Preasráitis

Fógraíonn an tAire Sláinte Poiblí, Folláine agus na Straitéise Náisiúnta Drugaí, Jennifer Murnane O'Connor, na hiarratasóirí rathúla do chiste snámha lasmuigh ar luach €330,000

Ó: An Roinn Sláinte
Foilsithe: 10 Samhain 2025
An t-eolas is déanaí: 13 Samhain 2025

D'fhógair an tAire Sláinte Poiblí, Folláine agus na Straitéise Náisiúnta Drugaí Jennifer Murnane O’Connor TD inniu na hiarratasóirí rathúla ar an scéim mhaoinithe Éire Shláintiúil, ar luach €330,000, d'áiseanna snámha lasmuigh.

Seo an dara bliain den scéim a bhfuil sé mar aidhm aici láithreacha snámha lasmuigh atá ceadaithe, ar fud na hÉireann, a dhéanamh níos inrochtana, rud a chuirfidh ar chumas tuilleadh daoine na buntáistí sláinte a bhaineann le snámh lasmuigh a bhaint amach.

Gheobhaidh gach ceann de na láithreacha snámha i 17 limistéar údaráis áitiúil leithdháiltí, chun tacú le soláthar agus uasghrádú ráillí láimhe, scáthláin snámha, dréimirí rochtana, cláir d’fhógraí sábháilteachta, áiseanna cithfholcadáin agus cathaoireacha rothaí trá.

A bhuí leis na feabhsuithe seo, beidh na suíomhanna ceadaithe seo níos inrochtana, go háirithe do dhaoine a bhfuil a soghluaisteacht laghdaithe acu, agus cuirfear leis an dul chun cinn atá déanta ó tugadh an scéim isteach in 2024.

Dúirt an tAire Murnane O’Connor:

“Tá an t-ádh linn go bhfuil áiseanna snámha lasmuigh iontacha againn ag aibhneacha, lochanna, tránna agus linnte snámha lasmuigh. Cuirfidh an tionscnamh Éire Shláintiúil seo ar chumas tuilleadh daoine rochtain a bheith acu ar na háiseanna seo, chomh maith leis na buntáistí sláinte agus folláine fhisiciúil agus mheabhrach a bhaineann le snámh lasmuigh a bhaint amach.

“Tá a fhios agam go mbeidh Comhpháirtíochtaí Spóirt Áitiúla ar fud na tíre, ó Ghaillimh go Cill Mhantáin agus ó Dhún na nGall go Corcaigh, gnóthach ag cur feabhsuithe i bhfeidhm sna míonna amach romhainn ionas go mbeidh siad ar fad réidh agus fáilte á cur roimh go leor snámhóirí eile do shéasúr 2026.”

Dúirt Príomhfheidhmeannach Spórt Éireann, Dr Úna May:

“Tá áthas an domhain ar Spórt Éireann comhoibriú leis an Aire arís ar an tionscnamh iontach seo. Is í príomhfhís na Straitéise Náisiúnta Snámha deis a thabhairt do gach duine snámh, beag beann ar aois, chúlra nó chumas – agus beidh na tacaíochtaí a sholáthraítear tríd an maoiniú seo ríthábhachtach chun tuilleadh daoine a chumasú chun é sin a dhéanamh.

"Mar a léirigh Irish Sports Monitor 2024, is é snámh an dara spórt rannpháirtíochta is mó a bhfuil dúil ag daoine sa tír ann. Tugann snámh lasmuigh daoine le chéile i ndáiríre. Tugann an raon suíomhanna ceadaithe seo, trasna aibhneacha, lochanna agus áiteanna ar an gcósta deis do gach duine tumadh isteach – rud a fhágann go bhfuil an snámh inrochtana agus taitneamhach do phobail ar fud na tíre.

“Ní hamháin go bhféadfadh snámh lasmuigh daoine ó gach cearn den tír a thabhairt le chéile, ach cuireann sé na buntáistí folláine uathúla ar fáil freisin, a thagann as a bheith gníomhach faoin aer úr.

“Le linn na bliana seo caite, d’oibrigh ár líonra de Chomhpháirtíochtaí Spóirt Áitiúla go héifeachtach leis na hÚdaráis Áitiúla in 2024 agus táimid ag tnúth le bheith ag obair i gcomhar le hÉire Shláintiúil agus Swim Ireland arís chun cur leis an rath seo.”

Dúirt Príomhfheidhmeannach de Swim Ireland, Sarah Keane:

“Tá bród ar Swim Ireland tacaíocht a thabhairt don Aire, don Roinn Sláinte, agus do Spórt Éireann maidir leis na tionscnaimh éifeachtacha a roghnú as na hiarratais uilig a seoladh isteach ó gach cearn den tír.

“Is gné thábhachtach den Straitéis Náisiúnta Snámha tacú le deiseanna agus rochtain ar Uisce Oscailte a mhéadú agus tá spéis mhór ann sa réimse seo, rud a léirítear le líon na n-aighneachtaí ar uisce oscailte a fuarthas le linn fhorbairt na Straitéise.

“Tá éagsúlacht dochreidte farraigí, lochanna agus aibhneacha ag ár dtír, atá ina n-áiteanna iontacha le snámha lasmuigh a dhéanamh. Trí na spásanna seo a dhéanamh níos inrochtana, is féidir linn rannpháirtíocht a spreagadh tuilleadh, sláinte agus folláine ár bpobal a chur chun cinn agus fís Snámh Éireann maidir le ‘hoileán snámhóirí’ a bhaint amach.”

