Seolann na hAirí Sláinte agus Meabhairshláinte an beartas náisiúnta Meabhairshláinte athbhreithnithe, ‘Sharing the Vision – a Mental Health Policy for Everyone’ don tréimhse 2020-2030.
- Foilsithe: 17 Meitheamh 2020
- An t-eolas is déanaí: 11 Aibreán 2025
D'fhoilsigh tAire Sláinte Simon Harris TD agus an tAire Stáit le freagracht as Meabhairshláinte Jim Daly inniu 'Sharing the Vision – a Mental Health Policy for Everyone’.
Tháinig deireadh le téarma deich mbliana, 'A Vision for Change' in 2016 agus tá athrú mór tagtha ar thírdhreach na meabhairshláinte in Éirinn ó 2006. Is é an chéad beartas eile ná Sharing the Vision a chomhaontaigh an Chomh-Aireacht coicís ó shin.
Dúirt an tAire Harris:
“Is é Sharing the Vision ár mbeartas nua meabhairshláinte agus is beartas é do gach duine.
“Díríonn sé ar phríomhréimsí - cur chun cinn, cosc agus idirghabháil luath, rochtain ar sheirbhísí, comhordú agus leanúnachas cúraim, cuimsiú sóisialta agus cuntasacht agus feabhsú leanúnach. “Níos tábhachtaí, tá treochlár cur chun feidhme mar chuid de Sharing the Vision. Leithdháileann sé úinéireacht moltaí ar ghníomhaireachtaí ceannais agus socraíonn sé spriocanna cur chun feidhme faoi theorainn ama i gcoinne ghníomhartha gach moladh. Beidh sé seo ríthábhachtach maidir lena sheachadadh.
“Tagann a fhoilseachán seo ag am ina bhfuil athrú tapa ag teacht ar an domhan, go háirithe i bhfianaise na paindéime Covid-19, agus tá súil ó chroí agam go mbeidh ról riachtanach ag an mbeartas seo i múnlú ár bhfreagraí ar na dúshláin seo atá romhainn anois, agus iad siúd atá le teacht.
“Ba mhaith liom buíochas a ghabháil freisin le mo Roinn agus go háirithe le mo chomhghleacaí an tAire Daly as a chuid oibre ar an gceist thábhachtach seo. Tá roinnt leasuithe tábhachtacha déanta ag an Aire Daly i réimse na meabhairshláinte, agus tá áthas orm gur féidir leis an doiciméad seo ina leagtar amach an cosán chun tosaigh."
Dúirt an tAire Daly:
“Tá ríméad orm “Sharing the Vision - a Mental Health Policy for Everyone” a sheoladh. Cuirfidh sé treochlár ar fáil dár seirbhísí meabhairshláinte sna deich mbliana amach romhainn agus cuideoidh sé linn dul i ngleic leis an méadú ar éilimh ar ár seirbhísí ar bhealaí nua samhlaíocha. Táim muiníneach go n-athróidh an beartas seo saol daoine chun feabhais”.
Dúirt Hugh Kane, Cathaoirleach, an Grúpa Maoirseachta:
“Is gá tacaíochtaí meabhairshláinte níos láidre agus níos oiriúnaí a fhorbairt ag leibhéal an phobail agus an chúraim phríomhúil. Díríonn an beartas nua ar bheartas leathan meabhairshláinte uile-chórais a fhorbairt don daonra iomlán agus sainseirbhísí éifeachtacha meabhairshláinte a sholáthar. Tá an beartas nua dírithe ar ghníomhaíochtaí agus tá sé dírithe ar athruithe inláimhsithe a dhéanamh ar shaol daoine. Cuid lárnach den bheartas seo is ea an ceart atá ag daoine le deacrachtaí meabhairshláinte a bheith bainteach go lárnach lena gcúram agus lena dtéarnamh féin, chomh maith le fócas leanúnach ar athshlánú agus an gá go dtacófaí le téarnamh ar fud an chórais mheabhairshláinte. Moltar rochtain mhalartach ar chúram éigeandála agus úsáid chuí a bhaint as réitigh sláinte digití mar bhealach chun rochtain 24/7 ar sheirbhísí a fheabhsú."
