Seolann An Taoiseach agus An tAire Daly CAMHS Connect – Mol Meabhairshláinte nua an Chaisleáin Riabhaigh
- Foilsithe: 8 Meitheamh 2020
- An t-eolas is déanaí: 11 Aibreán 2025
Inniu sheol An Taoiseach, Leo Varadkar TD, agus Jim Daly, An tAire Meabhairshláinte agus Daoine Scothaosta, cur chuige suntasach nua i ndáil le cúram meabhairshláinte - seirbhís ar líne CAMHS Connect FSS.
Beidh CAMHS Connect, an chéad chlár dá leithéid sa tír, ag croílár Mhol Meabhairshláinte Nua an Chaisleáin Riabhaigh ar fud FSS an Iarthair agus níos faide ó bhaile, agus cuimseofar ann an tseirbhís ar líne atá bunaithe in Ospidéal Lae nua CAMHS. Chomh maith leis sin, tá Ospidéal Lae nua eile curtha ar fáil ag an suíomh a bheidh dírithe ar Shíciatracht Deireadh Saoil (SDS), a fhreastalóidh ar riachtanais athraitheacha chliniciúla sláinte i gceantar mór. Beidh comhchuid mhór de na seirbhísí nua á forbairt ag gairmithe meabhairshláinte a sholáthraíonn seirbhísí For-rochtana d’aonaid Éigeandála agus Othar Cónaitheach trí theilsíciatracht.
Is snáithe amháin é CAMHS Connect de thionscnaimh éagsúla nua ríomh-Mheabhairshláinte atá bunaithe ag an Aire Daly ó chuaigh sé i mbun oifige ar mhaithe le cúram meabhairshláinte ar fud na tíre a nuachóiriú. Áirítear i measc na dtionscnamh seo tionscadail phíolótacha teilsíciatrachta de chuid FSS i gCill Mhantáin, Gaillimh agus Maigh Eo a bhfuil sé mar aidhm leo teicneolaíocht ar líne a fhorbairt i suíomhanna cúram meabhairshláinte cosúil le seirbhísí d’aosaigh, cúram Andúile agus Mí-úsáid Substaintí, Dochtúirí Teaghlaigh agus Cúram Príomhúil agus Míchumas Intleachtúil Meabhairshláinte.
Soláthróidh CAMHS Connect eispéiris i bhfad níos fearr d’othair, go háirithe ag uaireanta taobh amuigh d’uaireanta gnó. I láthair na huaire, mar shampla, ní mór do dhuine óg a thagann chomh fada le saoráid atá gan síciatraí ar dualgas, fanacht go dtí go mbíonn síciatraí ar fáil an mhaidin dár gcionn. Trí chúnamh a fháil ó dhochtúirí atá ag obair ón Mol nua, beidh tacaíocht chliniciúil ar fáil go héasca, lá agus oíche, chun tacú leis an bhfoireann sláinte atá lonnaithe in áiteanna eile, rud a chiallaíonn nach mbeidh aon mhoill i gceist agus go mbeidh liostaí feithimh á laghdú.
Beidh tacaíocht feabhsaithe ar fáil freisin d’Fhoirne Ildisciplíneacha Meabhairshláinte
i limistéir mhóra gheografacha chun bearnaí a líonadh in áiteanna ina bhfuil deacrachtaí earcaíochta faoi láthair. I gcásanna áirithe, cuireann easpa rialachais Chliniciúil Chomhairligh isteach go mór ar obair Fhoireann CAMHS agus bíonn moill ar chóireáil othar. Is réiteach dáiríre é samhail nua Ros Comáin ar dheacrachtaí den chineál sin. Is ionann é agus treochlár don todhchaí a bhfuil an poitéinseal aige eispéiris othar a úsáideann seirbhísí meabhairshláinte a fheabhsú go suntasach, arb é sin cuspóir na n-úsáideoirí seirbhíse, na ngairmithe sláinte agus na n-urlabhraithe meabhairshláinte.
De réir mar a fhorbróidh an tsamhail, beidh sí ag feidhmiú go príomha trí sheirbhís ospidéal lae/for-rochtana ceannasach bunaithe in An Caisleán Riabhach (in Aonad Athchóirithe Rosalie) a oibreoidh ar bhonn sineirgíoch le hospidéal lae i nGaillimh ar bhonn seacht lá. Soláthróidh sé seo rogha fhiúntach mhalartach ar chúram mar othar cónaitheach do dhaoine óga i gCo. na Gaillimhe, Co. Ros Comáin, Co. Mhaigh Eo, Co. Shligigh agus Co. Liatroma. Chomh maith leis sin, tacóidh sé, de réir mar is cuí, le seirbhísí CAMHS san Oirdheisceart.
