Ráiteas ón Aire Sláinte agus ó Phríomhfheidhmeannach Fheidhmeannacht na Seirbhíse Sláinte (FSS)

D’iarr an tAire Sláinte, Jennifer Carroll MacNeill TD, agus Príomhfheidhmeannach Fheidhmeannacht na Seirbhíse Sláinte, Anne O’Connor, inniu go gcoimeádfaí gach bealach isteach chuig saoráidí leighis saor, chun rochtain ar sheirbhísí éigeandála a chinntiú, do dhaoine atá ag freastal ar choinne leighis agus chun a chinntiú gur féidir le foireann - lena n-áirítear iad siúd a oibríonn in ospidéil agus iad siúd a chuireann cóireáil ar dhaoine ina dtithe féin nó i suíomhanna pobail - dul chun na hoibre agus a gcuid othar a chóireáil.

Is tráth leochaileach é freastal ar ospidéal nó cóireáil a fháil sa phobal, cibé acu i gcás éigeandála nó do ghnáthchoinne, don othar agus dá theaghlach. Iarraimid oraibh meas a léiriú ar an riachtanas criticiúil atá ann do rochtain shoiléir agus shábháilte ar gach seirbhís cúram sláinte, chun a chinntiú nach gcuirtear rochtain ar chúram i mbaol riamh.