Fógraíonn Aire na Sláinte Poiblí, Folláine agus na Straitéise Náisiúnta Drugaí €665,000 i maoiniú do thionscadail sláinte do mhná gan dídean
- Foilsithe: 29 Eanáir 2026
- An t-eolas is déanaí: 6 Feabhra 2026
D’fhógair an tAire na Sláinte Poiblí, Folláine agus na Straitéise Náisiúnta Drugaí, Jennifer Murnane O’Connor TD, inniu €665,000 i maoiniú athfhillteach do cheithre thionscadal atá dírithe ar thorthaí sláinte a fheabhsú do mhná atá gan dídean nó i mbaol gan dídean.
Rinne an tAire an fógra le linn cuairte ar cheann de na tionscadail atá á reáchtáil ag Tionscadal Drugaí Ana Liffey i Réigiún an Iarthair Láir, i Luimneach.
Maoiníodh na ceithre thionscadal ar dtús mar thionscadail phíolótacha faoin bPlean Gníomhaíochta um Shláinte na mBan, agus forbraíodh iad mar fhreagairt ar riachtanais áitiúla. Tá tionchar dearfach léirithe ag gach ceann acu maidir le torthaí sláinte a fheabhsú do na mná atá páirteach iontu, agus tacófar leo anois le maoiniú athfhillteach faoi Bhuiséad 2026.
Tacaíonn an fógra seo le Plean Straitéiseach Náisiúnta FSS chun Sláinte Daoine atá ag Fulaingt Easpa Dídine in Éirinn a Fheabhsú, a bhfuil sé mar aidhm aige tionscnaimh chúram sláinte ardchaighdeáin, inbhuanaithe agus comhtháite a chur i bhfeidhm a fhreastalaíonn ar riachtanais daoine atá ag fulaingt easpa dídine.
Seo a leanas na ceithre thionscadal agus na leithdháiltí:
FSS an Iarthair Láir: Tionscadal Drugaí Ana Liffey an Iarthair Láir – €126,562. Torthaí sláinte a fheabhsú do mhná atá i dtithíocht neamhshlán nó mhí-oiriúnach ar fud an réigiúin agus a dteastaíonn rochtain uathu ar sheirbhísí sláinte do mhná.
FSS an Iardheiscirt – Good Shepherd, Corcaigh: €218,366. Tacú le foireann ildisciplíneach chun rochtain ar sheirbhísí sláinte a fheabhsú do mhná atá gan dídean nó i mbaol gan dídean.
FSS Bhaile Átha Cliath agus an Oirthuaiscirt – leithdháiltear €200,000 chun tacú le dhá chlár oibre, lena n-áirítear soláthar oiliúnóra foréigin inscnebhunaithe agus bainisteora cásanna trí Thionscadal Drugaí Ana Liffey, ag obair i gcomhar leis na foirne for-rochtana dearfaí PACT, chomh maith le soláthar clár tacaíochta piaraí ina bhfuil seachtar Oibrithe Tacaíochta Piaraí páirtaimseartha agus Comhordaitheoir Tacaíochta Piaraí, arna óstáil ag ACET, Cairde, AkiDwA, Acts of Compassion, Empower agus Black Therapists Ireland, ag tacú le mná ó phobail an Lucht Siúil, Roma agus imirceacha atá ag fulaingt coinníollacha tithíocht neamhshlán.
FSS Bhaile Átha Cliath agus an Oirthuaiscirt – €120,000 chun seirbhísí cúraim sláinte a fheabhsú chun tacú le mná den Lucht Siúil a bhfuil easpa dídine acu nó atá i mbaol easpa dídine.
Dúirt an tAire:
“Is cúis áthais dom a dheimhniú go bhfuil tionscadail a maoiníodh ar dtús faoin bPlean Gníomhaíochta um Shláinte na mBan, a thacaíonn le seirbhísí áitiúla, á maoiniú anois ar bhonn athfhillteach agus inbhuanaithe. Léiríonn sé seo tiomantas an Rialtais do spriocanna Sláintecare, lena n-áirítear béim ar chúram a sholáthar sa phobal agus rochtain ar sheirbhísí cúraim sláinte ardchaighdeáin a chumasú, chomh maith le tiomantas an Rialtais deireadh a chur leis an easpa dídine, mar a leagtar amach in Tithe a Sheachadadh, Pobail a Thógáil, plean tithíochta an Rialtais go dtí 2030.
