Ráiteas ón bhFoireann Náisiúnta Éigeandála Sláinte Poiblí - Dé Domhnaigh an 21 Feabhra 2021
- Foilsithe: 21 Feabhra 2021
- An t-eolas is déanaí: 22 Feabhra 2021
Cuireadh in iúl don Ionad Faireachais um Chosaint Sláinte inniu go bhfuil duine amháin le COVID-19 tar éis bás a fháil.
4,136 duine san iomlán atá básaithe de thoradh COVID-19 in Éirinn go dtí seo.
Amhail meán oíche, Dé Sathairn an 20 Feabhra, cuireadh 679 cás deimhnithe de COVID-19 in iúl don HPSC. 215,057 cás de COVID-19 a deimhníodh in Éirinn go dtí seo.
As na cásanna a cuireadh in iúl inniu;
- Is fir iad 335 / is mná iad 342 díobh
- Tá 71% faoi bhun 45 bliana d’aois
- 32 aois airmheánach na ndaoine
- 230 i mBaile Átha Cliath, 59 i Luimneach, 48 i nGaillimh, 47 i gCill Dara, 29 i dTiobraid Árann agus tá na 266 cás eile scaipthe ar fud 19 gcontae eile.*
Amhail 8am inniu, tá 744 othar COVID-19 san ospidéal, agus tá 148 acusan san aonad dianchúraim. Cuireadh 45 duine eile san ospidéal le 24 uair an chloig anuas.
Amhail an 18 Feabhra, bhí 326,475 dáileog de vacsaín COVID-19 tugtha in Éirinn:
- Bhí a gcéad dáileog faighte ag 205,955 duine
- Bhí a dara dáileog faighte ag 120,520 duine
Dúirt an Dr. Ronan Glynn, Leas-Phríomhoifigeach Leighis, an Roinn Sláinte;
“Cé go bhfuil leibhéal an ghalair sa phobal an-ard i gcónaí, táimid ag déanamh dul chun cinn i gcónaí.
“Tuairiscíodh níos lú ná 1,000 cás gach lá an tseachtain seo agus tá ár meánráta 7 lá tite ó 1,022 coicís ó shin, go dtí 862 an tseachtain seo caite agus go dtí 792 inniu. Thit líon na ndaoine san ospidéal ó os cionn 1,200 coicís ó shin, go dtí 744 inniu.
“Ná déan beag is fiú de chumhacht do ghníomhartha agus muid ag iarraidh an méid atá bainte amach againn a chosaint agus scaipeadh an víris a laghdú tuilleadh. An tseachtain seo, lean ort ag obair ón mbaile mura bhfuil sé riachtanach agus ná tabhair cuairt ar theaghlaigh eile mura bhfuil géarghá leis nó mura bhfuil tú mar chuid de bholgán tacaíochta."
Soláthraíonn Deais COVID-19 faisnéis cothrom le dáta faoi phríomhtháscairí COVID-19 sa phobal lena n-áirítear sonraí laethúla maidir le Clár Vacsaínithe COVID-19 na hÉireann.
CRÍOCH
- Ba cheart sonraí contae a mheas go sealadach toisc gur córas dinimiciúil é an Córas Ríomhaireachta Idirnáisiúnta um Ghalair Thógálacha (CIDR) agus tá sonraí cáis á mbailíochtú agus á nuashonrú i gcónaí.
Cásanna an lae inniu, meán gluaiseachta 5 lá de chásanna nua, ráta minicíochta 14 lá in aghaidh gach 100,000 den daonra agus cásanna nua le 14 lá anuas (amhail meán oíche an 20 Feabhra 2021) (ráta minicíochta bunaithe ar dhaonra contae Dhaonáireamh 2016)
~Soláthraíonn an meán gluaiseachta 5 lá de líon na gcásanna nua táscaire iomchuí ar líon na gcásanna laethúla reatha laistigh de chontae. Áirítear aon bhailíochtú cásanna a tharla sna laethanta roimhe seo agus réitíonn sé luaineachtaí laethúla/deireadh seachtaine i líon na gcásanna.