd an gciste Cúraim Pobail Bhreisithe agus tá súil leis go ndéanfar níos mó a phríomhshruthú mar chuid de phróiseas Bhuiséad 2022
- Déanfar infheistíocht in Éire Shláintiúil agus i gcur chun cinn na sláinte poiblí, an Beartas agus Plean Gníomhaíochta maidir le Murtall, an Plean Náisiúnta Gníomhaíochta Coirp agus an Straitéis Sláinte Ghnéis, agus Alcól agus Tobac a Chaitheamh a Chosc san áireamh
- Rinne an Rialtas Cinntí Tábhachtacha Bunúsacha, Bord FSS a bhunú, agus an tíreolaíocht a cheadú do shé limistéar nua sláinte réigiúnacha san áireamh