Nótaí

Taispeánann an tábla thíos faighteoirí an mhaoinithe i ngach contae.

Déanfaidh Spórt Éireann an maoiniú seo a dháileadh thar ceann na Roinne Sláinte, i gcomhréir lena bhfís d'Éirinn ghníomhach inar féidir le gach duine taitneamh a bhaint as na buntáistí saoil a bhaineann le spórt agus gníomhaíocht choirp.

Láthair	Cuspóir Maoinithe	Méid
Ceatharlach – Limistéir snámha ainmnithe ar an Bearú	Na baoithe tarrthála a shuiteáil le clúdaigh chosanta agus cuaillí galbhánaithe, trealamh tarrthála sa bhreis eile, cosúil le línte agus cláir tarrthála, chomh maith le fógraí sábháilteachta ag limistéir snámha ainmnithe	€10,000
An Cabhán – Loch na Breaclaí agus Cuilcagh Lakelands Geopark	Áis athraithe inrochtana a fhorbairt, chomh maith le trealamh breise agus bonneagar a fheabhsú	€25,000
An Clár– Cill Chaoi agus Rinn na Spáinneach	4 scáthlán snámha a shuiteáil le suíocháin agus foscadh, agus mataí neamhsciorracha le ráillí láimhe le haghaidh rochtain níos sábháilte agus cláir fógraí, cláir tarrthála, agus baoithe a cheannach.	€25,000
Corcaigh – Tranna ag Baile Ghearóid, Garraí Lúcáis, agus Oileán Inse Duine	Cosáin agus fánáin atá ann cheana féin a uasghrádú, lena n-áirítear suiteáil ráillí	€10,000
Dún na nGall – Cúil Dabhcha, Port an tSalainn, Ros Neamhlach, Machaire Rabhartaigh agus Na Cealla Beaga	Cúig scáthlán snámha déanta as coincréit réamhtheilgthe a shuiteáil, leibhéaladh agus glanadh láithreáin ag na suíomhanna uile, agus soláthar 25 bhaoi sábháilteachta agus marcála chun achair snámha 50m agus 100m a mharcáil.	€25,000
Dún Laoghaire Ráth an Dúin Aill an tSeabhaic, Deilginis	Dhá dhréimire snámha nua a shuiteáil agus lámhráillí nua a chur in ionad na lámhráillí atá ann cheana	€10,000
Fine Gall – Scáthlán Snámha ag Domhnach Bat	Dréimirí snámha nua agus lámhráillí feabhsaithe a shuiteáil	€20,000
Gaillimh – Longpoint, Trá Mhór, Trá an Dóilín, agus Trácht	Dréimire staighre nua agus cithfholcadáin úruisce allamuigh a shuiteáil	€25,000
Cill Chainnigh– An Chora (Cathair Chill Chainnigh), Baile Mhic Andáin, Inis Tíog, agus Gráig na Manach	Cathaoir rothaí 'Hippocampe' agus gairis snámhachta pearsanta a sholáthar	€5,000
Liatroim – Cé an Chloichreáin Mhóir, Droim Seanbhó	Seomraí feistis nua agus líomatáiste suí faoi chumhdach a fhorbairt	€13,000
Luimneach– Cé Ghlinne agus Chill Tíre	Uasghráduithe ar sheomraí feistis inrochtana agus ar chithfholcadáin inrochtana, agus lámhráillí, dréimirí rochtana, agus cadhc tarrthála a shuiteáil	€20,000
Longfort – Loch Gamhna agus Loch Rí	Scáthláin feistis allamuigh inrochtana a thógáil	€25,000
Lú – Ceann Chlochair, an Port, agus Cnoc na Cáithe/Baile an Teampaill	Trí chábán feistis dúbailte trá inghluaiste a cheannach agus a shuiteáil	€20,000
Maigh Eo– Loch Chaisleán an Bharraigh, Linn Snámha faoin aer Bhéal an Átha, agus dhá shuíomh eile	Dhá scáthlán snámha, dhá aonad cithfholcadáin, dréimire cruach, marcóir doimhneachta, ráille bacainne, agus naoi locéar snámha allamuigh a shuiteáil	€22,000
An Mhí -An Inse, Baile an Bhiataigh Thuaidh, agus Baile Uí Mhornáin	Dhá scáthlán trá agus múrphictiúir orthu, cúig chlár fógraí, 20 snámhán tarraingthe, 20 stoca snámha, 20 lámhainní a shuiteáil, ullmhú láithreán, agus uasghráduithe ar leithris phoiblí le cithfholcadáin agus ionaid níocháin cos.	€25,000
Sligeach – Trá Dhún Móráin agus Trá an Mhullaigh Mhóir	Dhá scáthlán feistis coincréite ina mbeidh suíocháin, aonad cithfholcadáin coincréite amháin, agus oibreacha sibhialta gaolmhara a shuiteáil.	€25,000
Cill Mhantáin– Baile Chill Mhantáin, An Briotás, agus Bré	Dhá mata trá de chuid MOBI a shuiteáil agus dhá chathaoir rothaí trá a sholáthar	€25,000
Iomlán		€330,000

Fógraíonn an tAire Sláinte Poiblí, Folláine agus na Straitéise Náisiúnta Drugaí, Jennifer Murnane O'Connor, na hiarratasóirí rathúla do chiste snámha lasmuigh ar luach €330,000

Nótaí

Conas mar a bhí d’eispéireas ar an leathanach reatha? * (ag teastáil)

Conas mar a bhí d’eispéireas ar an leathanach reatha? (ag teastáil)