Ráiteas ón bhFoireann Náisiúnta Éigeandála Sláinte Poiblí - Dé Máirt an 07 Nollaig 2021
- Foilsithe: 7 Nollaig 2021
- An t-eolas is déanaí: 9 Nollaig 2021
Cuireadh 5,590* cás deimhnithe COVID-19 in iúl don Ionad Faireachais um Chosaint Sláinte inniu.
Amhail 8am inniu, tá 505 othar COVID-19 san ospidéal, agus tá 117 acusan san aonad dianchúraim.
Dúirt an Dr Tony Holohan, Príomhoifigeach Leighis, an Roinn Sláinte:
“Is í an leagan Delta is cúis leis an mhinicíocht ard COVID-19 atá in Éirinn faoi láthair, rud a chiallaíonn, i dteannta leis an leagan Omicron, go bhfuil conair an galair fós neamhchinnte.
“Is léir go dtugann teanndáileoga den vacsaín cosaint i gcoinne galair thromchúiseacha, agus go bhfuil laghdú ar líon na ndaoine san ospidéal agus ar bhás ó fhormhór na leaganacha, lena n-áirítear Delta agus Omicron, sa ghearrthéarma ar a laghad.
"San aoisghrúpa os cionn 75, áit a bhfuil líon ard ag glacadh leis an tríú dáileog de vacsaín COVID-19, táimid ag feiceáil laghduithe suntasacha ar mhinicíocht an ghalair. Is forbairt dhearfach eile í seo agus fianaise bhreise go gcuidíonn an tríú dáileog de vacsaín COVID-19 le cosaint ó na héifeachtaí is measa de COVID-19.
“Ná fan go dtí tar éis na Nollag chun do theanndáileog a fháil, tá na buntáistí a bhaineann le do theanndáileog a fháil níos tábhachtaí ná aon rioscaí féideartha a d’fhéadfadh teacht chun cinn idir an dá linn. Tosóidh tú ag fáil buntáiste do theanndáileoige seacht lá tar éis duit do thríú dáileog a fháil. Ciallaíonn sé seo gur féidir le duine ar bith a fuair a vacsaín an tseachtain seo a bheith muiníneach sa chosaint a thabharfaidh an teanndáileog dóibh agus muid ag bogadh níos gaire do thréimhse na Nollag.
“Dá bhrí sin, tá sé ríthábhachtach go dtabharfadh gach duine againn tosaíocht dár gcoinní teanndáileoige a luaithe a fhaighimid iad nó go ndéanaimid an t-am freastal ar chlinic vacsaínithe siúil isteach má tá an rogha sin ar fáil."
CRÍOCH
NÓTAÍ DON EAGARTHÓIR
Ní bhíonn tionchar ag éagsúlacht ó lá go lá ar líon na gcásanna COVID-19 a thuairiscítear ar phríomhanailís treochta. Déanann anailísiú thar thréimhse ama níos faide mar sheachtain nó 14 lá, réidh le haon athruithe a thugtar isteach le hamanna próiseála, agus soláthraíonn sí pictiúr níos cobhsaí den treocht.
Beidh líon na bhfógraí maidir le CIDR difriúil ó fhoinsí sonraí FSS eile, mar shampla torthaí dearfacha SARS-CoV-2 arna n-uaslódáil chuig Rianaire Cúraim COVID, ar chúiseanna éagsúla lena n-áirítear:
- Dídhúbláil ar thástálacha dearfacha leantacha sa duine céanna
- Sceidil uaslódála éagsúla ag na saotharlanna chuig CCT agus CIDR - déantar taifid dhearfacha a uaslódáil chuig CCT de láimh, ní amhlaidh an cás le CIDR. Is gnách go ndéantar uaslódáil ar CIDR ar an lá nó laistigh de lá amháin ó údarú thoradh na tástála saotharlainne
- An t-am a ghlacann sé chun an modh dhá chéim fógraí ar CIDR a phróiseáil - tarlaíonn sé seo de ghnáth ar an lá nó laistigh de lá amháin ó uaslódálann saotharlanna taifid dhearfacha ar CIDR
- D'fhéadfadh líon na gcásanna laethúla athrú de bharr bailíochtú sonraí sa todhchaí.