Cuireann an tAire Sláinte fáilte roimh thús an fhiosrúcháin ar úsáid Valpróáit Sóidiam
- Foilsithe: 22 Iúil 2025
- An t-eolas is déanaí: 23 Iúil 2025
Chuir an tAire Sláinte Jennifer Carroll MacNeill TD, fáilte inniu roimh thús an fhiosrúcháin neamhreachtúil ar úsáid agus cheadúnú stairiúil Valpróáit Sóidiam i measc ban atá in aois clainne sa Stát. Beidh Bríd O’Flaherty BL ina cathaoirleach ar an bhfiosrúchán.
Dúirt an tAire Carroll MacNeill:
“Cuirim fáilte roimh thús an fhiosrúcháin, a thabharfaidh deis do na daoine sin a raibh tionchar ag valpróáit sóidiam orthu a scéalta a insint. Bhí mé an-bhuíoch gur bhuail mé le hEagraíocht um Shiondróim Fritrithíochta na hÉireann (OACS Ireland) le déanaí agus tá a fhios agam gur lá tábhachtach é an lá inniu dóibh, chomh maith leis an teaghlaigh uilig a ndéanann siad ionadaíocht dóibh.
"Táim muiníneach go ndéanfaidh an Cathaoirleach fiosrúchán atá neamhspleách agus cothrom, a aimseoidh freagraí do na daoine sin a raibh tionchar aige orthu, chomh maith lena dteaghlaigh féin."
Scrúdóidh an fiosrúchán an comhthéacs stairiúil agus reatha d’úsáid Valpróáit Sóidiam trí thrí ghné éagsúil:
Céim an Athbhreithnithe
Beidh céim an athbhreithnithe ann ar dtús, ina leagfar amlíne amach maidir le húsáid Valpróáit Sóidiam i measc ban atá in aois clainne sa Stát, lena n-áirítear faisnéis ar rialachán, oideasú, dáileachán agus eolas maidir le sábháilteacht a tugadh. Déanfaidh an fiosrúchán taifead d’fhorbairt rialála Valpróáit Sóidiam, chomh maith leis na cleachtais a bhaineann le rialú an táirge seo. Beidh sé d’fhreagracht ar an bhfiosrúchán cáipéisí agus iarratais a lorg ó réimse geallsealbhóirí. Cuirfidh an Cathaoirleach béim ar na deacrachtaí a tháinig chun cinn, chomh maith len iad a thaifeadadh, nuair a dhiúltófar iarratais mar chuid dá bhfeidhm tuairiscithe.
Ráitis Phearsanta
Tríd an dara céim den Fhiosrúchán, ceadófar ráitis ó bhéal ó na daoine sin a diagnóisíodh go raibh Neamhord den Speictream Valpróáite san fhéatas orthu (FVSD), a máithreacha agus a mbaill teaghlaigh gur mian leo páirt a ghlacadh san Fhiosrúchán seo. Tabharfar cuireadh fosta do gheallsealbhóirí eile ráitis ó bhéal a thabhairt, i seisiúin éagsúla. Beidh gach seisiún príobháideach.
Cumas na Seirbhíse Sláinte
Díreoidh an tríú céim ar chumas reatha na seirbhíse sláinte a mheas, chun freagairt d’fhadhbanna sábháilteachta a bhaineann le cógais frith-thaomanna (ASMs) i measc ban atá in aois clainne. Mar chuid de seo, déanfar measúnú ar na córais reatha atá i bhfeidhm chun dul i ngleic le fadhbanna sábháilteachta a bhaineann le húsáid valpróáit sóidiam i measc ban atá in aois clainne; moltaí eile a fhorbairt maidir le córais rialála reatha do valpróáit sóidiam agus ASManna eile, chomh maith leis an seirbhísí agus tacaíochtaí atá ar fáil dóibh siúd a raibh tionchar ag valpróáit sóidiam orthu. Cuirfidh torthaí an mheasúnaithe seo bonn eolais faoi fhorbairt seirbhíse don todhchaí.
Tuilleadh Faisnéise
Seolfar feachtas cumarsáide sna seachtainí amach romhainn chun feasacht phoiblí a ardú agus teagmháil leis an bhfiosrúchán a spreagadh.
Cé go bhfuil valpróáit sóidiam éifeachtach agus riachtanach mar leigheas d’othair áirithe, is féidir le cógais le valpróáit sóidiam ann a bheith ina gcúis le héalang ó bhroinn, neamhoird néarafhorbartha agus le huathachas i measc na bpáistí sin a ghlac a máithreacha a leithéid de chógais le linn toirchis.
Níor cheart do mhná ná do chailíní ar tugadh valpróáit sóidiam ar oideas dóibh stop a chur leis an gcógas a ghlacadh gan chomhairle a lorg óna ndochtúir. Ba cheart stop tobann a sheachaint maidir le héirí as an leigheas do thitimeas agus neamhord dépholach a ghlacadh, toisc go bhfuil seans de dhroch-éifeachtaí dáiríre ann don bhean agus, i gcás toirchis, don leanbh gan bhreith.
Le haghaidh tuilleadh eolais faoin bhfiosrúchán, téigh chuig svinquiry.ie/.