Ráiteas ón bhFoireann Éigeandála Sláinte Poiblí Náisiúnta - Dé hAoine, an 15 Eanáir 2021
- Foilsithe: 15 Eanáir 2021
- An t-eolas is déanaí: 11 Aibreán 2025
Cuireadh an tIonad Faireachais um Chosaint Sláinte ar an eolas inniu ar 50 bás breise a bhaineann le COVID-19.
Tharla gach ceann de na 50 bás go léir seo in Eanáir 2021. Is é 82 bliain meánaois na ndaoine siúd a fuair bás, agus ba é an raon aoise 45-96 bliain. Níor tugadh aon bhás nua le fios i measc oibrithe cúraim sláinte.
Níor tugadh aon bhás nua le fios i measc daoine óga faoi aois 30 bliain.
Tá 2,536 duine, ar an iomlán, tar éis bás a fháil in Éirinn go dtí seo a bhain le COVID-19.
Amhail meán oíche Déardaoin, an 14 Eanáir, cuireadh an IFCS ar an eolas ar 3,498 cás deimhnithe de COVID-19. Tá 166,548* cás deimhnithe, ar an iomlán, de COVID-19 ann anois in Éirinn.
As na cásanna a cuireadh in iúl inniu:
- Fir iad 1,576 / mná iad 1,906
- Tá 54% díobh faoi 45 bliain d’aois
- Is é 42 bliain an mheánaois
- Tá 1,182 cás i mBaile Átha Cliath, 421 i gCorcaigh, 258 i Luimneach, 187 i nGaillimh, 164 i bPort Láirge, agus tá an fuílleach 1,286 cás leata i measc na gcontaetha go léir eile.
Amhail 2pm inniu, tá 1,850 othar COVID-19 san ospidéal, agus tá 184 astu siúd san aonad dianchúraim. Tugadh 118 duine sa bhreis go dtí an t-ospidéal le 24 uair an chloig anuas.
Dúirt an Dr Tony Holohan, an Príomhoifigeach Leighis, an Roinn Sláinte:
“Sainaithníodh athraithigh nua de COVID-19 le déanaí sa Bhrasaíl, agus i measc daoine a thaistil go dtí an tSeapáin ón mBrasaíl. Níl aon fhianaise ann go bhfuil na hathraithigh seo in Éirinn.”
“Moltar do dhuine a thaistil ón mBrasaíl le 14 lá anuas chun féinaonrú a dhéanamh ar feadh 14 lá, ón dáta a tháinig siad sa tír, agus iad féin a chur in aithne, trí dhochtúir ginearálta, go ndéanfar tástáil orthu a luaithe agus is féidir.”
“Tá sé bunriachtanach go ndéanann aon duine a thagann ón mBrasaíl féinaonrú ar feadh 14 lá ón dáta a thagann siad i dtír sula n-iontrálann/n-athiontrálann siad an t-ionad oibre. Táimid ag impí, ach go háirithe, ar fhostóirí a chur ar chumas a bhfostaithe a chéile a chosaint trí fhanacht sa bhaile do na 14 lá iomlána.”
“Tá súil leis go ndéanfaidh an Lárionad Eorpach um Ghalair a Chosc (an ECDC) measúnú riosca breise ar na hathraithigh nua an tseachtain seo chugainn. Ní foláir dúinn go léir leanúint ag cloí le gach gné den chomhairle sláinte poiblí. Is é seo an chosaint is fearr go fóill in aghaidh COVID-19.”
Dúirt an Dr Ronan Glynn, an Leas-Phríomhoifigeach Leighis, an Roinn Sláinte:
“D’oibríomar go fíordhian le roinnt seachtainí anuas chun ár dteagmhálaithe dlútha a laghdú. Bhain an líon teagmhálaithe dlútha in aghaidh an cháis dheimhnithe an líon ab airde thart ar 6 dhuine amach ag deireadh mhí na Nollag. Tá laghdú tagtha air sin anois go dtí 2.3 teagmhálaí. Is í an iarracht ollmhór seo is cúis leis an titim atá ag teacht de réir a chéile ar líonta cásanna.”
“Is eol dúinn go bhfuil sé fíordheacair ár dteagmhálaithe dlútha a choimeád chomh híseal agus is féidir, go háirithe i rith tréimhse shínte ama. Ach is é seo an bealach is féidir linn sinn féin agus ár ndaoine muinteartha a chosaint ó COVID-19. Tá an líon is airde daoine atá inár n-ospidéil agus COVID-19 orthu á thabhairt le fios againn arís eile inniu. Ní foláir dúinn fanacht sa bhaile chun sinn féin agus a chéile a chosaint.”
Cuirtear eolas cothrom le dáta ar fáil ar Chlár Eolais COVID-19 ar phríomhtháscairí COVID-19 sa phobal. Amhail ón lá inné, tá eolas ar fáil ar an gclár eolais faoi na Vacsaíní Iomlána a Tugadh (an 1ú Dáileog).
CRÍOCH
- Mar thoradh ar bhailíochtú sonraí a rinne an IFCS, rinneadh 7 gcás dheimhnithe a dhífhógairt. Léirítear é seo san fhigiúr 166,548 cás deimhnithe.
Cásanna an lae inniu, ráta na dteagmhas 14 lá in aghaidh gach 100,000 duine den daonra agus cásanna nua le 14 lá anuas (amhail meán oíche an 14 Eanáir 2021) (bunaítear ráta na dteagmhas ar dhaonra contae de réir Dhaonáireamh 2016)
| Contae | Cásanna an lae inniu (go dtí meán oíche an 14Ean2021) | Ráta na dteagmhas 14 lá in aghaidh gach 100,000 duine den daonra (go dtí meán oíche an 14Ean2021) | Cásanna Nua le 14 lá anuas (go dtí meán oíche an 14Ean2021) |
| Éire | 3498 | 1533.6 | 73026 |
| Muineachán | 133 | 2968.1 | 1822 |
| Lú | 53 | 2467.3 | 3180 |
| Luimneach | 258 | 2157 | 4204 |
| Port Láirge | 164 | 2028 | 2356 |
| Loch Garman | 79 | 1830.1 | 2740 |
| Baile Átha Cliath | 1182 | 1732.7 | 23346 |
| Maigh Eo | 97 | 1721.7 | 2247 |
| Ceatharlach | 44 | 1665.1 | 948 |
| An Clár | 52 | 1621.8 | 1927 |
| Dún na nGall | 128 | 1598.1 | 2544 |
| Corcaigh | 421 | 1590.6 | 8635 |
| An Cabhán | 11 | 1529.4 | 1165 |
| An Mhí | 114 | 1312 | 2559 |
| Cill Chainnigh | 41 | 1236.5 | 1227 |
| Cill Dara | 131 | 1151.9 | 2563 |
| Ciarraí | 90 | 1134.7 | 1676 |
| Sligeach | 21 | 1123.1 | 736 |
| Gaillimh | 187 | 1089.7 | 2812 |
| Uíbh Fhailí | 41 | 1050.5 | 819 |
| Ros Comáin | 32 | 1011.7 | 653 |
| Tiobraid Árann | 79 | 1004.1 | 1602 |
| Laois | 53 | 1001.2 | 848 |
| An Longfort | 11 | 929.7 | 380 |
| Cill Mhantáin | 63 | 799.7 | 1139 |
| An Iarmhí | 8 | 754.8 | 670 |
| Liatroim | 5 | 711.5 | 228 |
Is é ráta na dteagmhas 7 lá 644.7 cás
Is é an meán gluaisteach 5 lá 3,804 cás