Molann an tAire Butler do dhaoine aosta fanacht slán sábháilte le linn na haimsire te
- Foilsithe: 18 Iúil 2022
- An t-eolas is déanaí: 12 Aibreán 2025
Tá an tAire um Mheabhairshláinte agus Daoine Aosta, Mary Butler TD ag cur comhairle ar dhaoine aosta fanacht sábháilte le linn na haimsire te agus teochtaí arda geallta do na laethanta amach romhainn.
D'fhéadfadh daoine atá os cionn 65 bliana d'aois agus iad siúd a bhfuil bunriochtaí sláinte acu amhail diaibéiteas, galar Alzheimer, néaltrú agus riochtaí a chuireann isteach ar a n-análú, a gcroí agus a nduáin a bheith an-leochaileach ag an am seo.
Dúirt an tAire Butler:
“D'fhéadfadh strus teasa, tnáitheadh ó theas agus stróc teasa a bheith ina rioscaí tromchúiseacha sláinte do dhaoine le linn toinne teasa. Molaim do dhaoine aosta, agus do dhuine ar bith atá ag tabhairt aire do dhuine, céimeanna a ghlacadh chun fanacht fionnuar agus hiodráitithe agus a bheith ag faire amach do chomharthaí a léiríonn díhiodráitiú agus tnáitheadh ó theas.
“Tá sé tábhachtach a chuimhneamh go mbeidh do dhochtúir teaghlaigh nó do chógaiseoir in ann comhairle a chur ort má fhágann aon cheann de do chógais go mbeidh seans níos mó ann go n-éireoidh tú tinn mar gheall ar an teas”.
Chun fanacht sábháilte agus folláin le linn aimsir te:
- Fan hiodráitithe: Bí cinnte go bhfuil neart uisce agat le hól; ní mór do dhuine fásta tuairim is 2 lítear leachta a ól thar 24 uair an chloig. Cuir deochanna sa chuisneoir le fuarú.
- Fan aeráilte: Cinntigh go bhfuil aeráil leordhóthanach agat i do theach.
- Fan amach as solas díreach na gréine: Fan as solas díreach na gréine ar feadh tréimhsí fada an oiread agus is féidir i rith an lae, go háirithe idir 11am agus 3pm nuair a bhíonn an UV is láidre ann.
Tá an tAire Butler ag moladh go háirithe dóibh siúd atá ag tabhairt aire do dhuine a bheith ar an airdeall. >“Má tá tú ag tabhairt aire do dhuine, b'fhéidir nach bhfuil tuiscint acu ar an méid atá á ól acu. Chun cabhrú leo, bí cinnte go n-ólann siad le linn am béilí agus cuir bia ar fáil a bhfuil cion ard uisce ann."
Tá luath-idirghabháil riachtanach má éiríonn duine tinn mar gheall ar thnáitheadh ó theas, stróc teasa nó díhiodráitiú agus moltar do dhaoine teagmháil a dhéanamh lena ndochtúir teaghlaigh nó cóir leighis a lorg má éiríonn tú meadhránach, má bhíonn mearbhall ort, mura bhfuil mún déanta agat, nó má tá do ráta croí méadaithe.
Tá an tAire Butler ag meabhrú do dhaoine aosta freisin a bheith Sunsmart:
- Caith éadaí a chlúdaíonn an craiceann
- Cuir griansciath ort féin - fachtóir 30 ar a laghad
- Caith hata le duilleog leathan
- Fan faoi scáth
- Caith spéaclaí gréine
- Cuir teorainn leis an méid ama a chaitheann tú sa ghrian
Le haghaidh tuilleadh comhairle, téigh chuig Láithreán Gréasáin FSS.
CRÍOCH