Bhí an méid seo a leanas le rá ag An Taoiseach, Leo Varadkar:
“Tá ár n-aird tarraingthe ag COVID-19 ar rud éigin a bhí ar eolas againn riamh anall, is é sin gur dlúthchuid dár bhfolláine é aire a thabhairt dár meabhairshláinte agus í a fheabhsú. Cuireann meabhairshláinte dhearfach lenár gcumas déileáil leis an strus a bhaineann leis an saol laethúil, agus cabhraíonn sí linn a bheith inár saoránaigh níos rannpháirtí, níos táirgiúla agus níos sona. Anois níos mó ná riamh roimhe seo, tuigimid an tábhacht a bhaineann le haire a thabhairt dár meabhairshláinte.
“Siar in 2012, bhí an maoiniú a bhí á chur ar fáil le haghaidh Meabhairshláinte sa tír seo cothrom le €711m. Inniu tá sé cothrom le breis is billiún euro, de bhrí go dtuigeann an Rialtas an tábhacht a bhaineann le meabhairshláinte dár sláinte agus folláine. Le blianta beaga anuas, tá freagairtí nua ar líne á bhforbairt againn a chuirfidh leis an gcúram meabhairshláinte atá á chur ar fáil in Éirinn cheana féin, i bhfad sula raibh trácht ar bith ar COVID-19. Bhí a fhios againn go raibh sé riachtanach bealaí nua chun freastal ar riachtanais athraitheacha a aimsiú, agus tá aird tarraingthe ag an Éigeandáil seo ar a thábhachtaí is atá ríomh-Mheabhairshláinte.
“Trí mhol digiteach a chruthú beidh gairmithe meabhairshláinte in ann seirbhísí for-rochtana a sholáthar d’aonaid Éigeandála agus Othar Cónaitheach trí theilsíciatracht. Beidh an tseirbhís nua ar líne seo, CAMHS Connect, ag croílár Mhol Meabhairshláinte nua an Chaisleáin Riabhaigh ar fud FSS an Iarthair agus níos faide ó bhaile.”
Bhí an méid seo a leanas le rá ag an Aire Daly:
“Is tionscadal nuálach é CAMHS Connect atá deartha chun léargas a thabhairt ar conas is féidir le teilsíciatracht réitigh ísealchostais a sholáthar chun dúshláin náisiúnta atá le sárú ag an tseirbhís speisialaithe ríthábhachtach seo. Is fianaise é ar mhodh smaointeoireachta nua chun seirbhísí pobalbhunaithe a sholáthar, ar thacaigh mé leis sa pholasaí Fís don Athrú, a sheolfar gan mhoill.
“Shíl mé féin gur bhain tábhacht ar leith le caighdeán agus sábháilteacht a chinntiú, go háirithe chomh fada is a bhain le rúndacht, agus cearta gach duine atá ag úsáid na seirbhíse nua a chosaint. Is eol dom go n-oibríonn córais ar líne go maith thar lear, agus bhí mé meáite ar chur chuige den chineál céanna, ach saincheaptha, a bhunú in Éirinn chun déileáil le riachtanas ríshoiléir agus le hiarratais leanúnacha ó go leor daoine san earnáil mheabhairshláinte. Baineann go leor féidearthachtaí, ar leibhéal náisiúnta, le CAMHS Connect, go háirithe i ndáil le seirbhís 24/7 a chur ar fáil nó déileáil le deacrachtaí a bhaineann le suíomh nó bacainní foirne. Cabhróidh sé seo, ar bhealach níos fearr, chun tacú le daoine óga agus le raon gairmithe cúraim sláinte, ní hamháin na speisialtóirí meabhairshláinte. Tá bealach Rochtana bunaithe againn anois, agus dá réir sin, bealach Rochtana nua a éascóidh idirghabháil agus Téarnamh níos tapa.
“Táim fíorshásta go bhfuil an tOspidéal Lae nua do Shíciatracht Deireadh Saoil lonnaithe ag an suíomh seo freisin. Soláthróidh sé seo gné dhifriúil de chúram meabhairshláinte do dhaoine scothaosta sa réigiún, i gcomparáid leis na riachtanais athraitheacha seirbhíse a bhí i sean-Aonad Rosalie.”
CRÍOCH