"Le linn mo chuairte ar Thionscadal Drugaí Ana Liffey i Luimneach inniu, chuala mé conas is féidir leis an maoiniú seo tionchar athraithe saoil a imirt ar mhná a fhaigheann tacaíocht chun rochtain a fháil ar na seirbhísí cúraim sláinte a theastaíonn uathu. Tá seirbhísí for-rochtana dearfaí ag cabhrú linn teacht ar dhaoine a bhíonn ró-mhinic imeallaithe agus neamhaird tugtha orthu, agus deis á tabhairt dóibh tacaíocht agus cúram a fháil chun a sláinte a fheabhsú.”
Nótaí
Seo a leanas na ceithre sheirbhís a fhaigheann maoiniú:
FSS an Iarthair Láir
Tá sé mar aidhm ag an tseirbhís seo in FSS an Iarthair Láir, i gcomhpháirtíocht le Tionscadal Drugaí Ana Liffey an Iarthair Láir, torthaí sláinte a fheabhsú do mhná atá i dtithíocht neamhshlán nó mhí-oiriúnach ar fud an réigiúin agus a dteastaíonn rochtain uathu ar sheirbhísí sláinte do mhná sa phobal. Is seirbhís for-rochtana dearfaí í seo, ina dtaistealaíonn beirt oibrithe for-rochtana chun teagmháil a dhéanamh le mná a bhíonn i gcúinsí leochaileacha go minic, agus iad á spreagadh chun freastal ar an gclinic sláinte cuimsithí. Tugann an fhoireann for-rochtana tacaíocht dóibh agus iad ann, agus cabhraíonn siad leo freastal ar choinneanna leantacha ábhartha.
FSS an Iardheiscirt
Tacaíonn FSS an Iardheiscirt, i gcomhpháirtíocht le Good Shepherd, Corcaigh, le foireann ildisciplíneach a bhfuil fócas suntasach aici ar rochtain ar sheirbhísí sláinte a fheabhsú do mhná atá gan dídean nó i mbaol gan dídean. Chuir an maoiniú ar chumas síceolaí cliniciúil agus beirt oibrithe for-rochtana andúile a chur leis an bhfoireann, rud a neartaíonn an tacaíocht do mhná a bhfuil riachtanais sláinte meabhrach agus andúile acu.
FSS Bhaile Átha Cliath agus an Oirthuaiscirt
Cuireadh oiliúnóir foréigin inscnebhunaithe agus bainisteoir cásanna leis an tseirbhís a sholáthraíonn Tionscadal Drugaí Ana Liffey, i gcomhar leis na foirne for-rochtana dearfaí PACT. Bíonn an t-oiliúnóir foréigin inscnebhunaithe i dteagmháil le foireann i gcóiríocht do dhaoine gan dídean, agus soláthraíonn sé oiliúint maidir le seirbhísí a chur ar fáil ar bhealach feasach ar thráma, chomh maith le híospartaigh foréigin teaghlaigh, foréigin ghnéasaigh agus foréigin inscnebhunaithe a aithint. Soláthraíonn an bainisteoir cásanna tacaíochtaí agus idirghabhálacha sonracha do dhaoine aonair atá ina gcónaí i gCóiríocht Éigeandála Príobháidí agus a bhfuil taithí acu ar foréigin teaghlaigh, foréigin ghnéasaigh agus foréigin inscnebhunaithe
Díríonn dara clár sa réigiún seo ar sheirbhísí cúraim sláinte a fheabhsú do mhná den Lucht Siúil a bhfuil easpa dídine acu nó atá i mbaol easpa dídine. Cuireann oibrithe for-rochtana atá dírithe ar an Lucht Siúil leis an bhfoireann bainistíochta cásanna dearfaí de chuid FSS trí chúram atá oiriúnach ó thaobh cultúir de a sholáthar agus trí mhná den Lucht Siúil a nascadh le seirbhísí cúraim sláinte ar bhealach tacúil.