Dúirt Anne O'Connor, Príomhoifigeach Oibriúcháin, FSS:
“Táimid ag bogadh isteach i gcéim nua anois maidir leis an gcaoi a gcuirimid seirbhísí meabhairshláinte ar fáil don phobal. Le teacht Covid-19 tá luasghéarú tapa tagtha ar sheachadadh seirbhísí meabhairshláinte ar líne, forbairt a chuirfear chun cinn tuilleadh le Sharing the Vision”.
CRÍOCH
Nótaí don Eagarthóir
Tá an beartas athbhreithnithe, Sharing the Vision – A Mental Health Policy for Everyone, á sheoladh inniu, Dé Céadaoin an 17 Meitheamh, ag an Aire Meabhairshláinte agus Daoine Scothaosta, Jim Daly.
Tháinig deireadh le téarma deich mbliana an bheartais náisiúnta meabhairshláinte, A Vision for Change, in 2016. Rinneadh Athbhreithniú ar Fhianaise Shaineolach, arna coimisiúnú ag an Roinn Sláinte, in 2016 chun fianaise a sholáthar chun treo an bheartais a chinneadh maidir le A Vision for Change a athnuachan, i dtéarmaí dea-chleachtais idirnáisiúnta agus na taithí a bhain le A Vision for Change a chur i bhfeidhm go dtí seo araon. Bunaíodh Grúpa Maoirseachta i mí Dheireadh Fómhair 2017 chun an beartas a athbhreithniú agus a nuashonrú agus chun dréacht-tuarascáil a chur i láthair lena breithniú ag an Roinn Sláinte. Bhí an tUasal Hugh Kane ina chathaoirleach neamhspleách ar an nGrúpa Maoirseachta agus bhí ionadaithe ón Roinn Sláinte, FSS, Earnáil Dheonach agus Úsáideoirí Seirbhíse FSS san áireamh.
Forbraíodh an beartas seo tar éis próiseas taighde ar nuálaíocht idirnáisiúnta agus ar an gcleachtas is fearr i meabhairshláinte agus comhairliúchán fairsing náisiúnta ar níos mó ná 1,000 úsáideoir seirbhíse, baill teaghlaigh, cairde agus cúramóirí agus páirtithe leasmhara eile. Chuir torthaí an Chomhchoiste Oireachtais ar Thodhchaí Cúraim Mheabhairshláinte leis an mbeartas seo freisin. Chuir an Grúpa Maoirseachta moltaí ábhartha meabhairshláinte san áireamh i mbeartais eile an Rialtais mar Better Outcomes Brighter Futures; Reducing Harm, Supporting Recovery; agus LGBTI+ Stráitéis Náisiúnta don Aos Óg Rinne an Roinn an tuarascáil seo a shruthlíniú le Sharing the Vision a tháirgeadh, ina leagtar amach tosaíochtaí seirbhíse reatha agus amach anseo.
Sharing the Vision samhlaítear leis seo córas meabhairshláinte a thugann aghaidh ar riachtanais an daonra trí dhíriú ar riachtanais an duine aonair. Is iad seo a leanas na príomhthorthaí a sainaithníodh:
- cur chun cinn, cosc agus idirghabháil luath;
- rochtain ar sheirbhísí, comhordú agus leanúnachas cúraim;
- cuimsiú sóisialta; agus
- cuntasacht agus feabhsú leanúnach.
Molann an beartas bealaí rochtana breise ar chóireáil a sholáthar, áit a gcuirtear úsáideoirí seirbhíse san áireamh i bpleanáil cúraim agus déantar idirghabhálacha a sholáthraítear a thomhas bunaithe ar thorthaí.
Leagtar amach treochlár cur chun feidhme sa bheartas athbhreithnithe ina n-eagraítear moltaí ar bhonn gearrthéarmach (0-18 mí); meántéarmach (18-36mí) agus fadtéarmach (36 mí - 10 mbliana). Ceann de phríomh-mholtaí an bheartais nua is ea Coiste Náisiúnta Forfheidhmithe agus Monatóireachta a bhunú chun maoirseacht a dhéanamh ar an dul chun cinn i gcur i bhfeidhm an bheartais.