Fógraíonn an tAire Sláinte Poiblí, Folláine agus na Straitéise Náisiúnta Drugaí maoiniú do dhrugaí agus do Shláinte Chuimsithe do 2026

D’fhógair Jennifer Murnane O’Connor TD, an tAire Sláinte Poiblí, Folláine agus na Straitéise Náisiúnta Drugaí, inniu €11 mhilliún breise i gcistiú athfhillteach do sheirbhísí sláinte drugaí agus cuimsithe i mBuiséad 2026.

Cuimsíonn an leithdháileadh €4m do bhearta feabhsaithe seirbhíse agus tabharfaidh sé aghaidh ar éagothromaíochtaí réigiúnacha maidir le hinfhaighteacht seirbhísí sláinte drugaí agus cuimsithe, agus béim láidir á leagan ar sholáthar seirbhísí i gceantair faoi mhíbhuntáiste agus i gceantair thuaithe. Tá sé d’aidhm aige freisin feabhas a chur ar bhearta coisctheacha, lena n-áirítear trí bhearta luath-idirghabhála chun sláinte agus folláine leanaí a fheabhsú.

I measc na mbuaicphointí tá:

• Cumas feabhsaithe i seirbhísí drugaí do dhaonraí nach bhfuil freastal ceart á dhéanamh orthu, lena n-áirítear cóireáil chónaithe agus luath-idirghabháil do dhaoine óga.
• Plean straitéiseach forbartha don lucht saothair do bhaill foirne atá ag obair i seirbhísí drugaí ar fud na sé réigiún sláinte.
• Seirbhísí sláinte a leathnú do dhaoine gan dídean, lena n-áirítear cúram náisiúnta inrochtana agus bainistiú cásanna dóibh siúd atá i gcóiríocht éigeandála agus idirghabhálacha do mhná atá i mbaol easpa dídine.
• Rochtain ar an gcógas Buprenorphine, rud a chuireann ar chumas cóireáil a dhéanamh ar 200 duine breise a bhfuil spleáchas ópóideach acu.
• An clár nuálach Tús Níos Gile do shláinte leanaí an Lucht Siúil a leathnú chuig dhá réigiún sláinte nua.
• Tacaíochtaí sláinte breise a chur ar fáil do dhídeanaithe agus d’imircigh.

Tacóidh leithdháileadh €100,000 le córas monatóireachta ospidéil le haghaidh ródháileog drugaí. Cuideoidh an córas seo le FSS ródháileoga drugaí neamh-mharfacha agus marfacha a shainaithint ar luas níos tapúla, agus cumarsáid riosca agus pleananna éigeandála a eisiúint de réir mar is cuí. Cuirfidh an maoiniú seo idirghabhálacha ar fáil freisin do rannpháirtithe i gcúirt cóireála drugaí Bhaile Átha Cliath, a mbeidh sé mar aidhm aici rannpháirtíocht a mhéadú agus tacú leo siúd a bhfuil saincheisteanna níos casta acu an clár a chur i gcrích go rathúil.

Ina theannta sin, tá maoiniú €2 mhilliún faighte ag an Aire do 2026 agus 2027 le haghaidh dhá thionscadal faoi Chiste na gCuntas Díomhaoin. Tacóidh an maoiniú seo le seirbhísí cúram sláinte a sholáthar do phobal na Romach agus le foireann ildisciplíneach a bhunú do leanaí bunscoile i mBaile Munna.

Dúirt an tAire Murnane O’Connor:

“Leis an gcistiú breise atá faighte agam le haghaidh 2026, tabharfar aghaidh ar éagothromaíochtaí maidir le hinfhaighteacht drugaí agus seirbhísí sláinte cuimsithe agus rochtain orthu ar fud na sé réigiún sláinte de chuid FSS. Spreagfaidh na bearta nua cothromas sláinte do ghrúpaí atá i mbaol bochtaineachta agus eisiaimh shóisialta agus feabhsóidh siad sláinte agus folláine na ndaoine go léir atá ina gcónaí in Éirinn.

“Tá an bealach á réiteach againn chun ár straitéis náisiúnta drugaí nua a chur chun feidhme, acmhainneacht i seirbhísí a leathnú ar fud na tíre agus tionscnaimh phíolótacha rathúla a chur i bhfeidhm i réimsí nua.

“Is mian liom aitheantas a thabhairt don ról ríthábhachtach atá ag an bhfoireann a chuireann seirbhísí sláinte cuimsithe ar fáil, agus a chuireann tacaíocht riachtanach ar fáil do dhaoine a bhfuil leochaileachtaí dúshlánacha acu. Is cuí go n-aithnímid a rannchuidiú agus go gcinntímid go bhfuil na hacmhainní, an oiliúint agus an tacaíocht is gá acu chun leanúint den tseirbhís seo a sholáthar amach anseo.

“Ba mhaith liom aitheantas a thabhairt do na bearta comhlántacha atá molta ag mo chomhghleacaí, an tAire Meabhairshláinte, Mary Butler TD. Áirítear orthu sin seirbhísí dédhiagnóiseacha a leathnú do dhaoine a bhfuil fadhbanna meabhairshláinte agus fadhbanna úsáide drugaí araon acu, agus tionscnaimh nua chun féinmharú a laghdú don Lucht Siúil.”

Leagtar amach tuilleadh sonraí faoi na bearta maidir le sláinte drugaí agus cuimsithe i mbileog eolais Bhuiséad 2026.